Hiibru teeb 11 - Yennu Gbounpaauŋ Mɔɔr

Yada labaar

¹ Yada tee, ta ki mɔk birsuk nan bont nba ki ti mɔk dindann li paak na set be ŋaan daa ki lar nan ti ninbinn nee.

² Yennu din pak yaayoo ni niib na bi yada paake.

³ Ti yada paake ki ti bann nan Yennu mɔmaame din nan dunia na, ki ta laat bona nba na u din ki jii bonsiar kaa ki nanni.

⁴ Abel yada paake ki u din mann mannu tur Yennu ki li mannu ŋan ki gar Keenn yar. U yada paake ki Yennu din pakɔ ki purɔ yentinɔ, kimaan ŋɔɔ Yennu tiauŋ din gaar u piinii nawa. Abel din kpowa, ŋaan u yada paake ki u bia lek daa piak.

⁵ Enok yada paake ki u din tan ki kpo, ŋaan ki Yennu din jiiu ki doo nanɔ Yendɔuŋ ni, ki sɔɔ ji ki lau; kimaan Yennue poŋ din jiiu. Ki li sɔb Yennu gbouŋ ni a yoo nba ki Yennu daa din ki jiiu na, ŋɔɔ Yennu numm din gboouwa.

⁶ Nirɔ-i kii teen Yennu yada, li yɔɔ kan fit penn ŋɔɔ Yennu par ni, kimaan wunba kur baat Yennu boor ni, li kpaa talas ki li yɔɔ-n teen yada nan Yennu set be ki teen binba loonɔ na nyɔɔt.

⁷ Nowa yada paake din te ki u gbat Yennu kpaanii, barii nba ki u daa din kan fit lar nan u nunbinn na po. U din sak Yennu mɔb ki kpaa ŋarungbeŋŋir ki ŋɔɔ nan u ŋaateeb kɔɔ leŋ ki tinna. Ŋanne din wann nan tingbouŋ na niib mɔk biit; ŋaan ki u yada maŋ paak ki Yennu din purɔ yentinɔ.

⁸ Yada paake din te ki Abraham sak Yennu yiinii ki saan tiŋ nba ki Yennu din senn mɔsonn ki yaa a u sa turɔ na ni. U din nyik u mɔŋ dooe ŋaan ki ki mi wa saa siami.

⁹ U yada paake ki u din daa tee saamɔ tiŋ nba ki Yennu din senn mɔsonn ki yaa a u sa turɔ na ni. U din be bonkobgbant lanbont nie; u waas Aisak nan Jakɔb nba din tan gaar Yennu mɔsonn na mun din be li biaŋe.

¹⁰ Kimaan Abraham din guu a wun tan kɔɔ Yennu nba din bɔɔn doo nba ki maa na, ki li doo tee linba sii yɔɔ ki be.

¹¹ U ŋaapoo Sara mun din kpeta ki ji kan fit mari, ŋaan ŋɔɔ Sara yada paake ki u din tan soor poor ki mar, kimaan u mi nan Yennu nba senn mɔsonn na tee barmɔnii daanɔe.

¹² Li paak, Abraham nba din tee nirɔ nba ji tan ki fɔk nan kuun na, ŋaan u kuukɔɔ yaaboonae tan yab kaman nan ŋmaabira nba yab biaŋinba na, ki bia yab kaman nan mɔkgbeŋŋir tanbiinii nba yab ki kaa kann biaŋinba na.

¹³ Niib nba na kur din tuu tan kpo nan bi yada ŋaan daa ki gaar Yennu nba din senn mɔsonn linba a u sa turib na, ŋaan bi yada maŋ paak, bi din dɔŋ lar banfɔkirewa, kimaan bi din bann ki sak nan bi tee saamme ki tee nitintaaka tingbouŋ na ni.

¹⁴ Niib-i yeen linba na, li set fiit ki want nan bi lek daa gorii bi tiauŋ digbann siar poe.

¹⁵ Ki niib maŋ baka din kaa ba poŋ din nyii digbansiar nba na po kaa. Bi-i diŋŋi biar dukii li po, bi din bo sa fit ŋmata.

¹⁶ Ŋaan bi baka din be Yendɔuŋ ni digbann nba chee na poe. Ki li paak Yennu mɔk yuugontir nan bin yiinɔ bi Yennu, kimaan u poŋ din ŋamm dosaue ki guumm.

¹⁷ Yoo nba ki Yennu din bikin Abraham na, u yada paake biak ki u din jii u bija Aisak, a wun mann mannu ki tur Yennu. Gotir, ŋɔɔ Abraham nba din gaar Yennu mɔsona maŋ na, u tiauŋ bia din jii u bijayemmir a wun mann mannu tur Yennu.

¹⁸ Ki Yennu din poŋ yetɔ a, “Aisak nie ki a tan sa la yaaboona nba ki n din senn mɔsonn a n sa tura na.”

