Jeems 1 - Yennu Gbounpaauŋ Mɔɔr

¹ Min Jems, wunba tee Yennu toontunnɔ ki bia tee ti Yomdaanɔ Yisa Masia toontunnɔ, n foont Israel nibooru piik nan bannlee nba yat ki be tingbouŋ na kur ni.

Yada nan yan labaar

² N naa waas, yii mɔk man parpeenn yoo nba ki i di fara booru booru na,

³ kimaan i poŋ mi nan fara maŋe baati ki i bant nan i set teen Yisa Masia yada nan barmɔnii, ki li teeni gbankur.

⁴ Ŋaant man kii ŋamm kii mɔk gbankur fanu nan li joontu, ki i tan kan kɔŋ binbenŋaŋi.

⁵ Li-i tee ki i sɔɔ pɔt yan, wun miar Yennu wunba pi sɔɔ kur piinii nan burchint, ki ki dint sɔɔ fei na, ki u sa turɔwa.

⁶ Fi-i mei Yennu, fan teen yada ki daa mɔk birsuku; ŋaan fin nba meiɔ nan birsuk, a tee kaman nan mɔkgbeŋŋir nyunpana nba ki wouŋ da ki li fi ki baa nee.

⁷ Li nibooru daa dukii nan u sa la siar Yennu boori,

⁸ kimaan u mɔk dudukit munnlee-e.

Tarii nan mɔkita labaar

⁹ Li ŋan ki ti naa waas nba tee tarii-ii mɔk yuugontir Yennu nba donnib na paak,

¹⁰ ki ti naa waas nba mun tee mɔkita-ii munii mɔk yuugontir Yennu nba sikinib na paak, kimaan li kan yukiri ki bi sa gar kaman nan tipuuk nba tuu koor ki baa na;

¹¹ kimaan yennu-i nyii ki yekit tipuuk paak, puuk na tuu koore ki baa, ki li ŋant-n ji biir. Li mun bia tee nnee ki tur mɔkita; yoo nba ki bi dukii bi toona nba sa saan tɔɔnn biaŋinba na, li yooe bin kpo.

Bikinu labaar

¹² Binba nyann bikinu na, parpeenn tee bi yare, kimaan Yennu sa turib nyɔɔt nba tee manfoor nba ki u din senn mɔsonn a u sa tur binba loonɔ na.

¹³ Sɔɔ-i la bikinu, u daa yaa a Yennue bikinɔ. Siar kaa ki sa fit bikin Yennu, Yennu mun ki bikii sɔɔ.

¹⁴ Nirɔ-i loon wun tun u mɔŋ nianbiiuk toona, nnee tee bikinu.

¹⁵ Nianbiiuk-i soor nirɔ, li sa baar nan toonbiite, ki toonbiit joontu tee kuume.

¹⁶ N naa walonkai, i daa te ki siar kpanniini.

¹⁷ Bonŋann kur nyii sanpaapoe ti Baa Yennu boor, wunba din nan sanpaapo yentu kura. Ŋɔɔ ŋanin ki lebitir kaman nan sanpaapo yentu nba tuu lebitir biaŋinba na; u bia daa tee ŋɔɔ Yennue.

¹⁸ U mɔŋ loommo ki u teent u waas, u maan nba tee barmɔnii na paak, a tii chee u bonninaant kura.

¹⁹ N naa waas, n loon yin bann nee; yii gbiintir yian, ŋaan kii mi biaŋinba ki i piak, ki bia daa dont wutoor yian yiami,

²⁰ kimaan nifosaarik wutoor ki tuun Yennu toonŋana.

²¹ Li paak, n naa waas, yi nyik i yanbɔmm nan biit kur nba be i para ni na, ŋaan sikin i mɔŋ Yennu tɔɔnn, ki gaar u maan nba ki u kɔɔnt i para ni na, kimaan maan maŋe mɔk paŋ nba sa nyinni kuun ni.

²² Ŋaan yii tuun biaŋinba ki maan maŋ wanni na; li-i tee ki i gbat maan maŋ, ŋaan ki ki tuun biaŋinba ki li wann na, i kpann i mɔŋe.

²³ Wunba kur gbat maan maŋ, ŋaan ki ki tuun biaŋinba ki li wanni, u tee kaman nan nirɔ nba tuu got ki la u mɔŋ mianu ni nee;

²⁴ kimaan u got ki la u mɔŋ mianu na ni, ŋaan seet, u ji tuu tamm wa bo got ki la u mɔŋ ki u tee biaŋinba nee.

²⁵ Ŋaan wunba dukii sennŋann nba sa fit nyint niib biit daabsin ni, ŋaan ki tammir, ŋaan mɔk gbankur ki tuun biaŋinba ki li wann na, parpeenn sii tee li daanɔ yare, kimaan u tumu na paak.

²⁶ Wunba mi nan u tee Yisaweirɔ ŋaan ki ki so u mɔbi, li daanɔ kpann u mɔŋe. Li want nan u waanu na tee yanne.

²⁷ Wunba sommit kpeebii nan pakɔi bi fara ni, ki bia nyinn u mɔŋ tingbouŋ na biit ni, ŋɔɔe set tee Yisaweirɔ nan barmɔnii, ki ki mɔk biit ti Baa Yennu boori.