Hiibru teeb 12 - Yennu Gbounpaauŋ Mɔɔr

Ti Baa Yennu labaar

¹ Binba na kur tee siaradamme ki lintit. Li paak, yi ŋaan ki tin yabir ki fok lu linba kur sa gɔɔrit Masia sɔnu ni, nan biit nba sa soorit; yi ŋaan man ki tii di sukuru ki gbaa gbaar nba yaa lin baarit na.

² Ŋaant ki tin kpan kpaa ti ninbina Yisa paak; ŋɔɔe ki ti yada gaa u paak li pinpiik niwa nan li joontu ni na. Dapunpunn na din ki te ki u nyik u yabiru, kimaan parpeenn nba din baat u paak na paak, u din ki dukin ki li mɔkɔ fei nan wun kpo li dapunpunn paaki, ŋanne te ki u ji kar Yennu naangbouŋ paak u nuudiitu po mɔtana.

³ Yin lek bikin wa din gaar naŋ biaŋinba biitdamm boor ni ki jii u tiauŋ. Li paak, i daa te ki i gbanu baŋŋit ki i nyikit yabiru.

⁴ Kimaan ya yabii ki kɔn nan biit na ŋaan i sɔɔ daa ki mi yabir teee ki li saa baar kuumi.

⁵ I ki tian Yennu nba kpaani kaman nan baa nba tuu kpaan u waas biaŋinba na-aa? Li sɔb a “N bik, ti Yomdaanɔ-i kpaana kpaanii yoonba, fan gbiint, li-i tee ki u dat a tubir, fa daa nyikit a yabiru,

⁶ kimaan ti Yomdaanɔ kpaan wunba ki u loonɔe, ki wa gaar wunba ki teenɔ u bik na, li yɔɔe ki u daar u tubir.”

⁷ Yabit i fardinu ni kaman nan bik nba tuu di u baa tubdatu fara biaŋinba na. Yennue teeni tubdatu ya tee u waas na paak, kimaan bik kaa ki ki laat tubdatu u baa boor ni.

⁸ Li-i tee ki u ki dat i tuba kaman nan wa tee u waas kur biaŋinba na, ŋann li want nan i tee kpenkiŋmiae, i ki tee u waas kaa.

⁹ Ti baanba nba be tingbouŋ na ni ki tuu daar ti tuba, ki ti teemm nibaakir. Li paak, li ŋan ki ti mantik sikin ti mɔŋ ki tur Yennu wunba tee sei Baa nae, a tin la manfoor.

¹⁰ Ti baanba nba be tingbouŋ na ni jikit yoo waaminna ki daar ti tuba ba loon biaŋinbae, ŋaan Yennu ŋanin daar ti tuba ti mɔŋ sommir paake, a ti binbeŋ-n ŋamm kii yeen kaman nan ŋɔɔ Yennu binbeŋ na.

¹¹ Tubdatu yoo tone, li ki mɔk parpeenni, ŋaan li poorpoewa ki binba dii tubdatu fara na ji tuu la nyɔɔt nba tee parmaasir nan yentinu binbeŋ.

Kpaanii

¹² Li paak, i kakit man i dunkpeena ni, ki chekin i nii nba baŋ na man,

¹³ kii tɔɔk sɔnu nba took, ki wunba ki u taa wɔb-n la laafia ŋaan daa kpeti.

¹⁴ Yabit kii mɔk parmaasir i leeb sinsuuk ni, kii mɔk binbenyeeŋ, kimaan sɔɔ-i kii mɔk ŋann, li yɔɔ tan kan la ti Yomdaanɔ.

¹⁵ Guut i mɔŋ man ki tan daa kɔŋŋit Yennu ninbatinu na. I sɔɔ daa mɔk tonu u par ni, ki u tonu na-n baar nan parbiir leeb paak, ki biir niburchiauŋi.

¹⁶ I sɔɔ daa tuun bonchonchonn toona amii ki gorii Yennu barii yann kaman nan Esɔ wunba din jii u saakatuk ki daa jeet ki dii taar yomm na.

¹⁷ I mi nan li poorpo u din tan loon wun gaar u baa mɔsonŋann ki mɔ nan ninnyuut ŋaan la yêtu, kimaan u ji din ki la sɔnu nba ki u sa teen ki lebit wa poŋ din biir linba na.

¹⁸ Tɔn, yimm ki baar bonsiar nba ki i sa fit siir kaman nan Israel teeb nba din baar Sainai jɔɔr boor na kaa, siaminba ki mupeuŋ din di ki bunbɔnn bɔnn, ki wounpaaruk daa,

¹⁹ ki kikaak bui, ki kunkɔr pak labaar. Ba din gbat li kunkɔr yoonba bi din jak baruŋo ki ji ki loon li kunkɔr-n pak pukini.

²⁰ Kimaan sennu nba ki bi gbat na, paak bi niiwa. Li din yet a, “Bonkobsiɔk gbaa-i lekii sii jɔɔr maŋ, bin jaatɔ tana ki kpiu.”

²¹ Li boor ni din mɔk jaŋmaansooruk bonchiann, ki Moses din yet a “Jaŋmaanii mɔkin, ki n gbanu jekir.”

²² Ŋaan yimm ŋanin baar jɔɔr nba yaa sann yi Sion, linba tee manfodaanɔ Yennu doo nba tee Yendɔuŋ ni Jerusalem, siaminba ki malakanba tusa tusa lakin nan parpeenn.

²³ Yimm tan baar niib nba ki Yennu teemm u waas na boore, ki bi sana sɔb Yendɔuŋ nie. I baar Yennu nba tee nisaarik kur barbuurɔ na boor ni, nan popeendamm nba ki Yennu te ki bi sei be fanu na boor nie.

²⁴ I baar Yisa, wunba tee sindantinnɔ ki baar nan Yennu mɔlorpaann na boore. I baar Yisa boor, ki u sɔn nba din nyii u ni na want barii nba ŋan ki gar Abel sɔn.

²⁵ Li paak, i mi man ki i yêt wunba kpaani na mɔb, kimaan Israel teeb nba din yêt wunba din kpaamm tingbouŋ na ni mɔb na, u din tan ki nyik bi tubdatu; ki ti-i yêt u kpaanii nba nyii Yendɔuŋ ni na, ti tan sa teen nlee ki nyi tubdatu ni?

²⁶ Li yoo na, u kunkɔr din nik tingbouŋ nae, ŋaan mɔtana u senn mɔsonn ki yet a “N ji kan nik tingbouŋ na kuukɔɔ kaa, ŋaan n ji tan sa nik tingbouŋ na nan sanpaapoewa mun.”

²⁷ Mɔbona nba yet a, “N ji tan” na, li fiit want nan bonnankaa kur tan sa nik ki yaat bot li binbeboore, ŋaan ki linba tan kan fit nik na ŋanin-n tan sa biar li boae.

²⁸ Li paak, ta gaar naan nba kan mi ki nik na paak, yi ŋaan ki tii teen Yennu niipoouk man, ki jiantɔ nan nibaakir nan jaŋmaanii ki u numm-n gboo,

²⁹ kimaan Yennu maŋ tee kaman nan mudikau nee.