Fiitu 12 - Yennu Gbounpaauŋ Mɔɔr

Poo nan waakperbiiuk labaar

¹ Li poorpo ki nyingbeŋŋir dɔkit sanpaapo; ki poosɔɔ gbab yennu na kaman nan chinchenn na, ki see ŋmaarik paak, ki ŋmaabira piik nan ŋannlee bia be u yur paak ki tee fokirik na;

² ki poo maŋ mɔk poor ki bui matyiaru.

³ Ŋanne ki nyinleer bia dɔkit sanpaapo; ki waakperbiiuk nba tee bonmuŋ see ki mɔk yura ŋannlore nan yina piik; ki naanfokirii ŋannlore yir u yura ŋannlore na paak.

⁴ Ki u jii u joor ki dat ŋmaabira na bɔkitu ŋanntaa ni yenn ki nyinnir sanpaapo ki lur tingbouŋ na ni. Ŋanne ki u ji see poo nba mɔ matyiaru na tɔɔnn, ki guu a wun mar gbenna, ki wun ji ŋman sanpantik na.

⁵ Ki poo maŋ tan mar bonjabik wunba yaa wun tan dia nibooru kur nan paŋ; ki bi nyiiar bik na ki saan nanɔ Yennu boor, u naangbouŋ paak.

⁶ Ki poo na mun chiar ki saan muuk ni siaminba ki Yennu teen siir ki guunɔ na, ki sii dintɔ ki saa dian daa tusir nan kobiinnlee nan piinnloob.

⁷ Ŋanne ki tɔb fiir Yendɔuŋ ni. Ki malaka wunba ki u sann yi Makel, ki ŋɔɔ nan u malakaleeb kɔn ki tookit waakperbiiuk na nan u mun yaa malakanba na;

⁸ ki bi nyann waakperbiiuk nan u malakanba na, ki ki chabib a bii be Yendɔuŋ ni;

⁹ bi jii waakperbiiuk na ki nyinnɔ; u poŋ tuu tee waauk nba tuu beewa, ki u sann yi Sanbiirtɔɔ amii Sintaanii, ki tuu kpann tingbouŋ na teeb kur na. Ki bi nyinn ŋɔɔ nan u malakanba ki lub tingbouŋ na ni.

¹⁰ Li yoo ki n gbat kunkɔsaakar Yendɔuŋ ni, ki li yeen a “Mɔtana, ti Yomdaanɔ Yennu tinnu, nan u paŋ, nan u naan, nan u Niganntɔɔ Masia yikoo baar na, kimaan bee paake? bi nyinn Sintanii na Yendɔuŋ ni; ŋɔɔ Sintanii tee wunba din biir Masiaweira ki teen Yennu yoo kur na;

¹¹ a Pebik na sɔn nan u barŋanii nba ki bi mɔɔntir na paake ki bi nyann Sintanii na; ki bi ki tiin bi manfoor na ki sak nan kuum-i baarib, bi sa gaar.

¹² Li paak, yimm nba be Yendɔuŋ ni na, i mɔk man parpeenn. Ŋaan tingbouŋ na niib nan binba be mɔkgbeŋŋa ni ŋanin, parbiir be bi paak, kimaan Sintaanii sik bi paak nan wutogbeŋŋir, wa mi nan u yoo ji ki yab na paak.”

¹³ Waakperbiiuk na nba bann nan bi jiiu ki lu tingbouŋ na ni na, ki u ji wei poo nba mar bonjabik na a wun soorɔ.

¹⁴ Ki Yennu jii kanbagbeŋŋir kpinkpant ŋannlee ki tur poo na a wun yukir ŋaan nyik waakperbiiuk na, ki saan muuk ni kii saa kii be siaminba ki bi sii dintɔ bina ŋanntaa nan binjinn.

¹⁵ Ki waakperbiiuk na puut nyunpana poo na paak kaman nan mɔkir ni nyun na, a nyun na-n diu;

¹⁶ ŋaan ki tiŋ somm poo na ki yaat ŋaan jiin mubin nyun nba nyii waakperbiiuk mɔb ni na paak.

¹⁷ Ki waakperbiiuk na wutoor doo nan poo na bonchiann, ki u saan a wun saa kɔn nan poo na booru nba biar ki waa Yennu sennu ki dia Yisa barŋanii na,

¹⁸ ŋaan saan see mɔk-kpiŋ.