Hiibru teeb 3 - Yennu Gbounpaauŋ Mɔɔr

Yisae tee nijaann ki gar Moses

¹ N naa waas nba tee Yennu niib nba ki u din ganni na, yii dukii Yisa po, wunba ki Yennu din tumɔ a wun tan teen mantɔyudaanɔ ti Yenjiantu sɔnu ni.

² Moses nba din tee barmɔnii toontunnɔ Yennu ŋaateeb sinsuuk ni biaŋinba na, nnee ki Yisa mun din tee barmɔnii toontunnɔ Yennu nba din gannɔ na boor ni.

³ Ŋamaarɔ jaŋ nan bin teenɔ nibaakir ki gar ba teen ŋaak tiauŋ biaŋinba na; nnee ki Yisa jaŋ nan bin teenɔ nibaakir ki gar ba teen Moses biaŋinba na.

⁴ Ŋaak-i taŋŋi see, sɔɔe sennir; li paak Yennue sent bonsiar kura.

⁵ Moses din tee barmɔnii toontunnɔ Yennu ŋaateeb sinsuuk ni ki din wann linba po ki Yennu din yaa wun tan pak sianyoo na.

⁶ Masia ŋanin tee barmɔnii daanɔ nba yen Yennu ŋaak maŋe ki tee u Bija na. Ti-i mɔk parcheenn nan yuugontir ti dindann paak, ŋann timme tee Yennu ŋaateeb maŋ.

Yennu niib foon labaar

⁷ Li paak, i sak man Seyeeŋ nba yet biaŋinba na a “I-i gbat Yennu kunkɔr dinna,

⁸ ya daa nyar i tuba kaman nan i yejamm nba din nyar bi tuba biaŋinba ki din kɔn nanɔ ki bikinɔ ba din be muuk ni yoonba na.

⁹ Yennu din yet a ‘Bi poŋ din la ma din tun linba kur ki saa jaŋ bina piinna na, ŋaan leŋe ki bi din bikinin.

¹⁰ Ŋanne din te ki n donn wutoor niib maŋ paak ki din yet a Bi para ni, bi bota ki ki mi n sɔnii.

¹¹ N din donn wutoor ki porib mɔb a Bi kan mi baar ma bo yaa n turib foon tiŋ nba na ni.’ ”

¹² Tɔn, n naasinyɔɔsinba, yi bann i yan ni ki sɔɔ daa tee biitdaanɔ ki kɔŋŋit yada ki tan mann ŋmat poor ki nyik manfodaanɔ Yennu na.

¹³ Ŋaan i sommit leeb man daar-n tuu daar, ta daa be ti manfoor ni yoonba na, ki biit daa kpanni ki i tee tubkangbata damm.

¹⁴ Kimaan ti-i dia ti sinsinn yada na chib ki saa baar ti manfoor joontu, timm nan Masia tee bonyenne.

¹⁵ Nnee ki bi din sɔb Yennu gbouŋ ni a “I-i gbat Yennu kunkɔr dinna, ya daa nyar i tuba kaman nan i yejamm nba din nyar bi tuba biaŋinba na, ki din kɔn nan Yennu ki yêtɔ na.”

¹⁶ Ki lamme din gbat u kunkɔr ŋaan kɔn nanɔ ki yêtɔɔ? Ŋamm kaa din tee binba nyii Ijipt ki Moses din tee tɔɔndaanɔ na-aa?

¹⁷ Ki lamme bia ki Yennu wutoor din doo bi paak ki saa jaŋ bina piinna na? Li ki tee binba din tun toonbiit, ki bi gbanant tan biar muuk ni na kaa-aa?

¹⁸ Yennu daa din por lamme mɔb a “Bi kan mi baar ma bo yaa n turib foon tiŋ nba na ni.” Li din tee binba din yêt u mɔb nee.

¹⁹ Li paak, bi din ki fit kɔɔ tiŋ maŋ ni, kimaan bi yadakaarin paak.