Galasia teeb 3 - Yennu Gbounpaauŋ Mɔɔr

Yada nba gar sennu biaŋinba

¹ Yimm Galasia teeb, bonjatana! Yimm nba poŋ mi Yisa Masia dapunpunn paak kuun po nyik nyik na, ŋmee jin tan kpanniini?

² I betin bonyennkɔɔ man, ya din tuun sennu na toona paake din te ki i gaar Yennu Seyeeŋ amii ya din gbat barŋanii na ki teen yada na paake din te ki i gaarɔ?

³ Bee te ki i ki mɔk yami? I din piin Masiaweiu nan Yennu Seyeeŋ paŋe; bee ki i ji tan loon yin gbenn nan i mɔŋ mɔŋ paŋi?

⁴ Ya din la Yennu yaarlituk toona nba na kura kaa nyɔɔt nan waama i boorii? N dukin nyɔɔt be li paak.

⁵ Ya din tuun sennu toona na paake te ki Yennu turi Seyeeŋ ki tuun yaarlituk toona i sinsuuk ni amii ya gbat barŋanii ki teen yada na paake?

⁶ Li sɔb Yennu gbouŋ ni a “Abraham din teen Yennu yada, li paak, ki Yennu din yet a u tee niŋanɔ u boor.”

⁷ Ŋanne want nan niib nba teen Yisa yada na, ŋamme tee Abraham yaaboona.

⁸ Ki li bia sɔb Yennu gbouŋ ni a ŋɔɔ Yennu din poŋ mi nan u tan sa yet a binba ki tee Juu teeb mun tee niŋamm u boor bi yada paak. Ŋann paake ki u poŋ din yet Abraham barŋanii maŋ a “Fin paake ki n tan sa teen mɔsonŋann nisaarik booru kura paak.”

⁹ Li paak, Yennu tee mɔsonŋann binba teenɔ yada na paak, kaman nan wa din teen mɔsonŋann Abraham nba din teenɔ yada na paak.

¹⁰ Binba waa sennu ki dukii a sennu na sa tinnib na, Yennu mɔtomm be bi paak, kimaan li sɔb Yennu gbouŋ ni a “Wunba ki waa sennu kur nba sɔb gbouŋ maŋ ni na, Yennu mɔtomm be u paak.”

¹¹ Ŋanne want fanu nan sennu dianu kan fit te ki nirɔ-ii tee niŋanɔ Yennu boor ni, kimaan li sɔb Yennu gbouŋ ni a “Wunba teen Yennu yada ki Yennu yeen a u tee niŋanɔ u boor, li yɔɔ yada paak, u sii mɔk manfoor nba kaa gbennu.”

¹² Ŋaan sennu dianu nan yada teenu bɔkita; kimaan li sɔb Yennu gbouŋ ni a “Daanɔ nba waa sennu kur fanu sii mɔk manfoor.”

¹³ Ŋaan ti din be Yennu mɔtomm nie, kimaan ti kan fit wei sennu fanu, ŋaan Masia tiauŋo din gaar ti paak ki din be mɔtomm maŋ ni ki nyinnit li mɔtomm ni, kimaan li sɔb Yennu gbouŋ ni a “Wunba ki bi kpaau dapunpunn paak na, Yennu mɔtomm be u paak.”

¹⁴ Yisa Masia din tun linba na a ŋɔɔ yaa paak ki binba ki tee Juu teeb-n mun la mɔsonŋann nba ki Yennu din senn Abraham paak; a ti-i teen yada tin gaar Seyeeŋ nba ki Yennu din senn mɔsonn a wun turit na.

Sennu nan mɔsonn labaar

¹⁵ N naa waas, ŋaant ki n jii nisaarik nan u lɔɔ binbeŋ ki bikin ki yin bann linba ki n beeri na paak: niib bannlee-i sak lor a bin tun siar ki pot mɔɔnu nan leeb, bi yenɔkɔɔ ji kan fit nyi u lɔɔ na poorpo nan waama.

¹⁶ Yennu nba din tur Abraham nan u yaaboonn u mɔsona maŋ yoonba, u din ki yet a “A yaaboona” kaa, ŋaan u din yet a “A yaaboonn yenɔkɔɔ,” wunba tee Masia.

¹⁷ Ma want linba tee nnee: Yennu din senn mɔsonjaann; ki sennu nba din tan baar bina kobii ŋanna nan piinntaa poorpo na, li din kan fit kpeen Yennu mɔsonn maŋi.

¹⁸ Kimaan li-i tee sennu dianu paake ki Yennu teen niib u piinii, ŋann li wann nan u bo kan sak tur sɔɔ piinii u mɔsonn paak; ŋaan li din tee Yennu mɔsonn paake ki u tur Abraham u piinii maŋ.

¹⁹ Li-i bo-i tee nnaie, sennu na nyɔɔt tee bee, ŋann amii? toonbiit paake, ki Yennu din tur nifosaarii sennu na ki pukin u mɔsonn na paak, ki din loon a sennu maŋ-ii diab mɔkmɔk nan yoo nba ki Abraham yaaboonn nba ki Yennu din senn mɔsonn ki turɔ na tan baar. Ki malakanba din jii sennu maŋ ki teen nisaarik nuu ni a u tee sɔkintɔɔ,

²⁰ ŋaan Yennu tiauŋo din tur Abraham u mɔsonn maŋ, li din ki tee sɔkintɔɔ kaa turɔ.

Sennu nyɔɔt labaar

²¹ Tɔn, ŋanne want nan sennu na kɔn nan Yennu mɔsona-aa? Aaii, li ki want nna kaa; ŋaan Yennu-i bo-i senn sennu nba sa fit teen nirɔ manfoor, u bo sa yet a niib tee niŋamm u boor sennu maŋ weiu paaka.

²² Ŋaan li sɔb Yennu gbouŋ ni a sɔɔ kur saaka mɔk biite, a Yennu-n tur binba teen Yisa Masia yada na piinii nba ki u din senn mɔsonn a u sa turib na; bi yada maŋ paake ki u sa turib.

²³ Sennu na din tuu diat kaman nan dansarii nee ki tan baar yoo nba ki Yennu fiit yada teenu labaar ki wannit na.

²⁴ Li paak, sennu na din ŋman ti yomdaanɔ nba diat mɔkmɔk nan yoo nba ki Masia tan baar a tin teenɔ yada ki Yennu-n yet a ti tee niŋamm u boor nee.

²⁵ Ŋaan mɔtanae ti teen Masia yada; li paak, sennu ji ki tee ti yomdaanɔ.

²⁶ Ya teen Yisa Masia yada ki be u ni na, ŋann paake ki i tee Yennu waas.

²⁷ Yimm nba ki bi din wuri Yennu nyunwuru Masia sann ni na, yimme gaar u mɔŋ mɔŋ binbeŋ.

²⁸ Li paak, bɔkitu ji ki be binba tee Juu teeb nan binba ki tee Juu teeb sinsuuk ni, li bia ki be binba tee daaba nan yentinmɔŋ damm sinsuuk ni, li ki be poob nan jab sinsuuk ni; ya be Yisa Masia ni na paake te ki i kura tee yenɔkɔɔ.

²⁹ Ki i-i tee Masia yabie, ŋann i tee Abraham yaaboonae, ki tan sa gaar piinii nba ki Yennu din senn mɔsonn a u sa turib na.