Filipi teeb 1 - Yennu Gbounpaauŋ Mɔɔr

¹ Min Pɔɔl nan Timoti, timm nba tee Yisa Masia toontunna nee sɔb gbouŋ na ki teen Yennu niŋamm kur nba tee Yisa Masiaweira nba be Filipi na, nan bi yudamm nan bi sommteeb na.

² Ti Baa Yennu nan ti Yomdaanɔ Yisa Masia-n sommi, ki bia turi parmaasir.

Pɔɔl mei Yennu bi paak

³ N teen Yennu niipoouk yoo nba kura ki n tiar i po.

⁴ Yoo kura, mi-i mei Yennu teeni, n tuu mei nan parpeenne,

⁵ kimaan ya sommitin biaŋinba barŋanii toona maŋ pinpiik niwa nan mɔtana na paak.

⁶ Li paak, n ki mɔk birsuk nan Yennu nba din piin toonŋann i ni na, u sii diar nna mɔkmɔk nan yoo nba ki u tan sa gbenn toonŋann maŋ Yisa Masia daar maŋ.

⁷ N yan be i ni. Ki mi-i dukii i po nna, li set ŋan, kimaan la nyii yoo nba ki n din be n yama ni ki gbaa barŋanii maŋ paak ma n sennir nawa, ki tan baar yoo nba ki n ji kɔɔ dansarik na, i kura mun lek mɔk li yaak booru nba ki Yennu turin na.

⁸ Yennue tee n siara daanɔ nan n yan set be i ni nan Yisa Masia mɔŋ mɔŋ loomm.

⁹ N mei Yennu ma i loomm-ii yɔɔ kii pukii yoo nan yoo, ki i barmɔnii bannu nan i subinii kura bia sii pukii,

¹⁰ ki yin fit gann linba mantik ŋan, ki li poorpo ki i be ki tan daa mɔk jakint nan biit Masia daar maŋ ni,

¹¹ ki i binbeŋ-ii mɔk yentinu ki yii tuun toonŋana bonchiann, Yisa Masia paŋ ni, ki Yennu sann-n la dontir nan paku.

Manfoor tee Masia

¹² N naa waas, n loon ki yin bann nan linba kura tumin na somm barŋanii maŋ a lin saan tɔɔnne nan barmɔnii.

¹³ Li paak, kpanbar gbanjot nan nileeb nba be nna na kur bann nan ma tee Masia toontunnɔ na paake ki n kɔɔ dansarik na.

¹⁴ N sarik ni benu na tur ti naa waas bonchiann yuugontir ti Yomdaanɔ sɔnu ni, ki pukii yoo kur, ki bi mɔɔntir Yennu maan nan parcheenn, ki jaŋmaanii ji kaa.

¹⁵ Ŋaan siab mɔɔntir Masia maan maŋ kimaan bi tee punpondamm nan kunkɔnkɔnnae, ŋaan ki siab mun mɔɔntir nan bi para ni nan barmɔnii loomm.

¹⁶ Binba tuun nan bi loomm na, bi mi nan Yennue poŋ din turin barŋanii toona na.

¹⁷ Nisiab ki mɔɔntir Masia po nan bi para kuri, ŋaan bi tuun nan funfunne; bi dukii nan bi sa pukin mine fara yoo nba ki n daa be dansarik nna.

¹⁸ Ŋaan ŋann ki biiri. N mɔk parpeenn li paak, ŋamme sa fit ki mɔɔnt Masia maan maŋ sɔnbooru nba kur ni; bi-i mɔɔntir bi dudukŋant ni amii bi dudukbiit ni, min lek bia sii mɔk parpeenn li paak,

¹⁹ kimaan n mi nan i Yenmiaru nan i sommir nba nyi Yisa Masia Seyeeŋ boor ni na paak, n sa nyi dansarik na niwa.

²⁰ N par ni loomm nan n dindann tee ki n daa dint n mɔŋ feie, ŋaan n sii mɔk parcheenn mɔtana nan yoo kura, ki mi-i lekii kpo amii ma be, ŋaan li kura sa dont Masia sann n po,

²¹ kimaan mi-i be n manfoor ni, li tee Masia paake; ŋaan li-i tee kuun ki n kpo, ŋanne mantik sa baar nan nyɔɔt ki turin.

²² Li-i tee ki n sii be n manfoor ni, n sa fit ŋamm tun toona nba kpaa talasa; li paak, n ki fit bann n par ni linba kpaa talas ki n sa gann.

²³ Li bona ŋannlee nee daarin; n mantik bo loon man nyik manfosiar nba nee, ki saan kii sai be Masia boor ni, ŋanne bo sii tee linba chee ki gar.

²⁴ Ŋaan i paake te ki li mantik kpaa talas bonchiann nan mii be n manfoor ni.

²⁵ N mi nan ŋanne sɔ ki birsuk kaa, li paak te ki n mi nan n sii beewa. N sii be i kura boor ni, ki i sii mɔk parpeenn ki i yada-n chee,

²⁶ ki mi-i taŋŋi jen i boor ni yoonba i binbeŋ sa turin yuugontir bonchiann nan li sɔnu, ki yin pak Yisa Masia n manfoor paak.

²⁷ Mɔtana, linba kpaa talas tee a yi ŋaan ki i binbeŋ sɔnu-ii tee nan Masia barŋanii nba loon lii tee biaŋinba na, ki mi-i lekii fit saan lai amii mi-i kii fit laini, ŋaan n sa gbat a i see fanu nan dudukyennkɔɔ, ki taan mɔtaauk ki yabii i mɔŋ ki barŋanii maŋ-ii saa tɔɔnn.

²⁸ I daa tiin i datai mani; yii mɔk parcheenn ki lin wannib nan ŋamme tan sa baa ŋaan ki yin do, kimaan Yennue teeni li nyannu.

²⁹ Ya poŋ mɔk yaak nan yin tun ki tur Masia na paak, ki li ki tee ya teenɔ yada na paak kuukɔɔ kaa, ŋaan ya bia di fara u paak na,

³⁰ ki gbaa kaman nan ya poŋ din la ma lek gbaa biaŋinba na, ki mɔtana i bia gbat nan n daa gbaa nna.