Fiitu 3 - Yennu Gbounpaauŋ Mɔɔr

Masia labaar nba tee Saadis teeb yare na

¹ Ki wunba ki n lau na bia betin a n sɔb labaar na ki tur u weira nba lakin be Saadis doo ni na malaka a “Labaar na nyii wunba mɔk Yennu Sei ŋannlore nan ŋmaabira ŋannlore na boore: ŋɔɔe yet a ‘N mi i toona nba tee biaŋinba, ki bia mi nan niib dukii a i fo, ŋaan i ki fo.

² Li paak, fiit man ki yabir i binbeŋ nba biar na a li daa kpenn ki gbenti, kimaan toona nba ki i tuun na, li ki gboot Yennu ninbina.

³ Li paak, yii tian man wannu nba ki i din gbat ki waa-r na. Yii diar man ŋaan nyik i toonbiit tumu na; ŋaan li-i tee ki i ki fiir, n sa baar i boor ni kaman nan nanyukɔɔ nba tuu baar biaŋinba nee, ki i kan bann n baaru yoo.

⁴ Ŋaan i siab be Saadis ki bi para ni ki mɔk jakinti. Ŋamme sa lia tapeenii ki min nan ŋamm sii tɔk, kimaan ba ŋan nann na paak.

⁵ Wunba nyann nyannu maŋ na, u tan sa lia tapeenii na, ki n tan kan kpeen u sann manfopaana damm gbouŋ na ni, ki n tan sa yet n Baa nan u malakanba na paanu ni a li daanɔ tee n yɔɔe.

⁶ “Wunba mɔk tuba, wun gbiint linba ki Yennu Seyeeŋ na yeen ki teen Masiaweira na.’ ”

Masia labaar nba tee Filadelfia teeb yare na

⁷ Ki wunba ki n lau na bia betin a n sɔb labaar na ki tur u weira nba lakin be Filadelfia doo ni na malaka a “Labaar na nyii wunba tee Popeendaanɔ, ki bia tee Barmɔnii daanɔ na boore; ki u dia David peenu na, ki li-i tee ki u loot gann, sɔɔ kan fit loonni; ki li-i biakii tee ki u loonn, sɔɔ kan fit looti:

⁸ ŋɔɔe yet a ‘N mi i toona nba tee biaŋinba, ŋaan gotir, n loot gann ki turi, ki sɔɔ kan fit loonni. N mi nan paŋ nba ki i mɔk na, li waar, ŋaan nanna kura, i bia lek dia n wannu na, ki ki nɔi nan i ki mimi.

⁹ Nnara, binba tee Sintaanii niib, faidamm nba yaa a bi tee Juu teeb ŋaan ki ki tee na, n sa te ki bin baar ki tan gbaan i tɔɔnn po ki bann nan n set looni.

¹⁰ Kimaan ya sak n mɔmaan ki mɔk mintir na paak, n sa dia-i bonŋann ki i tan kan kɔɔ bonbiir nba baat tingbouŋ na kur paak a lin tan bikin tingbouŋ na niib na.

¹¹ N baate mɔtana. Yii dia man linba ki i mɔk na fanu ki sɔɔ tan kan fat i nyɔɔt maŋi.

¹² Wunba nyann nyannu na, n sa teenɔ Yennu diiuk ni jaantarik, ki u ji kan nyi leŋi. Ki n bia sa sɔb Yennu sann u paak, ki sɔb Yennu doo sann u paak, ki bia sɔb n mɔŋ sanpaann na u paak. Yennu doo maŋe tee Jerusalem paann nba sa nyi Yendɔuŋ ni Yennu boor ni na, ki tan sik tiŋ na ni.

¹³ “Wunba mɔk tuba, wun gbiint linba ki Yennu Seyeeŋ na yeen ki teen Masiaweira na.’ ”

Masia labaar nba tee Laodisea teeb yare na

¹⁴ Ki wunba ki n lau na bia betin a n sɔb labaar na ki tur u weira nba lakin be Laodisea doo ni na malaka a “Labaar na nyii wunba sann yi Mɔnii na boore; ki u tee siara daanɔ nba tee barmɔnii daanɔ ki tee siara fanu; ki bia tee linba kur ki Yennu nann na yudaanɔ:

¹⁵ ŋɔɔe yet a ‘N mi i toona nba tee biaŋinba; i ki tôni, i bia ki mei, ŋaan n bo loon ki yii tee li yenne;

¹⁶ ŋaan ya ki tôn ki bia ki mei na, n sa siiri pia teriku.

¹⁷ Yimme yeen a i tee mɔkitae ki mɔk linba kur ki i loon, a ki siar kan pɔtiini, ŋaan ki ki mi ya mɔk parbiir nan ninbaauk biaŋinba. I tee nandamme, ki somm yana, ki tee jɔɔnii.

¹⁸ Li paak, n kpaaniie a yi daa sarima nba tee sarinmɔnna n boor ni ki set la mɔkint, ki bia daa tapeenii ki dɔkin i fei na, ki bia daa kpan ki baŋ i ninbina na kii laat.

¹⁹ Binba kur ki n loomm na, n kpaamm kpaanii ki daar bi tuba. Li paak, nyikin man i biit, ki daa jerimi.

²⁰ Nnara, n see tammɔb na ni ki kpaan gann; wunba gbat n kunkɔr ki loot gann maŋ, n sa kɔɔ u boor ni, ki min nan ŋɔɔ sa lakin ki di.

²¹ Wunba nyann nyannu na, n sa turɔ yaak ki wun tan lakin kar nanin n naangbouŋ na paak, kaman nan ma nyann nyannu kur ki lakin kar nan n Baa Yennu u naangbouŋ na paak biaŋinba na.

²² “Wunba mɔk tuba, wun gbiint linba ki Yennu Seyeeŋ na yeen ki teen Masiaweira na.’ ”