Hiibru teeb 2 - Yennu Gbounpaauŋ Mɔɔr

Tinnjaann labaar

¹ Li paak, li kpaa talase ki tin gbiint barmɔnii nba ki ti din gbat na fanu ki tan daa kɔŋŋitiri.

² Labaar nba ki malakanba din mɔn ki tur ti yejamm na din tee barmɔniie, ki wunba din tuu ki sakir ki weir din tuu la tubdatu nba jaŋɔe.

³ Li paak, ti-i kii sak ki gbiint tinnjaann maŋ labaar fanu, ti sa teen nlee ki nyi tubdatu ni? Ti Yomdaanɔ tiauŋo din dɔŋ mɔn tinnu maŋ labaar na po, ki binba din gbat na din wannit a li set tee barmɔniie;

⁴ ki Yennu nba din tuun bakitnauŋ nan yaarlituk toona nan nyina ki bia teemm u Seyeeŋ piinii u lomm ni biaŋinba na, u pukii u siara bi wannu maŋ paak.

Wunba yen tinnu maŋ labaar

⁵ Dunia nba baat ki ti pak li po na, Yennu din ki yaa a malakanbae tee li yudammi.

⁶ Li sɔb siar po Yennu gbouŋ ni a “Yennu, nisaarik tee bee ki a dukii u po; u mun tee bee ki a baka be u ni?

⁷ A din te ki u pɔ malakanba yoo waaminna, ki bia te ki u la dontir nan paku,

⁸ ŋaan yen bonsiar kura.” Li yet a Yennu din teen nisaarike “bonsiar kur yudaanɔ.” Li want nan u yen bont kurewa, ŋaan mɔtana nisaarik daa ki yent bonsiar kuri.

⁹ Ŋaan ti laat Yisae. Ŋɔɔe ki Yennu din te ki u pɔ malakanba yoo waaminna, a wun gaar sɔɔ kur paak ki kpo, ŋɔɔ Yennu ninbatinu ni na. U kuun fara dinu maŋ paak ki Yennu te ki u la dontir nan paku.

¹⁰ Kimaan Yennu nba din nan bonsiar kur ki bia dia li kur na, wa jii u waas bonchiann ki kɔɔmm u naan ni na, li din tokin u boor ni a wun te ki bi tinnu daanɔ Yisa-n teen bi Tinntɔɔ nan barmɔnii u fara dinu ni.

¹¹ Ŋɔɔ wunba te ki nisaarii teen Yennu niib, ki ŋɔɔ nan ŋamm kur ji taan ki mɔk Baa yenɔkɔɔ. Li paake ki Yisa ki tiin fei nan wun yiimm u naa waasi.

¹² U bet Yennu a “N tan sa mɔɔnt a sann n naa waas boor; n tan sa paka bi lakinn ni.”

¹³ U bia yet a “N tan sa teen Yennu yada,” ki bia yet a “Min nan waas nba ki Yennu din turin nee be na.”

¹⁴ Tɔn, Yennu waas nba tee nisaarii na paak, Yisa mun din tee nisaarike kaman nan ŋamm na, a u kuun ni wun tan biir Sintaanii nba mɔk kuun paŋ na,

¹⁵ ki nyinn binba tiin kuun jaŋmaanii na bi jaŋmaanii maŋ ni, kimaan bi din tee jaŋmaanii yommiie bi manfoa kur ni.

¹⁶ Barmɔniie, li ki tee malakanba ki u sommit, ŋaan Abraham yaaboonae ki u sommit.

¹⁷ Linba na want nan li din kpaa talase a wuu tee kaman nan u naa waas na u binbeŋ kur ni, ki teen bi mantɔyudaanɔ nba tee ninbatinu daanɔ ki bia tee barmɔnii daanɔ, ki jii u mɔŋ ki teen marouŋ ki tur nisaarii Yennu boor ni, a wun nyik chab bi biit.

¹⁸ Ki u sa fit somm binba yaa bin kɔɔ jinjammii ni, kimaan jinjammii din jamm u tiauŋo ki dinnɔ fara.