Jeems 2 - Yennu Gbounpaauŋ Mɔɔr

Daa mɔk ningannii

¹ N naa waas, ya teen ti Yomdaanɔ Yisa Masia wunba tee paŋ daanɔ na yada biaŋinba, i daa mɔk ningannii.

² Li-i tee ki mɔkitɔɔ wunba lia taŋant ki pir sarinbaŋ kɔɔ i Yenjiantu diiuk ni, ki nandaanɔ nba lia tachiat mun kɔɔ,

³ ki i tur mɔkitɔɔ na nibaakir, ki betɔ a wun kar tɔɔnn po, ŋaan bet nandaanɔ na a wuu see amii wun kar tiŋ ni,

⁴ n naa waas, li-i tee ki i tuun nna, i tee niib nba mɔk ningannii nan i leeb, ki bia mɔk dudukbiite.

⁵ N naa walonkai, gbiintir man, Yennue gann binba tee nandamm tingbouŋ na niib boor, a bin teen mɔkita u boor, kimaan bi teenɔ yada, ki teen u waas nba sa di naan nba ki u din senn mɔsonn a u sa tur binba loonɔ na.

⁶ Ŋaan yimme yisin nandamm. Mɔkita nee mukisiri ki so-i ki saa nani buut boor. Nna kaa-aa?

⁷ Ŋamme bia piak biir Yisa Masia sanŋann nba ki Yennu turi na.

⁸ Li sɔb Yennu gbouŋ ni a “I loon a lɔɔ kaman nan fa loon a mɔŋ biaŋinba na.” Li-i tee ki i waa Yennu naan sennu maŋ, li ŋan,

⁹ ŋaan li-i tee ki i mɔk ningannii nan leeb, li tee biite, ki sennu maŋ fiitir ki want nan i set tee sennu biir damme.

¹⁰ Wunba sak ki wei sennu na kur, ŋaan tan biir sennii maŋ yenn, li want nan u biir sennii na kure.

¹¹ Sennii maŋ nɔɔk ni Yennu nba yet a “Daa chomm na,” ŋɔɔe bia yet a “Daa kpi nirɔ.” Li paak, li-i tee ki a ki chomm, ŋaan kpi, a biir sennii maŋ kura.

¹² Yii piak ŋaan kii tuun kii mi nan Yennu tan sa jii sennu nba nyint niib biit daabsin ni nee, ki bu i buut.

¹³ Binba ki tin bi leeb ninbaauk, Yennu sa bu bi buut ki kan tinib ninbaauku; ŋaan ki ninbatinue nyant tubdatu.

Yada nan toona labaar

¹⁴ N naa waas, daanɔ nba yaa a u teen Yisa Masia yada, ŋaan ji ki tuun popeenn toona, li mɔk nyɔɔtii? U yada maŋ booru sa fit tinnɔwa-aa?

¹⁵ Li-i tee ki a naa bik be ki ki laat gbab, ki bia ki laat di,

¹⁶ ki a ji beerɔ a “N naa bik, a kun maanua, kii gbab, kii bia di,” ŋaan kan sommɔ nan siari, li mɔk nyɔɔtii?

¹⁷ Yada kuukɔɔ-i be, ŋaan toonŋana kaa, yada maŋ tee yadakpeeuŋo.

¹⁸ Li-i tee ki nirɔ yet a “Sɔɔe mɔk yada, ki lɔɔ mun tuun toonŋana,” n mun sa jiin a “Li-i tee ki a ki tuun toonŋana, lannpoe want nan a set mɔk yada? Ŋaan n toonŋana nee wanta nan min set mɔk yada.”

¹⁹ A teen yada nan Yen-yenɔkɔɔe be-ee? Li ŋan. Narinbiit mun teen yada nan Yen-yenɔkɔɔe be, ki bia jekir nan jaŋmaanii.

²⁰ Fin jatuk na, li-i tee ki a mɔk yada ŋaan toonŋana kaa, li tee yanne; a loon ki a bann na-aa?

²¹ Ti yeja Abraham nba din jii u bik Aisak ki paanɔ binbintir paak a wun kpiu ki mann marouŋ ki tur Yennu na, toonn maŋ paake ki Yennu din yet a u tee niŋanɔ u boor.

²² Na a lawa-aa? Wa teen Yennu mɔmaan yada paake ki u din tun toonn maŋ; toonn maŋe mun din wann nan u teen Yennu yada nan barmɔnii.

²³ Ki Yennu mɔmaan nba sɔb u gbouŋ ni nee din tan teen mɔmɔmm a “Abraham din teen Yennu yada, li paak, ki Yennu yaa a u tee niŋanɔ u boor.” Li paak, ki bi din yiu Yennu yɔɔk.

²⁴ Na a lawa-aa? Nirɔ toonŋana paake ki Yennu sa yet a li daanɔ tee niŋanɔ u boor; ki li ki tee u yada kuukɔɔ paaki.

²⁵ Li din tee nnee mun ki tur poochonchonn nba sann din yi Rahab na; wa din gaar toomiinba nba ki Israel teeb din tumm, ki bia wannib sɔnu nba ki bi tɔkin ŋmat kun na, u toonn maŋ paake ki Yennu din yet a u tee niŋanɔ u boor.

²⁶ Li paak, gbanant nba kaa seek, li tee gbanankpeeuŋo, yada-i munii be ki toonŋana kaa, li mun tee yadakpeeuŋo.