Filipi teeb 4 - Yennu Gbounpaauŋ Mɔɔr

Kpaanii labaar

¹ Li paak, n naa waas, yimm nba ki n looni, ki loon ki n lai na, yimme te ki n mɔk parpeenn nan yuugontir. N naa walonkai, setir fanu man Yennu sɔnu ni, ti Yomdaanɔ tɔɔnn.

² N niipoob Yuodia nan Sintike, n barimiie, yii yabir kii be nan parmaasir nan i leeb ti Yomdaanɔ paak.

³ Ki fin nba mun tee n weinanlɔɔ nan barmɔnii, n loon ki fin somm poob bannlee maŋ, kimaan ŋamm nan Klement nan binba kur tee n toontunleeb ki bi sana be Yennu manfoor gbouŋ ni na din lakin tun nanin bonchiann barŋanii maŋ mɔnu ni.

⁴ Yii mɔk parpeenn yoo kur, yimm nan ti Yomdaanɔ benu ni. N bia ŋammit beeri ma yii mɔk parpeenn man.

⁵ Yi ŋaan ki sɔɔ kur-n bann i niŋantin po. Ti Yomdaanɔ baate mɔtana.

⁶ I daa biir i para bonsiar paaki. Yimm-ii mei Yennu linba kpaa talas turi paak. Yii mei Yennu, kii teenɔ niipoouk i para ni yoo kura ki betɔ i loomm nba tee linba.

⁷ Ki Yennu parmaasir nba gar nirɔ bannu terik na sa dia i para nan i dudukit Yisa Masia ni.

⁸ N naa waas, linba joont tee nnee, yi ŋaan ki i dudukit-n gbee nan linba tee barmɔnii, nan linba ŋan nan baakir, nan linba ŋan, nan linba mɔk burchint, nan linba took, nan linba yeen, nan linba mɔk fant, nan linba ŋan nan paku.

⁹ Jiin linba ki i tumii ki gaar n boor ni nan n mɔbona nan n toona na kii tuun nann toona. Ki ti Yennu nba teent parmaasir na sii be nani.

Piinii niipoouk turu labaar

¹⁰ N mɔk parpeenn bonchiann ti Yomdaanɔ ni nan la yukira ŋaan ki i fiin n po na paak; setik nan barmɔnii, i daan loonima, ŋaan i daan ki mɔk yaake.

¹¹ N ki dukii nan i tamm n po kaa ki n yeen linba na, kimaan min poŋ tumii biaŋinba ki n numm sa gboo linba ki n mɔka.

¹² N mi kɔŋŋir ni binbeŋ nan jaŋŋir ni binbeŋ. N poŋ tumii li kura; li paak, mi-i be siaminba kur ki li tee kon, amii gboor, li-i lekii yab amii li-i kii yabi, ŋaan n numm gboot linba ki n mɔke yoo kura.

¹³ Masia nba teenin paŋ na paak, n sa fit set binbeŋ kur ni.

¹⁴ Ŋaan i daan tun fanu bonchiann nan ya daan sommin n fara dinu ni na.

¹⁵ Yimm Filipi teeb mi nan ma din mɔɔntir Masia barŋanii pinpiik niwa, yoo nba ki n din nyii Masedonia tiŋ ni na, yimm kuukɔɔe din tee Masia niib nba sommitin; ki i gaan piinii nba tee Yennu Seyeeŋ yar na n boor ni, ŋaan mun teenin i piinii nba tee tingbouŋ na yar.

¹⁶ Ma din tan be fara ni Tesalonika doo ni na, yimme din tun ki teenin sommir.

¹⁷ Li ki tee a n loon mii gaan i piinii kuukɔɔ kaa, ŋaan n loon ki yin gaar Seyeeŋ nyɔɔt nba sa pukin i po.

¹⁸ N gaar i piinii na munna ki li jaŋŋima. Piinii nba ki i daan tun Epafrodaitus nann na te ki n gboowa. Li piinii naan nan mannu nba nubir mane ki teen Yennu, ki penn u par ni, ki u gaarir.

¹⁹ Li paak, Yennu sa turi linba tee i loomm kur kaman nan u mɔkint nba yab biaŋinba sanpaapo, Yisa Masia paake.

²⁰ Niib-ii dontir ti Baa Yennu sann mɔtana nan yoo nba kaa gbennu. Mɔmɔmm.

Foont joontii labaar

²¹ Yii foont Yisa Masia popeendamm kura. Yisaweira nba be nanin nna na foonti.

²² U popeendamm na kur foonti, ki mantik tee binba tee Kpanbar Siisa ŋaak toontunna na.

²³ Ti Yomdaanɔ Yisa Masia-n sommi i para ni.