Galasia teeb 6 - Yennu Gbounpaauŋ Mɔɔr

Jikitir i leeb jikpiata man

¹ N naa waas, li-i tee ki i la ki sɔɔ tun toonbiit, yimm nba be nan Yennu Seyeeŋ na, li ŋan ki yin sommɔ nan loomm sɔnii kur ni, ki wun ŋamm set fanu, kii mi ki bikinu sa te ki i mun bot.

² Yi jii i leeb jikpiata man, ki sak Masia sennu.

³ Sɔɔ-i kii tee siar, ŋaan bikii a u mun tee sɔɔe, u kpann u mɔŋe.

⁴ Li ŋan ki sɔɔ kur-n bikin u mɔŋ binbeŋa, ki fit kii mɔk yuugontir u mɔŋ mɔŋ toonŋana paak, ki daa bikii wa tun linba nan u lɔɔ toona,

⁵ kimaan li kpaa talase nan sɔɔ kur-n tun u mɔŋ toona.

⁶ Nisɔɔ nba ki bi wantɔ Yisa Masia barŋanii na, li ŋan ki li yɔɔ-n mun jii linba ki u mɔk kur ki chent nan u wanntɔɔ maŋ.

⁷ I daa kpann i mɔŋ mani; sɔɔ kan fit kpann Yennu; nisaarik nba bur linba, ŋanne ki u tan sa jaan kpaŋ.

⁸ Wunba bur u mɔŋ gbanant loomm, u tan sa jaan kuume u gbanant loonbiit maŋ paak; ŋaan wunba bur Seyeeŋ nba loon biaŋinba na, u tan sa jaan manfoor nba kaa gbennu, Seyeeŋ maŋ paak.

⁹ Li paak, ti daa bakit nan toonŋana tumu mani, kimaan ti-i kii nyik toonŋana, yoo nba jaŋ na ki ti tan sa gaar li nyɔɔt.

¹⁰ Li paak, ti-i la yaak, ŋaant ki tin tun linba ŋan ki tur sɔɔ kura; ŋaan mantik kii tuun kii teen binba teen Masia yada ki tee u weira na.

Kpaanjoontik nan foontii labaar

¹¹ Tɔn, i la ma sɔb sɔbin gbeŋŋa na nan n mɔŋ mɔŋ nuu.

¹² Niib nba loon bin penn Juu teeb para na, ŋamme mukisi a yin pot i puna, a Juu teeb maŋ daa dintib fara Masia dapunpunn na paaki.

¹³ Binba porii bi puna na mɔŋ ki waa Yennu sennu, ŋaan bi loon ki yin pote ki bii faa japaat i punpotu maŋ paak;

¹⁴ ŋaan min ŋanin kan mi faa japaat see ti Yomdaanɔ Yisa Masia dapunpunn na kuukɔɔ paak; kimaan u dapunpunn maŋ paake te ki n kpii tingbouŋ na niauŋ n gbanant ni, ki tingbouŋ na niauŋ mun nyii n gbanant ni.

¹⁵ Bɔkitu kaa wunba pot u punn nan wunba ki pot u punn sinsuuk ni. Linba ji kpaa talas tee binbenpaaŋ nba ki Yennu turit nee.

¹⁶ Parmaasir nan ninbatinu-ii be binba kur waa wannu nba na paak; bi tee Yennu niibe.

¹⁷ I mi man ki sɔɔ-n ji turin farsiar, kimaan n poŋ mɔk fara dɔkit n gbanant paak, ki li want nan n tee Yisa daabire.

¹⁸ N naa waas, ti Yomdaanɔ Yisa Masia-n sommi, i para ni. Mɔmɔmm.