¹⁹ Ki Abraham ji din bann nan Yennu fit fiint niib kuun ni; ki li set din tee kaman nan Abraham din gaar Aisak kuun nie.

²⁰ Aisak yada paake din te ki u senn mɔsonŋann nba yaa lin tan baar Jakɔb nan Esɔ paak na.

²¹ Yoo nba ki Jakɔb din yaa wun kpo na, u yada paake din te ki u senn mɔsonŋann Josef bonjai na paak, ki din tan diin u patu ki jiant Yennu.

²² Josef manfoor nba din tan yaa lin gbenn yoonba na, u yada paake ki u din pak Israel teeb nyinu po Ijipt tiŋ ni, ŋaan din wannib ba tan sa teen u kpaba biaŋinba.

²³ Moses baa nan u naa nba din marɔ yoonba ki la ki u fan bonchiann na, bi yada paak ki bi din bɔrɔ ki tan jaŋ ŋmaarii ŋanntaa, ki din ki jee bat sennu na.

²⁴ Moses nba din tan kpaat yoonba, u yada paake ki u din ki sak bii yiu Bat Faro na bipoo bija.

²⁵ U din sak nan wun di fara nan Yennu niibe ŋaan ki ki sak toonbiit parpeenn nba tee waaminna na.

²⁶ U din dukin a bi-i sukiiɔ Masia paak, li mɔk nyɔɔt bonchiann ki chee Ijipt tiŋ ni mɔkint kura, kimaan u ninbinn din kpaa nyɔɔt nba baat na paake.

²⁷ Ŋɔɔ Moses yada paake din te ki u nyii Ijipt ki ki jee bat na wutoor jaŋmaanii, ŋaan lek saa tɔɔnn kaman nan u la Yennu nba ki sɔɔ ki laatɔ nan ninbinn na.

²⁸ U yada paake din te ki u din piin yukitgar jaamm, ki din senn sennu a bin mii sɔn bi ŋei tammɔi paak, ki kuun malaka na tan daa kpi Israel teeb bijakpera.

²⁹ Israel teeb yada paake ki mɔkgbenmuŋ na din bɔkit ki teen tinkooŋ ki turib ki bi poot, ŋaan ki Ijipt teeb mun din yabir bi mɔŋ a bin poot, ki mɔkir maŋ nyun na jiin mubin ki diib.

³⁰ Israel teeb nba din tan baar Jeriko yoonba, bi yada paake ki bi din somm lint li joona daa ŋannlore, ki li baa.

³¹ Poochonchonn nba ki bi yiu Rahab na yada paake din te ki Israel teeb din ki kpiiu, ŋaan kpii binba din ki gbat Yennu mɔb na, kimaan Israel teeb niib nba din baar a bin diis doo maŋ ni na, u din gaarib saauŋ.

³² N bia beti siab labaar pukinii? Yoo-i bo-i yab, n bo sa beti Gideon labaar, nan Barak labaar, nan Samson labaar, nan Jefta labaar, nan David labaar, nan Samuel labaar, nan Yennu sɔkiniinba labaawa.

³³ Bi yada paak ki bi siab din kɔn ki nyann tinii, ki siab mun tun linba tee fanu, ki siab mun gaar Yennu mɔsona, ki siab soor yambɔra mɔi,

³⁴ ki siab mun kpeen mupeuŋ, ki siab tin nyii jukbanjai kuun ni. Ki siab mun din tee tariie ŋaan din tan kpant paarib, ki siab mun din took tɔb nan paŋ ki te ki lanjimanbasaamm tin chiar.

³⁵ Ki poosiab din la bi nikpiimm nba din kpo na fiir kuun ni. Ki siab nba din teen Yennu yada paak, ki niib boob ki kpiib, ki bi ki yêt Yennu weiu a bin nyi kuun maŋ ni, kimaan bi loon bin fiir kuun ni ki la manfoor nba chee.

³⁶ Ki niib din daan siab nyatuk, ki bia boob kpaasir; ki bi baan bi siab nan jarit, ki jiib saan kɔɔmm dansarii ni.

³⁷ Bi din jaat bi siab tanae, ki ŋma bi siab ki poriib; ki bi jikit jukbanjai ki kpi bi siab; ki leeb din lia pegbant, ki leeb bia lia bugbant ki lin nan namu, ki niib mukisib ki dintib fara biak.

³⁸ Tingbouŋ na teeb din ki jaŋ nan bii be nammi. Ki bi din lin yeek kunkoot paak nan jɔɔt ni, ki lin dɔɔ tanfiat nan fɔrii ni.

³⁹ Binba na kur yada paake ki Yennu din pakib, ŋaan ki bi din ki gaar linba ki u din senn mɔsonn a u sa turib na,

⁴⁰ kimaan ti paake ki u din mantik dukii bonsiar nba chee na po, ŋanne tee a u sa te ki timm nan ŋamm-n tan lakin tee binba be fanu nan barmɔnii.