Hiibru teeb 1 - Yennu Gbounpaauŋ Mɔɔr

Yennu nba turit u mɔmaan u Bija Yisa ni biaŋinba labaar

¹ Yaayoo ni, ki Yennu din jikit yoo bonchiann nan sɔnii bonchiann ki te ki sɔkiniinba piak teen timm Juu teeb yejamm;

² ŋaan mɔtana u te ki u Bija nba ki u gannɔ a wun yent bonsiar kur na poŋ pak nan timm; ki u din te ki u Bija maŋ nan dunia kur.

³ Ŋɔɔe tee Yennu mɔŋ mɔŋ ninnauŋ, ki yentir Yennu yentu na, ki dia dunia yaka kur nan u mɔmaan nba mɔk paŋ. Wa din tun linba sa te ki niib-n la nyikinchabu bi biit paak yoonba na, ki u ji kar ti yabint Yennu nuudiitu po Yendɔuŋ ni.

Yennu Bija maŋ paŋ labaar

⁴ Yennu nba te ki u Bija maŋ sann gbeŋ gar malakanba sana biaŋinba na, nnee ki u Bija maŋ set garib.

⁵ Kimaan Yennu daa ki mi yet malakasɔɔ a “Fine tee n Bija, dinna ki n wann nan n tee a Baa.” Yennu bia ki mi yet malakasɔɔ po a “N tan sii tee a Baa, ki a tee n Bija.”

⁶ Ki Yennu nba din tan yaa wun baar nan u Bija wunba tee bonnankaa yur na tingbouŋ na ni yoonba, u gbouŋ yet u po a “Li kpaa talas ki Yennu malakanba kura-n jiantɔ.”

⁷ Ŋaan malakanba na po ŋanin u din yet a “U te ki u malakanba tee sei, ki bia teemm ki bi tee mupeenu.”

⁸ Ŋaan li yet u Bija na po ŋanin a “Yennu, a naan na sii be nan yoo nba kaa gbennu. Ki yentinu dammir na tee a naan dammir.

⁹ Fa loon yentinu ŋaan nân biit na paak te ki a Yennu na ganna ki tura parpeenn bonchiann ki gar wa tur a yɔɔsinba biaŋinba.”

¹⁰ Li bia din yet a “N Yomdaanɔ, fine din nan tingbouŋ na pinpiik niwa, ki nan sanpaak nan a mɔŋ nii.

¹¹ Bi tan sa kpowa, ŋaan fin lek sii yɔɔ be; bi kur tan sa kpete ki chat chat kaman nan chinchenn na,

¹² ki fan pɔbimm kaman nan baauŋ na, ki bin lebit kaman nan chinchenn na. Ŋaan fin ŋanin kpan sii yɔɔ tee yomme ki a manfoor na kaa joontu.”

¹³ Tɔn, Yennu daa ki mi bet malakasɔɔ a “Karin n nuudiitu po nna na mɔkmɔk ki man tan jii a datai na ki teemm a taakpakta.”

¹⁴ Li paak, malakanba tee bee? Bi kur tee sei nba jiantir Yennue, ki ŋɔɔ Yennu tuumm a bii sommit niib nba la tinnu na.