Jeems 3 - Yennu Gbounpaauŋ Mɔɔr

Jerinn labaar

¹ N naa waas, i nisiab bonchiann daa loon bin teen wannteebi, kimaan i poŋ mi nan binba tee wannteeb na, bi buut tan sii paar ki gar binba ki tee wannteebi.

² Ti kur tun linba ki tokin bonchiann, ŋaan wunba ki piak mabiit, li daanɔ set tee niŋanɔe ki sa fit soor u gbanant kura.

³ Ti-i jii taangarika ki wukimm a bii tuun ta loon biaŋinba, bi gbanant paŋ kur be ti nuu nie.

⁴ Bia dukint ŋarint labaar po; bi yab bonchiann, ŋaan wounpaaruku da, bi saae, ŋaan dabik nnee ki kantɔɔ na dia ki kann ki bi saa wa loon siaminba.

⁵ Jerinn mun tee bonbik nnee, ŋaan bia mɔk yaak bonchiann. Gotir, mupɔɔrik nnee tuu di fɔgbeŋŋir.

⁶ Jerinn tee kaman nan muu nee; li be ti gbanant ni ki mɔk biitbooru booru kura, ki sa fit biir ti gbanant kur ki bia di nifosaarik binbeŋ kaman nan muu na; ki li muu nyii Sintaanii boore.

⁷ Nisaarike mɔk bonkobit nan nɔɔnii nan wai nan nyun ni bona kur yaak,

⁸ ŋaan nisaarik kan fit soor jerinn; li mɔk biite, ki bia gbee nan lɔbii nba baat nan kuun, ki bia ki foi.

⁹ Jerinn nba ki ti dia ki piak dont ti Baa Yennu nba tee ti Yomdaanɔ na, li jerinne ki ti bia dia ki piak mabiit nifosaarii paak, binba ki Yennu din namm ki bi naan nan u mɔŋ.

¹⁰ Mɔb nba ki maŋamm nyi na ni, li mɔb maŋe ki mabiit mun nyi. N naa waas, li-i tee nnaie, li ki ŋani.

¹¹ Bunbunn nba bunii nyunmamm nee bia bunii nyuntouŋuu?

¹² Ki kinkaŋ sa fit lon saanawa-aa? Amii gaak sa fit lon kinkaŋ lɔɔnawa-aa? Nnee mun, nyuntomm kan fit kpant nyunmammi.

Yan nba nyii Yendɔuŋ ni labaar

¹³ Ŋmee mɔk yan nan bannu i sinsuuk ni? Sɔɔ-i be, wuu be fanu ki sikin u mɔŋ kii tuun toonŋana, ki li sa wann nan u set mɔk yan.

¹⁴ Ŋaan li-i tee ki i mɔk funfunn nan dontinmɔŋ i para ni, i daa nyu bara, ki daa fa faak, ki daa yêt barmɔnii.

¹⁵ Li yan ki nyi Yennu boor ni kaa, li tee tingbouŋ na nan gbanant loomm nan Sintaanii yare,

¹⁶ kimaan funfunn nan dontinmɔŋ nba be sian, daamuk nan biitbooru booru kur be leŋe.

¹⁷ Ŋaan yan nba nyi Yennu boor, li ki mɔk biiti; wunba mɔk yan maŋ, u mɔk parmaasir ki be soonna, ki gbia u leeb; u mɔk ninbatinu bonchiann, ki bia tuun toonŋana bonchiann; u ki mɔk lukitin, ki bia ki mɔk kpinkpannii.

¹⁸ Binba mɔk parmaasir ki te ki parmaasir-n baar niib sinsuuk ni na, ŋamme te ki yentinu be.