Hiibru teeb 10 - Yennu Gbounpaauŋ Mɔɔr

¹ Juu teeb sennu na din tuu tee Yendɔuŋ ni bonŋana ninnauŋ nba din be sɔnu ki baat nee, ŋaan li din tuu ki tee li mɔŋ mɔŋ kaa. Li paak, binn kur marouŋ nba din ki gbent na kan fit teen binba baat nan marouŋ na fanu.

² Li marouŋ-i bo-i fit ŋamm bi para, bi din bo sa mann yomkɔɔe ŋaan ji nyik, ki biit ji kii waabi.

³ Ŋaan binn-n tuu binn marouŋ toona na kpan din tian niib na bi biit poe.

⁴ Kimaan naajai nan buunii sɔn na kan fit nyinn biiti.

⁵ Li paak, Masia nba din yaa wun sik tingbouŋ na ni yoonba na, u din bet Yennu a “A ki loon marouŋ nan piinii kaa, ŋaan a ŋamm gbanansiare ki turin.

⁶ A ki mɔk parpeenn nan bonkobit nba ki bi mann marouŋ ki jokitir muu, biit paak na.

⁷ Li paake te ki n din yet a ‘Yennu, mine na, n sa tun a loomm kaman nan la sɔb a gbouŋ ni ki yet n po biaŋinba na.’ ”

⁸ Sinsinn, u din yet a “A ki mɔk parpeenn nan marouŋ nan piinii, nan bonkobit nba ki bi mann marouŋ ki jokitir muu na, nan marouŋ nba ki bi tuu mann biit paak na kaa.” Bi din tuu mann marouŋ maŋ kura kaman nan sennu nba wann biaŋinbae.

⁹ Li poorpo ki u bia yet a “Yennu, mine na, n sa tun a lomma.” Li paak, Yennu faa kpeen mannkpera kura, ŋaan jii Masia marouŋ na ki senn li setu ni.

¹⁰ Yisa Masia din tun linba ki Yennu loon wun tun na, ki jii u gbanant ki mann marouŋ yomkɔɔ ki te ki ti teen Yennu niib.

¹¹ Mannbooryeŋ nba ki Juu teeb mantɔɔ kur tuun daar-n tuu daar na kan fit nyinn biiti.

¹² Ŋaan Masia ŋanin din mann marouŋ yomkɔɔe, linba mɔk yikoo yoo kur biit paak, ŋaan ŋmat doo Yendɔuŋ ni ki kar Yennu nuudiitu po.

¹³ Leŋe ki u be ki guu mɔkmɔk nan Yennu nba tan sa dinn u datai tiŋ ni.

¹⁴ Li paak, ŋɔɔ din mann marunyemmire ki te ki binba ki u nyinnib biit ni na be fanu yoo nba kaa gbennu.

¹⁵ Ki Yennu Seyeeŋ mun bia teent u siara a

¹⁶ “Yennu yet a ‘Ma yaa n turib mɔlor nbae na daar maŋ poorpo; n tan sa teen n sennii bi para ni, ki sɔbir bi dudukit ni. ’ ”

¹⁷ Li poorpo ki u bia ŋamm yet a “N ji kan mi ki tiar bi yanbɔmm nan bi biit po jikii.”

¹⁸ Yennu nba nyik chab biit na, u ji ki loon marunsiar biit paaki.

Yi ŋaan ki tin chat nakin Yennu boor ni man

¹⁹ N naa waas, Yisa kuun maŋ paak ti mɔk parcheenn nan ki tin kɔɔ boor nba tee Yennu yar nan barmɔnii na ni.

²⁰ Yisa gbanant, linba tee sɔnpaanu nan sɔnu nba mɔk manfoor nae loot tammɔb maŋ.

²¹ Ti mantɔjaann nba yen Yennu ŋaak maŋ na paak,

²² yi ŋaan ki tin chat nakin Yennu boor ni man nan para nba be fanu, nan barmɔnii yada, ki daa mɔk birsuku, nan ti para nba ki Yisa sɔn nyinn dudukbiit li ni na, ki jii ti gbanant nba ki ti din wuur nan nyun nba kaa jakint na.

²³ Yi ŋaan ki tii mɔk dindann nba ki ti fiit wann na fanu man, ki daa birisi, kimaan wunba din senn mɔsonn ki turit na tee barmɔnii daanɔe.

²⁴ Yi ŋaan ki tin yabir ki fiin leeb loomm nan bi toonŋana,

²⁵ ki daa nyikit lakina nan ti leeb kaman nan nisiab nba nyikit lakinu biaŋinba na, ŋaan i sommit leeb man, ki mantik tee ta ji laat ki ti Yomdaanɔ daar maŋ nyarii naki biaŋinba na paak.

²⁶ Ta bann barmɔnii maŋ nba fiit wannit na, ti-i biakii ŋammit tuun toonbiit, marunsiar ji kaa ki sa wuur ti biit maŋi.

²⁷ Linba ji biar tee buut bunu nba mɔk jaŋmaaniie, nan muchiauŋ nba baat ki tan sa biir binba yêt Yennu na.

²⁸ Wunba din tuu yêt Moses sennu na weiu, ki niib bann ki teen siaradamm bannlee amii ki gar niib bannlee, bi din tuu kpiu, ki ninbatinu kaa.

²⁹ Li paak, nirɔ nba fiak Yennu Bija maŋ ki ki baakit sɔn nba ŋamm Yennu mɔlor ki nyinnɔ u biit ni na, ki sukii burchinseyeeŋ na, bikint li yɔɔ nba tan sa jaŋ nan tubdatbiiuk nba.

³⁰ Kimaan ti mi wunba din yet a “Mine sa pa pann ki jiin biit.” Li bia sɔb a “Ti Yomdaanɔe tan sa bu u niib buut.”

³¹ Li tee bonbilankante ki sɔɔ-n tan kɔɔ manfodaanɔ Yennu wutoor ni.

³² I tian man yoo nba gar na labaar; Yennu yentu nba din yent i paak yoonba, i din di fara bonchiann, ŋaan li farsiar din ki nyanniini.

³³ Sianyoo ni bi din tuu sukii-i paanu ni, ki daamii bonbiir, ki sianyoo i din tuu tan teen siir nan yin pukin binba ki bi din tun nna maŋ paak ki di namm nan li farawa.

³⁴ I din mɔk ninbatinu nan binba be dansarii ni; ki sianyoo bin din tan fat i yent, ŋaan ki i lek mɔk parpeenn, kimaan i mi nan ya bia mɔk yent nba chee ki ki mɔk gbennu yaayoo.

³⁵ Li paak, i daa nyikit yabiru mani, kimaan i yabiru na baat nan nyɔchiauŋo.

³⁶ Li ŋan ki yii mɔk sukuru, ki fit tun Yennu lomm na, ki la wa din senn mɔsonn a u sa turit linba na.

³⁷ Li sɔb Yennu gbouŋ ni a “Li tenn yoo waaminnae ki wunba baat na sa baar, ki kan yukir nan baaru.

³⁸ Ŋaan n niŋamm na ŋanin tan sa teenin yada kii waan; ŋaan bi yenɔ-i ŋmat poor, n tan kii mɔk parpeenn nanɔ.”

³⁹ Timm ki tee nisiab nba ŋmat poor ki baa yann kaa, ŋaan ti teen Masia yada ki u tinnit.