Galasia teeb 1 - Yennu Gbounpaauŋ Mɔɔr

^1-2 Min Pɔɔl nba tee Masia toomii, nan ti naa waas nba be nna na kur foont Masiaweira nba be Galasia tiŋ ni. Nisaarik kaa teenin Masia toomii, nisaarii kaa bia tumin, ŋaan ti Baa Yennu nan Yisa Masia nba ki u din fiinɔ kuun ni nee din gannin.

³ Ti Baa Yennu nan ti Yomdaanɔ Yisa Masia-n sommi ki bia turi parmaasir.

⁴ Yisa Masiae din sak ti Baa Yennu loomm ki din kpo ti biit paak a wun fatit tingbouŋ na biit daabsin ni.

⁵ Ŋɔɔ Yennu kuukɔɔe yen dontir nan yoo nba kaa gbennu. Mɔmɔmm.

Barŋanii yennkɔɔe be

⁶ Li bakitime nan ya gaan labagann na yiama, ŋaan nyik Yennu wunba din yiini Masia ninbatinu paak na.

⁷ Nisiab be ki yabii bi mɔŋ a bin lebit Masia barŋanii na ki ŋmat i dudukit; ŋaan barmɔniie, barŋansiar ji kaa.

⁸ Li-i lekii tee Yendɔuŋ ni malaka amii timmi mɔɔnt barŋansiar ki li be li kuukɔɔ ki ki tee ta poŋ din mɔɔnt linba turi na, mɔpor-ii be bi paak.

⁹ Ti poŋ din betiewa, ŋaan n bia ŋammit beerie mɔtana: nisɔɔ-i mɔɔnt labaar ki turi ki li ki tee linba ki i din gaar na, mɔpor-ii be u paak.

¹⁰ N ki yiab ma n gaar nisaarik pinpakit kaa, ŋaan Yennu yare ki n loon, kimaan mi-i loon nisaarik pinpakitie, n bo kan teen Masia daabiri.

Biaŋinba ki Pɔɔl tan teen Masia toomii

¹¹ N naa waas, n yaa n tiari nan barŋanii nba ki n mɔɔnt teeni na ki nyii nisaarik nba din pak linba na ni kaa.

¹² Nisaarik kaa din wannin ki n gaar, ŋaan Yisa Masia mɔŋ mɔŋe din fiit wannin.

¹³ I poŋ gbat ma din tuun biaŋinba yoo nba ki n din waa Juu teeb jiantu na, a n din tuu mukisir Yennu mɔtaauk niib bonchiann, ki yabii n mɔŋ ma n biirib ki gbenn.

¹⁴ Timm Juu teeb jiantu sɔnu ni, mine din gar tɔɔnn ti waakir ni, kimaan n din jii n par kura ki waa ti yejamm kaar nba want linba.

¹⁵ Ŋaan Yennu ninbatinu paak, ki u din gannin ki bi daa din ki marimi, ki yiinin a man tun u toona.

¹⁶ Ki wa din dukin ki nyinn u Bik maŋ paanu ni ki wannin a n mɔɔnt u barŋanii ki tur binba ki tee Juu teeb yoonba, n din ki saan nisaarik boor ni ki saa faa sɔɔ baani.

¹⁷ N bia din ki saan Jerusalem ki saa la binba din dɔŋ teen toomiinba nanin na, ŋaan n din fiire li taakpaak ni ki saan Arabia tiŋ ni; li poorpoe ki n ŋmat saan Damaskus doo ni.

¹⁸ Ki bina ŋanntaa poorpoe ki n din tan saan Jerusalem ki foont Piita, ki din biar u boor ni daa piik nan ŋaŋŋmu.

¹⁹ Li-i kii tee ti Yomdaanɔ Yisa naa bik Jemsi kaa, ŋaan n din ki la toomiinba na sɔɔ.

²⁰ Yennu mɔŋ mi nan ma sɔb linba na tee barmɔniie ki faak kaa leŋi.

²¹ Li poorpoe ki n din saan Siria nan Silisia tinii ni,

²² ŋaan li yoo na ki Masiaweira nba be Judea tiŋ ni na din ki mimi.

²³ Ba din mi linba din tee bi leeb nba din yeen a “Jɔɔ nba din tuu mukisirit na mun ji dia barŋanii nba ki u din yaa wun biir nee ki mɔɔntir teen niib.”

²⁴ Ki bi din piak Yennu n paak linba na po.