Filemonn 1 - Yennu Gbounpaauŋ Mɔɔr

¹ Min Pɔɔl wunba kɔɔ dansarik Yisa Masia sann paak na, nan ti naa bik Timoti sɔbin gbouŋ na ki teen ti toontunlɔɔ Filemon wunba ki ti loonɔ na,

² nan Masiaweira nba lakii jiantir Yennu a ŋaak ni na; ki bia teen ti niipoo Afia nan ti toontunlɔɔ Akipus.

³ Ti Baa Yennu nan ti Yomdaanɔ Yisa Masia-n sommi ki bia turi parmaasir.

Filemon loomm nan yada labaar

⁴ N naa bik, yoo kur, mi-i tian a po n Yenmiaru ni, n teen Yennu niipoouk,

⁵ kimaan n poŋ gbat fa teen ti Yomdaanɔ Yisa yada ki loon u yab kur biaŋinba.

⁶ N mei Yennu a timm nan fin nba taan ki teen Masia yada na paak, li sa te ki tin bann fanu binbenŋaŋ nba tee ti yar u ni na.

⁷ N naa bik, a loomm maŋ turin parpeenn nan pardɔɔnn bonchiann, kimaan a cheen Yisa yab kur para.

Pɔɔl mei sɔnu ki teen u yɔɔk Onesimus

⁸ Li paak, Masia paak n bo kii mɔk jaŋmaanii nan man chaba ki fan tun linba tooki,

⁹ ŋaan loomm paak ki n meia, min Pɔɔl nba tee saakɔɔ ki bia kɔɔ dansarik mɔtana Yisa Masia paak na,

¹⁰ n meia ki teen Onesimus, wunba tee n bik, kimaan ma kɔɔ dansarik na n kpant u baae Masia ni.

¹¹ Sinsinn na, u daan tuu ki mɔk nyɔɔt ki turani, ŋaan mɔtana u ji mɔk nyɔɔt bonchiann ki teen min nan fin kura.

¹² Mɔtana, n tuumɔ a wun ŋmat a boor ni; ki n par loomm kura be u ni.

¹³ N bo loon ki mii diau n boor ni nna na ki wun gaar a paak ki sommin yoo nba ki n kɔɔ dansarik Masia barŋanii paak na.

¹⁴ N ki loon ki n mukisa kaa ki a sommimi, ŋaan n loon ki a sommin nan a mɔŋ par ni loomme. N ki loon ki n tun siar ki li ki tee a mɔŋ par loommi.

¹⁵ Li pasiar, u yaatu na paak sa te ki a diau yoo kur.

¹⁶ Mɔtana u ji ki tee daabir kaa, ŋaan u gar daabira, u tee ti naa bilonkake; ma loonɔ bonchiann biaŋinba na, ŋaan a sii loonɔ ki gar nna, kimaan u lek tee a daabire ki bia tee a naa bik ti Yomdaanɔ ni.

¹⁷ Li paak, li-i tee ki a dukii a n tee a yɔɔkie, fan gaarɔ kaman nan fa bo sa gaar min biaŋinba na.

¹⁸ Li-i tee ki u biir a siar amii u dia a pansiarie, fan te ki man pa li pann.

¹⁹ Na nna, n sɔbin nan n mɔŋ mɔŋ nuue; min Pɔɔl sa pa-a; ŋaan min kaa sa beta, a mɔŋ mi nan a dia n pann a manfoor paak.

²⁰ Li paak, n naa bik, sommitin ti Yomdaanɔ paak, ki dɔɔn n par, kimaan ti set tee weinanleebe Masia ni.

²¹ N sɔbin gbouŋ maŋ ki teena, ki ki mɔk birsuk nan a sa sak tun ki lin gar ma beta linba na kura.

²² A bia lon diiuk ki guunin, kimaan i Yenmiaru paak, n mɔk dindann nan Yennu sa te ki n baar foonti.

Foontii labaar

²³ Epafras wunba ki min nan ŋɔɔ kɔɔ dansarik Yisa Masia paak na teena u foontii;

²⁴ ki n toontunleeb, Mak, nan Aristakus, nan Demas, nan Luk, mun bia teena bi foontii.

²⁵ Ti Yomdaanɔ Yisa Masia-n sommi i para ni.