Filipi teeb 3 - Yennu Gbounpaauŋ Mɔɔr

¹ Li gbennu nira, n naa waas, yii mɔk parpeenn yimm nan ti Yomdaanɔ benu ni. Min yaa baka kaa nan ma ŋamm sɔb linba ki n poŋ daan sɔb turi sinsinn na; mi-i tuun nna, li sii tee i yumanne.

² I mi man biitdamm na, nisiab nba naan nan bɔi na, ki pot bi gbanant na.

³ Timm jiantir Yennu u Seyeeŋ nie, ki mɔk yuugontir Yisa Masia paak; linba na gar punpotuwa. Timm ki teen nifosaarik yar yada kaa.

⁴ Wunba-i dukii a ŋɔɔ sa fit teen nifosaarik yar yada, min mɔŋ sa fit teen li bonbooru yadawa. N mɔk linba te ki n sa tun nna,

⁵ kimaan n mun din tee daa ŋanniin bike ki bi pot n punn. Bi marin ki n tee Juu nirɔe, Benjamin booru ni, ki tee Juu nirɔ nan barmɔnii. Li-i tee Juu teeb sennu dianu nba tee biaŋinba po naie, n din waa sennu maŋ kaman nan Farisiinba nba waa biaŋinba nee nan nunmɔnn,

⁶ ki din tan mukis Masia niib gbaa. Nirɔ-i sa sak sennue ki fit kii tee yentinɔ, min din be ki kaa bisiat jiin li po.

⁷ Ki n din bo sa fit kan linba na kur kaman nan li mɔk nyɔɔte, ŋaan min yiin linba kaa nyɔɔte Masia paak.

⁸ Li ki tee li kuukɔɔ kaa ki mɔk nyɔɔt turimi; min yiin bonsiar kura linba kaa nyɔɔte; kimaan ma bann n Yomdaanɔ Yisa Masia ki li bannu nyɔɔt yab bonchiann na paak, kimaan u paake ki n fok bonsiar kur ki lu; min yi li kur tanpenn paak mɔɔte ma n tan la Masia nan n ninbinn,

⁹ kii set kii be nanɔ nan barmɔnii. N ji ki mɔk n tiauŋ yentinu booru nba tee sennu weiu na kaa. Mɔtana, ma teen Yisa Masia yada nee ki n gaar yentinu booru nba na, li yentinu tee yada paake, ki nyi Yennu boor ni na.

¹⁰ Linba kur ki n ji loon tee ki n bann Masia, ki bann u kuun fiiru paŋ, ki di fara nanɔ, ki n binbenkperik-n gbenn kaman nan wa din kpo biaŋinba na,

¹¹ ki n mɔŋ-ii mɔk dindann nan n tan sa fiir kuun ni nan manfoora.

Poot nantatinu labaar

¹² N ki yaa a n poŋ nyann ki yent binbeŋ maŋ amii n poŋ ji be fanu kaa; n gbaae ma n nyann ki yent binbeŋ maŋ; kimaan Yisa Masia din fatima, ki n ji tee u yɔɔe.

¹³ N naa waas, n ki dukii a n poŋ nyannir ki li tee n yare, ŋaan bonyennkɔɔe ki n tuun, n lek ji tammit linba be n poorpoe, ŋaan gbaa ma n baar linba be n tɔɔnn po na.

¹⁴ Li paake te ki n tɔkin poot sɔnu maŋ ki tiin sunsonn saa nyannu bɔɔnu maŋ peŋ ma n sa gaar paauk nba tee sanpaapo manfoor ki Yennu din yiinin li paak Yisa Masia ni na.

¹⁵ Li kpaa talase ki timm nba kur tee subirteeb Seyeeŋ ni na-ii mɔk dudukit maŋ booru, ŋaan i siab-i mɔk dudukgantie, Yennu sa te lin yent li damm nunii powa.

¹⁶ Ŋaant man ki tii dia barmɔnii kuukɔɔ kaman nan ta din dia biaŋinba nan mɔtana na.

¹⁷ N naa waas, yii biakii tokii min man. Yi jii i dudukit teen damm nba waa siarŋana nba ki ti din senn turi na ni.

¹⁸ N poŋ din beti linba na po yoo nba gar nawa, ŋaan n bia ŋammit beerie mɔtana nan ninnyuut, nisiab be ki bi binbeŋ jiib teemm Masia dapunpunn paak kuun na dataie.

¹⁹ Bi tan sa joont nan tubdatu nba kaa gbennue, kimaan bi poore tee bi yennu. Bi mɔk yuugontir nan linba dintib fei nee. Bi dukii linba tee tingbouŋ na bona kuukɔɔ poe.

²⁰ Ŋaan timm ŋanin tee Yendɔuŋ ni waase, ki jekir ki guu ti Tinntɔɔ, wunba tee ti Yomdaanɔ Yisa Masia, a wun nyi Yendɔuŋ ni baar.

²¹ U tan sa lebit ti gbananchɔkint nba sa kpo na ki lii naan kaman nan u Yendɔuŋ ni gbananpaann nee. U tan sa jii paŋ nba te ki u yen bonsiar kur nee ki tun nna.