Hiibru teeb 7 - Yennu Gbounpaauŋ Mɔɔr

Yennu mantɔɔ Melkisedek labaar

¹ Melkisedek maŋ din tee Salem tiŋ bate ki bia din tee yabint Yennu mantɔɔ. Abraham nba din tan nyii tɔb nba ki u din kɔn nyann batnba banna na, Melkisedek din chetɔ ki senn mɔsonŋann u paak;

² ki Abraham din nyinn bona piik ni yennkɔɔ wa din kɔn fat bont nba na kur ni ki turɔ. (Melkisedek, u sann maŋ paak tee a “Yentinu Bat,” ŋaan u din tee Salem bat; ki Salem paak tee parmaasir, li paak, ki u bia tee “Parmaasir Bat.”)

³ Labasiar ki be ki want Melkisedek baa po amii u naa po amii u yejamm po. Labasiar kaa ki want u maru po amii u kuun po. U naan nan Yennu Bija nee. U lek bia yɔɔ tee Yennu mantɔɔe nan yoo nba kaa gbennu.

⁴ Li paak, i la wa din tee nijaann biaŋinba, kimaan ti yejasaakɔɔ Abraham lek din tan nyinn wa din kɔn fat bont nba tɔb ni na bona piik ni yennkɔɔ ki turɔ.

⁵ Ki sennu din wann a Liifai teeb yaaboona nba tee manteeb na, a bin tuu gaar bi niib Juu teeb nba mɔk linba li bona piik ni yennkɔɔ, ŋaan bi niib maŋ mun bia lek din tee Abraham yaaboonae.

⁶ Melkisedek din ki tee Liifai teeb yaaboonn kaa, ŋaan u din gaar bona piik ni yennkɔɔ Abraham boor, ki bia senn mɔsonŋann ŋɔɔ Abraham wunba din gaar Yennu mɔsona na paak.

⁷ Mɔniɔk kaa nan nisɔɔ nba senn mɔsonŋanne tee nijaann ki gar wunba gaan mɔsonŋann maŋ.

⁸ Manteeb nba din tuu gaan niib nba mɔk linba li bona piik ni yennkɔɔ na din tee nisaarii ki din tuu tan kpo; ŋaan Melkisedek wunba din gaar Abraham bona piik ni yennkɔɔ na ŋanin be, kaman nan Yennu gbouŋ nba wann biaŋinba na.

⁹ Ti sa fit yet a yoo nba ki Abraham din nyinn u bont ni bona piik ni yennkɔɔ na, u yaaboona Liifai teeb binba din tan gaan bona piik ni yennkɔɔ maŋ, mun din mi bi bona piik ni yennkɔɔ nyinnu,

¹⁰ kimaan ba lek daa din ki mar Liifai na, ŋaan ti sa fit yet a yoo nba ki Melkisedek din chet Abraham na, ŋɔɔ Liifai din be u yeja Abraham maŋ ni.

¹¹ Yennu din tur Juu teeb sennu ki wann Liifai teeb bi mannu toona nba sii tee biaŋinbae. Ki Liifai teeb manteeb toona-i diŋŋi be fanuie, li din bo kan kpaa talas ki mantɔganɔ wunba ki set Aron setu ni ŋaan see Melkisedek setu ni na-n baari.

¹² Kimaan yoo nba ki manteeb yudantuk lebitu nba din tuu tan baar ki bin lebit na, sennu mun bia din tuu lebite,

¹³ ki ti Yomdaanɔ Yisa wunba tee mantɔganɔ maŋ nyii boorganu nba ki bi sɔɔ din ki mi tun mannu toonni.

¹⁴ Sɔɔ kur poŋ mi nan ŋɔɔ Yisa nyii Juda nibooru ni, nibooru nba ki Moses din ki mi pak siar bi po ki jikit saa manteeb po.

Mantɔlɔɔ nba naan nan Melkisedek na labaar

¹⁵ Yoo nba ki mantɔganɔ nba naan nan Melkisedek na din tan baar nee ki ti mantik ŋamm bann barii maŋ paak.

¹⁶ Ŋɔɔe tee mantɔɔ, ki nisaarik sennii ni kaa ki u teen li mantɔɔ, ŋaan li tee manfoor nba kaa gbennu na paŋ nie ki u teen mantɔɔ.

¹⁷ Kimaan bi din sɔb u po Yennu gbouŋ ni a “A tan sii tee mantɔɔe ki jikit saa yoo nba kaa gbennu, kii tee Melkisedek paabu ni mantɔɔ.”

¹⁸ Li paak, sennkperu na ji din bakine, kimaan li din ki mɔk paŋi, ki bia ki mɔk nyɔɔti,

¹⁹ kimaan Moses sennu maŋ din kan fit te ki siar be fanu. Ŋaan mɔtana ti ji mɔk linba turit dindann nba chee na, ki li nie ki ti chat nakin Yennu boor ni.

²⁰ Ki Yennu mɔsonn bia pukin li paak.

²¹ Yennu din tuu ki teen manteleeb na li mɔsonn booru. Ŋaan Yisa din teen mantɔɔ yoo nba ki Yennu din tan tur mɔsonn ki betɔ a “Min Yennu senn mɔsonn ki ji kan lebit n dudukit, ki yet a ‘Fine sii tee mantɔɔ ki jikit saa yoo nba kaa gbennu.’ ”

²² Li paak, nnee te ki Yisa tee wunba wann nan mɔsonn nba chee na kaa lotu.

²³ Tɔn, yaayoo ni manteeb maŋ din tuu tan kpoe, ki bi leeb na-n mun gaar bi toona; li paak, ki bi din yab.

²⁴ Ŋaan Yisa ŋanin sii yɔɔ be ki tee mantɔɔ ki jikit saa yoo nba kaa gbennu, ki u toona na kan mi nyi u nuu ni ki sɔɔ-n gaariri.

²⁵ Li paak, binba chat nakin Yennu, ŋɔɔ Yisa sann paak na, u sa fit tinnib mɔtana nan yoo nba kaa gbennu, kimaan u lek be u manfoor ni yoo kur, ki mei Yennu ki teemm.

²⁶ Li paak, Yisae tee ti mantɔɔ nba jaŋ nan ti sommir. Ŋɔɔe tee popeendaanɔ, ki ki mɔk bisiati; u be u kɔɔe nan biitdamm, ki Yennu donnɔ ki gar Yendɔuŋ ni teeb kura.

²⁷ Manteyudaanleeb na din tuu mann marouŋ daar-n tuu daar bi tiauŋ biit paak sinsinn, ki bia mann marouŋ ki tur niib; ŋɔɔ Yisa ki tee nna kaa; u din jii u mɔŋ ki mann marouŋ yomkɔɔe, ŋaan ki li marouŋ gbenn ki tur sɔɔ kura.

²⁸ Moses sennu na din tuu gann nisaarii ki teemm manteeb yudamm; ŋaan ki bi din tuu ki be fanu ki gbenni. Ŋaan sennu maŋ poorpoe ki Yennu din senn mɔsonn nan u Bija Yisa wunba sii yɔɔ be fanu ki jikit saa yoo nba kaa gbennu na, ki teenɔ mantɔɔ.