Galasia teeb 4 - Yennu Gbounpaauŋ Mɔɔr

¹ Tɔn, n bia ŋamm yeen a ŋaak bik nba lek tuu ya wun tan di u baa faar na, ŋaan yoo nba ki u daa tee bonbunn na, bi daa tuu diau kaman nan daabir nee.

² Yoo nba ki u tee bonbunn na, nisiabe tuu diau ki wubiɔ mɔkmɔk nan wa tan sa beer jɔɔ, ki jaŋ yoo nba ki u baa din senn na.

³ Ti mun tee nnee; yoo nba ki ti din tee kaman nan bonbunna Yennu sɔnu ni, dunia nna seek paŋe din tuu diat.

⁴ Ŋaan yoo nba din tan jaŋ na, ki Yennu tun u mɔŋ mɔŋ Bija, ki poo din marɔ, ki u din be Juu teeb sennu ni,

⁵ a wun tinn binba din tuu be sennu maŋ ni na, a tin kpant Yennu waas.

⁶ Ta tee u waas na paak, ki u tun u Bija maŋ Seyeeŋ na ki u be ti para ni, ki ti yi ŋɔɔ Yennu a “N Baa, n Baa.”

⁷ Li paak, a ji ki tee daabir kaa, ŋaan a ji tee Yennu bike; ki fa tee u bik na paak, u mun sa tura linba kur ki u mɔk ki teen u waas.

Pɔɔl baka nba be Galasia teeb ni biaŋinba

⁸ Sianyoo i din tuu ki mi Yennu, li yoo i din tuu tee daaba ki tur linba set ki tee Yennue,

⁹ ŋaan mɔtana i bann Yennuwa, ki Yennu mun mi-i, li jin teen nlee ki i loon ki i ŋmat tunn ki wei bonsiar nba ki mɔk yaak nba sa sommi na boor ni? Bee teen ki i jin loon ki i bia kpant bi daaba?

¹⁰ I mantik ŋaan ki i baka be dagannkaa ni, nan ŋmaagannkaa ni, nan sakgannkaa ni, nan bingannkaa ni bonchiann.

¹¹ Ŋanne te ki n mɔk jijeet i paak nan ma tun linba kur turi na biar yanne na.

¹² N naa waas, n barimiie, yii naan kaman nan min na man, kimaan n mɔŋ mun ji naan kaman nan yimm nee. I ki tun siar biirimi.

¹³ Ma din yiar na paake din te ki n mɔɔnt barŋanii sinsinn ki turi.

¹⁴ Li yoo maŋ ki n gbanant din ki maŋi, ŋaan i lek din ki yêtimi; i lek din gaarin kaman nan ya din bo sa gaar Yennu malaka biaŋinba nee, ki bia gaarin kaman nan ya din bo sa gaar Yisa Masia biaŋinba na.

¹⁵ I din mɔk parpeenn; ki bee te ki i ji ki mɔki? N mɔŋ sa yet nan li-i diŋŋi bo-i sa fit, i din bo sa sak ki nyinn i mɔŋ ninbina ki turima;

¹⁶ ki mɔtana, ma beeri barmɔnii na, n ji kpant i dataakee?

¹⁷ Nisiab bikii a bi mɔk loomm bonchiann i paak, ŋaan bi dudukit ki ŋani. Bi lorin a bin bɔkit min nan yimme, ki yin tunn kii waa bi kuukɔɔ.

¹⁸ Nirɔ baka-i be sɔnŋanu ni yoo saaka, li ŋan, mi-i lekii be i boor ni amii mi-i kaa.

¹⁹ N walonkai, li yiarin bonchiann i paak mɔkmɔk nan yoo nba ki Masia binbeŋ na tan sa gbee i ni.

²⁰ N yan ni ŋmat i paake. N bo summan ki n be i boor ni mɔtana ki lek ŋamm jii n binbeŋ nba sɔ ki turi.

Bibiiuk nba jiin Sara nan Hagar po

²¹ Yimm nba loon ki i be sennu ni na, i ki gbat sennu maŋ nba yet biaŋinba-aa?

²² a Abraham din mɔk bonjai bannlee; ki bi yenɔ naa din tee daabire, ki lɔɔ naa mun din tee pookuur poo.

²³ Ki daabir na din mar u bonjabik kaman nan niib nba maar biaŋinba nee, ŋaan ki pookuur poo na mar u bonjabik kaman nan biaŋinba ki Yennu din senn mɔsonn turɔ na.

²⁴ Bi poob bannlee na see Yennu mɔlora ŋannlee na setu nee. Daabir maŋ sann din tee Hagar; ki u see mɔlor nba ki Yennu senn Sainai jɔɔr paak na setu ni, ki din mar u bik daabsin ni,

²⁵ kimaan Hagar see Sainai jɔɔr nba be Arabia tiŋ ni setu nee, ki ŋman nan tingbouŋ na ni Jerusalem na, ki ŋɔɔ nan u waas tee daaba,

²⁶ ŋaan sanpaapo Jerusalem na tee yentinmɔŋ doo, ki bia tee ti naa;

²⁷ kimaan li sɔb Yennu gbouŋ ni a “Yimm pookanmata, yii mɔk parpeenn! Yimm nba ki mi matyiaru tonu na yii yiin parpeenn yanii man! Kimaan poo nba be u kuukɔɔ tan sii mɔk waas bonchiann ki gar poo nba sɔrɔ daa ki mi gɔrin nyikɔ.”

²⁸ Tɔn, n naa waas, timme mun tee Yennu mɔsonn waas kaman nan Aisak nba din tee biaŋinba na.

²⁹ Ba din mar bonjabik nba kaman nan niib nba maar biaŋinba na din tuu mukis wunba ki bi din marɔ nan Seyeeŋ yikoo ni, ki li mun bia lek tee nnee nan mɔtanawa.

³⁰ Ŋaan li sɔb nlee Yennu gbouŋ ni? Li sɔb a “Berin poo nba tee daabir na nan u bonjabik na, kimaan daabir bonjabik na daa mi lakin di bi baa maŋ faar nan pookuur poo bonjabik na.”

³¹ N naa waas, ma yeen linba tee a ti ki tee poo nba tee daabir na waas kaa, ŋaan ti tee pookuur poo na waase.