Jeems 4 - Yennu Gbounpaauŋ Mɔɔr

Nisaarik nianbiiuk labaar

¹ Bee te ki i kɔn ki nɔi nan leebi? Li tee i nianbiiuk nba be i para ni ki kɔne.

² I loon bonsia, ŋaan kan la, ki ji tee siir nan nikpinu. I mɔk funfunn i leeb bona paak, ŋaan kan la, li paak, ki kunkɔna nan mɔniat be i sinsuuk ni. I ki mɔk ya loon linba na, kimaan i ki mei Yennu li po.

³ I mei Yennu ki ki laat kimaan i meiɔ ki loon i mɔŋ nianbiiuk yare.

⁴ I nyik Yennuwa, ki waa bonliae. Li-i tee ki i tee tingbouŋ na yɔɔsinbaie, i tee Yennu dataie; I ki mi nnee-ee? Wunba loon wuu tee tingbouŋ na yɔɔk, li yɔɔ teen u mɔŋ Yennu dataake.

⁵ Li sɔb Yennu gbouŋ ni a “U loon Seek nba ki u teent na bonchiann.”

⁶ Ŋaan u bia teent sommir bonchiann. Li paak, li sɔb Yennu gbouŋ ni a “Yennu kɔn nan karinbaanii damme, ŋaan sommit binba sikin bi mɔŋ.”

⁷ Li paak, yii saak Yennu mɔb man, ŋaan yêt Sintaanii, ki u sa chiar ŋaan nyiki.

⁸ Chatir nakin Yennu boor man, ki u mun sa nakini. Yimm biitdamm, wuut i nii man; yimm dudukit ŋannlelee damm, ŋammit i para man.

⁹ Yii mɔk parbiir ki bui nan ninnyuut i biit paak; i daa ji laa, yii mɔ man; ki ŋaan ki i parpeenn-n kpint ki teen parbiir.

¹⁰ Sikint i mɔŋ ti Yomdaanɔ tɔɔnn, ki u sa donni.

Daa piak mabiit leeb paaki

¹¹ N naa waas, i daa piak mabiit leeb paaki. Wunba piak mabiit u naa bik paak ki biirɔ, li tee Yennu sennue ki u piak mabiit li paak ki biir. Li-i tee ki a biir sennu na, a ki tee wunba waa-r kaa, ŋaan a tee li biirtɔɔe.

¹² Yennu kuukɔɔe mɔk yaak ki sa fit senn sennu, ki bia sa fit bu ti buut, ki bia mɔk paŋ nba sa fit tinn niib, ki bia sa fit biirib, ki ŋmee mun be ki mɔk yaak ki sa bu u lɔɔ buuti?

Yennue mɔk yaak manfoor paak

¹³ Gotir man, yimm nba tuu yeen a “Dinna amii wonn, ti sa saan digbann nawa, ki sa di binn kii kpentir kpinkpouŋ ki la nyɔɔt bonchiann,”

¹⁴ i ki mi linba sa baar wonni. I manfoor tee bee? Li tee kaman nan wunn nba tuu nyi sanyiɔk ni, ŋaan li-i yann lin ŋmat kɔɔ nee.

¹⁵ Li paak, li ŋan tin tuu yet a “Li-i tee Yennu loommie, ti sii mɔk manfoor, ki tun nna nan nnee.”

¹⁶ Ŋaan i mɔk karinbaanii ki nyu bara. Ya nyu bara biaŋinba na, li ki ŋani.

¹⁷ Li paak, wunba mi toonŋana tumu, ŋaan ki tuumi, li daanɔ mɔk biit.