Jeems 5 - Yennu Gbounpaauŋ Mɔɔr

Kpaanii ki tur gordamm

¹ Yimm gordamm, gbiintir man! yii mɔ man kii fabin fara nba baat i paak na.

² I mɔkint na kur biir, ki wobii mɔɔ i tiata.

³ I likirii mun biira, ki li sa wann nan i mɔk biite, ki li sa biir i gbanant kaman nan muu nba di biaŋinba na. I senn i mɔkint nee ki guu i buut daar na.

⁴ I ŋmab i toontunna binba jaan i dii i kpaant ni na, ŋaan ki pabi, ki bi mɔ; ki bi mɔnii na kɔɔ yabint Yennu tuba ni.

⁵ Ya be tingbouŋ na ni, i be i yama ni, ki waa i gbanant niauŋ; i dint i mɔŋe, ŋaan i lek be kaman nan naajakpamma nba ki bi sa kpiu na.

⁶ I din piak ki biir popeendamme ki kpib, ŋaan bi ki kɔn nani.

Sukuru labaar

⁷ N naa waas, yii mɔk gbankur man kii guu ti Yomdaanɔ baaru daar maŋ. Gotir man kpaarɔ nba tuu mɔk gbankur ki guu kpafusaak mɔkmɔk nan sajoontik ki u jeet-n ji tan nan bonŋann.

⁸ Li paak, i mun-ii mɔk gbankur, ki chee i para kimaan ti Yomdaanɔ baaru daar per na.

⁹ N naa waas, i daa mɔk bunburimii i leeb paaki, ŋaan li-i tee ki i tuun nna, Yennu sa bu i buut. Gotir man, barbuurɔ na nakin ki see i tammɔi ni.

¹⁰ N naa waas, ti Yomdaanɔ Yennu sɔkiniinba nba din pak u sann ni na, gotir man ba din laat fara ki mɔk sukuru biaŋinba na, ki lii tee wannu ki turi.

¹¹ Li nibooru nba mɔk sukuru na, ti yib parpeenn damme. I poŋ gbat Job nba din tan mɔk sukuru biaŋinba na, ki li poorpo ki Yennu din tan nyinnɔ u fara ni. Li want Yennu nba mɔk ninbatinu ki tinit ninbaauk biaŋinbae.

¹² N naa waas, linba kpaa talase tee nee: i daa poor mɔpora. I daa yi sanpaapo amii tiŋ ni bonsiar sann ki poor mɔpora. Ŋaant ki i nn-ii tee i nn, ki i aaii-ii tee aaii, ki Yennu tan daa dar i tuba.

Yenmiaru labaar

¹³ Sɔɔ-i be i ni ki mɔk parbiir, wun miar Yennu. Wunba mun mɔk parpeenn, wun yin yanii kii piak Yennu.

¹⁴ Sɔɔ-i be i boor ki yiar, wun yiin Masiaweira saakab ki bin tan sɔɔrɔ kpan nan ti Yomdaanɔ Masia sann ni, ŋaan miar Yennu ki turɔ.

¹⁵ Ki bi-i meiɔ nan yada, ki miaru maŋ sa tinnɔ, ki ti Yomdaanɔ sa te ki u paak; ki li-i tee ki u tun toonbiitie, Yennu sa nyik u biit maŋ ki chabɔ.

¹⁶ Fiitir i toonbiit ki wann leeb, ki miar Yennu ki tur leeb, ki Yennu sa te ki i paak. Popeendaanɔ-i miar Yennu nan ninmɔnn, li mɔk paŋ bonchiann.

¹⁷ Elaija din tee nifosaarike kaman nan timm na, ŋaan din miar Yennu nan nunmɔnn a saak daa baa, ki saak set din ki baa ki saa jaŋ bina ŋanntaa nan ŋmaarii ŋannloob.

¹⁸ Li poorpo ki u bia miar Yennu, ki saak ji baa, ki tiŋ maak, ki jeet nan fanu.

¹⁹ N naa waas, sɔɔ-i kpet ki nyii mɔmɔmm sɔnu ni, ki sɔɔ jennɔ mɔmɔmm sɔnu maŋ ni,

²⁰ i mi nan daanɔ nba nyinn biitdaanɔ u sɔnbiiuk na ni, li daanɔ nyinn u manfoor kuun nie, ki te ki Yennu nyik chab toonbiit bonchiann.