Efesus teeb 5 - Yennu Gbounpaauŋ Mɔɔr

Yentu ni benu labaar

¹ Ya tee Yennu walonkai na, yii yabir i mɔŋ kii naan nan ŋɔɔ na,

² ki ŋaan ki loomm-ii dia-i kaman nan Masia nba din loont bonchiann ki gaar ti paak ki kpo ki teen mannu nba ki Yennu loon na.

³ Ya tee Yennu waas na paak, li poŋ ki ŋan niib-ii gbia bonchonchonn toona barii, amii jakint barii, amii nianchiauŋ barii i sinsuuk ni.

⁴ Yii teen Yennu niipoouk yoo kura, ŋaan daa te ki bonchonchonn toona barii nan jakint barii nan baryana nyi i mɔi ni.

⁵ Li ŋan yii mi nan wunba tee bonchonchonn amii jakint daanɔ amii nianchiauŋ daanɔ, ŋamme kan la yiar Masia nan Yennu naan ni; ki nianchiauŋ tee kaman nan patmannu nee.

⁶ Kimaan li toonbiit tumu paake te ki Yennu wutoor baat mɔyêtdamm paak. I daa te ki sɔɔ-n jii u jat wannu ki kpanniini.

⁷ I bɔkit i mɔŋ i kɔɔ, ŋaan nyik li damm.

⁸ I ji tee Yennu waase, ki be yentu nie; i ki be bunbɔnn ni kaa kaman nan ya din tuu be na; li ŋan ki yi tee yentu na waas,

⁹ kimaan linba tee barmɔnii nan yentinu nan toonŋana kura tee yentu yare.

¹⁰ Li paak, yii yabir i mɔŋ ki tumii linba sa penn ti Yomdaanɔ par ni,

¹¹ ki daa tokii binba tuun bunbɔnn ni toona ki nyɔɔt kaa li ni, ŋaan te ki bi bunbɔnn ni toona maŋ-n yent.

¹² Linba ki bi tuun bunbɔnn ni na mɔk fei bonchiann gbaa nan tii piak li po.

¹³ Ŋaan ba tan sa nyinn bonsiar kur yeenin ni yoonba, bi bunbɔnn ni binbeŋ maŋ kura sa fiite perrr.

¹⁴ Kimaan linba kur ki bi fiit li gbina, li ji tuu dɔɔ yeenin nie. Li paake ki li din sɔb Yennu gbouŋ ni a “Fin nba gɔɔnt, fan fiir gɔɔn ni, ki li want nan a fiir kuun nie na, ki Masia sa tura u yentu.”

¹⁵ Li paak, i daa be jatbenu, ŋaan kii tee subindamm.

¹⁶ Yii jii i yoo kii tuun fanu, kimaan yoo na ni tee yoo biiuko.

¹⁷ Li paak, yii bant linba tee ti Yomdaanɔ loomm ki daa tee i mɔŋ jatiti.

¹⁸ I daa nyu daan ki yibi; ŋann sa biirie, ŋaan yii yabir i mɔŋ paak kii gbee nan Yennu Seyeeŋ.

¹⁹ Yii yiin yanii kii piak ti Yomdaanɔ i para ni, kii yiin nan i leeb Yennu gbouŋ ni yanii nan Seyeeŋ yanii.

²⁰ Yoo kur yii teen ti Baa Yennu niipoouk bonsiar kur paak, ti Yomdaanɔ Yisa Masia sann ni.

Ŋaapoob nan bi sɔrib labaar

²¹ Masia paak, yi sikin i mɔŋ ki tur i leeb man.

²² Poob, ya baakit Masia biaŋinba na, yii saak i sɔrib mɔi,

²³ kimaan Masia nba mɔk yaak u niib paak biaŋinba na, nnee ki jɔɔ mun mɔk yaak u poo paak. Masia niib tee u gbanante ŋaan ki u tee bi Tinntɔɔ.

²⁴ Poob mun-ii saak bi sɔrib mɔi bont kura ni kaman nan Masia niib nba saakɔ biaŋinba na.

²⁵ Jab, yii loon i poob kaman nan Masia nba loon u niib ki gaar bi paak ki kpo biaŋinba na.

²⁶ U din tun linba na, ki bia jii Yennu barii nan nyun ki wurib, a wun ŋammib fanu

²⁷ ki jiin teemm u mɔŋ nuu ni nan fant, a bi fant na daa mɔk dansiari, ki bia tee popeendamm ki daa mɔk biit nan waaminnawa.

²⁸ Jɔɔ nba loon u poo, u loon u mɔŋe, li paak, li ŋan ki jab-ii loon bi poob kaman nan ba loon bi mɔŋ gbanant biaŋinba na.

²⁹ (Sɔɔ ki mi yêt u mɔŋ gbananti; sɔɔ kura gorii u gbanante fanu ki dint u mɔŋ kaman nan Masia nba tuun biaŋinba teen u niib na.

³⁰ Timme tee u gbanant maŋ,)

³¹ kaman nan Yennu gbouŋ nba yet biaŋinba na a “Linba na paak ki li ŋan ki jɔɔ-n nyik u naa nan u baa, ŋaan jii u mɔŋ ki taan nan u ŋaapoo ki bin ji teen yomm.”

³² Yennu mɔmaan na sumii bonchiann, ŋaan min mi nan li want Masia nan u niib poe.

³³ Ŋaan li bia want yimme a li ŋan ki jɔɔ kura-ii loon u poo kaman nan wa loon u mɔŋ biaŋinba na, ki poo kura-ii munii baakit u sɔrