Hiibru teeb 13 - Yennu Gbounpaauŋ Mɔɔr

Toona nba pent Yennu par ni labaar

¹ Ya tee Masia niib na paak, i loon i leeb man yoo kur.

² I daa tammit saamm gaaru po, kimaan nisiab din tan gaar malakanba saauŋ, ŋaan ki mi a bi tee malakanbae.

³ Yii tian nisiab nba be dansarii ni na po kaman nan yimm nan ŋamme lakin be li ni; kii tian nisiab nba laat muksuk na po, kimaan i mun daa be tingbouŋ na ni nan i gbanante.

⁴ Yii mɔk nibaakir nan i leeb nan i pookɔɔnt nan i jakunt ni ki daa chommi, kimaan Yennu tan sa dat bonchonchona nan joonbaarit nan sapaanwɔbira nan naasinwɔbira tuba.

⁵ Yi nyinn i niauŋ nan liklommu, ŋaan te ki i numm-n gboo nan ya mɔk linba; kimaan Yennu yet a “N kan mi ki nyikani, n bia kan mi ki ŋaanani.”

⁶ Li paak, ŋaant ki tii mɔk parcheenn ki yet a “Ti Yomdaanɔ tee n sommtɔɔ, n kan tin jaŋmaanii, nisaarik sa teenin bee?”

⁷ I tian man i yudamm nba din tuu piak Yennu maan ki teeni na po; ki yii dukii bi binbeŋ nyɔɔt nba tee biaŋinba ki yii tokii bi yada.

⁸ Yisa Masia nba won tee biaŋinba wonn na, u bia tee nnee dinna na, u bia sii tun tee nnee nan yoo nba kaa gbennu.

⁹ I daa ŋaant ki wannsaanbooru booru-n te ki i boti, ki i tan sa mann tut sɔnŋanu maŋ. Li ŋan ki Yennu sommir-n tur nirɔ paŋ u par ni; jeet sennii weiu kan turɔ paŋi. Nisiab nba dia jeet sennii poŋ ki laat sommsiar li ni.

¹⁰ Tɔn, binba mann mannu Juu teeb Yenjiantu boor ni na ki mɔk yaak a bii di linba be ti mannu binbintir na ni.

¹¹ Ki Juu teeb manteeb yudaanɔ tuu kɔɔ nan bonkobit sɔn Yennu diiuk ni, boor nba tee Yennu yar nan barmɔnii na ni, ki mann marouŋ biit paak, ŋaan joo bonkobit maŋ nant muu bi doo na kpiŋ po.

¹² Li paak, ki Yisa mun din kpo doo na kpiŋ po, a wun nyinn niib biit ni, u mɔŋ sɔn paak.

¹³ Li paak, ŋaant ki tin nyi ki saan u boor ni man, ki sak feidinu u paak.

¹⁴ Kimaan doo nba sa biar kaa tingbouŋ na ni; dosau nba baat nee ki ti guur.

¹⁵ Li paak yi ŋaan ki tii dontir Yennu sann yoo kur Yisa sann ni; paku nba nyi ti mɔi ni nae tee mannu ki turɔ.

¹⁶ I daa nyikit toonŋana tumu, kii chentir ya mɔk linba nan i leeb. Li mannboorue pent Yennu par ni.

¹⁷ Yii saak i yudamm mɔi ki sikin i mɔŋ ki turib, kimaan bi baka be i benu ni, kimaan bi tan sa wann Yennu bi toona nba ki bi din tuun. Ŋaant ki bin tan wannɔ nan parpeenn, ŋaan tan daa wantɔ nan parbiiri. Nna tan kii mɔk nyɔɔt ki turiini.

¹⁸ I mei Yennu man ti paak. Ti ki mɔk dudukbisiat ti toona ni, kimaan ti loon tin tun linba tooke yoo kur.

¹⁹ Ŋaan n mantik barimiie bonchiann, i mei Yennu man ki turin ki wun te ki n jen i boor ni mɔtana.

Yenmiarjoontik labaar

²⁰ Yennu nba teent parmaasir nae din fiin ti Yomdaanɔ Yisa kuun ni. Ŋɔɔ Yisae tee ti guutɔjaann na, kimaan u din kpo, ki u sɔn ŋamm Yennu mɔlor nba sii see yoo nba kaa gbennu;

²¹ li Yennu-n ŋamm i binbeŋ fanu a yii tuun u loomm, kii tuun toonŋana kur; Yisa Masia paak wun te ki tii tee binba sii pent u par. Ŋɔɔe yen dontir nan yoo nba kaa gbennu. Mɔmɔmm.

Barjoontii labaar

²² N naa waas, n barimiie, yi di sukuru ki gbiint kpaanii na; kimaan ma sɔb gbouŋ nba turi na ki fɔki.

²³ N loon ki i bann nan bi nyinn ti naa bik Timoti dansarik niwa. Li-i tee ki u sa baar n boor ni mɔtana, i sa la min nan ŋɔɔ.

²⁴ Yi foont i yudamm kura nan Yennu niib na kura ki turit. Ti naa waas nba nyii Itali tiŋ ni na foonti.

²⁵ Yennu sommir-ii be i kura ni.