Galasia teeb 2 - Yennu Gbounpaauŋ Mɔɔr

Pɔɔl nan toomiinba leeb labaar

¹ Tɔn, li bina piik nan ŋanna poorpoe, ki min nan Banabas din ŋmat saan Jerusalem, ki n jii Taitus mun;

² Yennue din fiit li sɔnu saanu paanu ni ki wannin, li paake te ki n saan. Leŋe ki n yiin saakab na, ti kuukɔɔ, ki wannib ma mɔɔntir barŋanii mɔɔntii maŋ biaŋinba ki teen binba ki tee Juu teeb na, kimaan n ki loon ma poŋ tun linba, nan ma sa tun linba na-n tan biar yann ki nyɔɔt kaa.

³ Tɔn, n tɔknanlɔɔ Taitus tee Griik nirɔe, ŋaan sɔɔ din ki miau a wun kokit u punni.

⁴ Binba be ki fa faak bi mɔŋ paak a bi mun tee Masiaweira na ŋanin din loon ki Taitus-n tun nnawa. Li niib din kɔɔ ti sinsuuk ni woonin ni, a bin bann ta mɔk yentinmɔŋ nba Yisa Masia ni na. Bi loon tii tee Moses sennu daabae,

⁵ ŋaan ta mun loon tin dia barŋanii nan li barmɔnii sɔnu ki turi na paak, ti ki sak turib nan waaminnawa.

⁶ Ŋaan binba ki bi yib saakab na, bi-i tee nijaana amii bi-i kii teeie, li ki kpaa talas min yaa boor, kimaan Yennu ki bikii nan ningannii; ŋamm nba ki bi yib saakab na din ki turin kpaanpaanii.

⁷ Ŋaan ba set la linba n boor ni tee Yennu nba gannin a n mɔɔnt u barŋanii ki tur binba ki tee Juu teeb na, kaman nan biaŋinba ki u din gann Piita a wun mɔɔnt li barŋanii ki tur Juu teeb na.

⁸ Kimaan Yennu paŋ paak, Piita nba din tee toomii ki tur Juu teeb biaŋinba na, nnee ki n mun tee toomii ki tur binba ki tee Juu teeb na.

⁹ Jems nan Piita nan Jɔɔnn mɔŋ nba ki bi yib saakab na, ŋaan bi mɔŋ din bann nan Yennue turin toongannkar na; li paak min nan Banabas nan ŋamm din foont leeb ki yokin ti leeb nii ni, ŋanne din want a ti kura mɔk mɔtaauk nan ti leeb. Timm nan ŋamm din sake a min nan Banabas-ii mɔɔntir barŋanii kii teen binba ki tee Juu teeb na, ki bi mun-ii mɔɔntir kii teen Juu teeb.

¹⁰ Linba yaa kuukɔɔ ki bi din betit li po din tee nnee: a ti daa tammit talasdamm nba be bi sinsuuk ni na po. Li mune ki n set poŋ din loon tumu.

Min Pɔɔl nba din yakii nan Piita biaŋinba

¹¹ Ŋanne ki n din tan yakii nan Piita wa din be Antiok yoo nba na, kimaan u din mɔk biit.

¹² Jems din tun Juu tesiab Antiok doo ni. Ba din daa ki baar yoonba na, Piita nan binba ki tee Juu teeb din lakin di jeet, ŋaan ba tan baar yoonba ki u ji ki sak a u sa di nammi, kimaan u din tiin niib nba teen punkokitu yada nee.

¹³ Li paak, ki Juu leeb na mun piin tuun jaŋmaantoona, ki waa Piita nba din tun linba maŋ, ki Banabas mɔŋ mun ŋmat ki waa bi jaŋmaantoona maŋ.

¹⁴ Ma din la ki bi ki tɔk barŋanii sɔnu maŋ fanu yoonba, ki n bet Piita bi kur numm ni ma “A tee Juu nirɔe, ŋaan a binbeŋ tee kaman nan wunba ki tee Juu nirɔ nee, ŋannii kaa, bee ki a mukisib a bii be kaman nan Juu teeb na?”

Niib sa tinn yada paak

¹⁵ Tɔn, ti tee Juu teeb matiie, ti ki tee niboorgamm nba ki bi yib biitdamm na kaa,

¹⁶ ŋaan ti mi nan see ki nirɔ-n teen Yisa Masia yada, ŋanne sa te ki Yennu-n yet a u tee niŋanɔ u boor; li ki tee ta tuun sennu nba yaa tii tuun linba paak kaa; li paak, ti mɔŋ mun teen Yisa Masia yada a Yennu-n yet a ti tee niŋamm u boor yada maŋ paake, ŋaan li ki tee sennu toona tumu paak kaa. Kimaan Yennu kan yet a sɔɔ tee niŋanɔ u boor sennu maŋ toona tumu paaki.

¹⁷ Li-i bo-i kii tee nnaie, ŋann ŋanin ti-i yabii a Yennu-n yet a ti tee niŋamm u boor Masia paak, ŋaan ti lek bia tee biitdamme kaman nan binba ki tee Juu teeb na. Linba na want nan Masia ki kɔn toonbiit paak amii? Aaii, li ki want nna kaa.

¹⁸ Kimaan mi-i jiŋŋi piin ki sent sennu sɔnu nba ki n din biira naie, ŋann want nan n mɔŋ tee sennu maŋ biirtɔɔe na.

¹⁹ Ŋaan sennu na paak ki n kpo sennu maŋ boor, a mii mɔk manfoor Yennu boor. Li tee kaman nan bi din taan kpaa min nan Masia dapunpunn paak nee.

²⁰ Li paak, li ji ki tee min nba fo na kaa, ŋaan li tee Masia nba fo ki be n ni nee. Mɔtana, ma mɔk manfoor ki be n gbanant ni na, n be ki teen Yennu Bija Masia yada; ŋɔɔe loonin ki din gaar n paak ki kpo.

²¹ N ki te ki Yennu ninbatinu teen yanni; li-i tee ki Yennu bo sa yet a nirɔ nba sak sennu nae tee niŋanɔ u boor, li bo want nan Masia kuun maŋ tee yanne.