Hiibru teeb 5 - Yennu Gbounpaauŋ Mɔɔr

¹ Tɔn, mantɔyudaanɔ kur nba ki bi gannɔ niib sinsuuk ni na, bi sennɔ a wun gaar u leeb paake ki mann mannu ki tur Yennu bi biit paak.

² Ŋaan u mɔŋ nba tee butundaanɔ na sɔnii bonchiann ni na paak, u sii fit be nan binba pɔɔr yan ki kpet sɔnu na soonna,

³ ki u mɔŋ nba tee butundaanɔ na paak, li kpaa talas ki wun mann mannu u mɔŋ toonbiit paak kaman nan wa mann mannu niib na toonbiit paak biaŋinba na.

⁴ Sɔɔ ki fit dont u mɔŋ a wuu tee mantɔyudaanɔ, see ki Yennu gannɔ kaman nan wa din gann Aron ki teenɔ mantɔyudaanɔ biaŋinba na.

⁵ Nnee mun, Masia din ki donn u mɔŋ ki gann u mɔŋ a wuu tee mantɔyudaanɔ, ŋaan Yennue din yetɔ a “A tee n Bijae; la nyii dinna ki n wann nan n tee a Baae.”

⁶ Ki siar po u bia yet a “A tan sii tee mantɔɔ ki jikit saa yoo nba kaa gbennu, kii tee Melkisedek paabu ni mantɔɔ.”

⁷ Tɔn, Yisa nba din be tingbouŋ na ni yoonba na u din mei Yennu ki barimɔ, ki bui nan ninnyuut Yennu nba sa fit fatɔ kuun ni na boor ni. Ki wa din baakit Yennu na paak ki Yennu din gbat u miaruwa.

⁸ U tee Yennu Bijae, ŋaan u mun din dii farae Yennu mɔbsaku ni,

⁹ ki din tan gbenn fara dinu maŋ, ki te ki binba kur saak u mɔb na la tinnu nba kaa gbennu.

¹⁰ Ŋanne ki Yennu yiinɔ manteeb yudaanɔ, Melkisedek paabu ni.

Yada lunu kpaanii labaar

¹¹ Ti bo sa pak Masia nan Melkisedek po bonchiann ŋaan li paar nan ki ti wanni, kimaan i ki bant li paak yiami.

¹² Nna yoo li ji bo kpaa talase ki yii tee wannteeb, ŋaan i bia loon ki sɔɔ-n wanni Yennu mɔmaan pinpiik ni sɔnii na. I bia daa ŋan nan biime, i ki jaŋ nan jeŋmankati,

¹³ kimaan wunba daa mɔɔr biin tee bibunne, ki daa ki bann yentinu wannu na fanu.

¹⁴ Ŋaan jeŋmankat tee saakab yare, ŋamm tuu tumii ki fit bann linba tee bonbiir nan linba tee bonŋann.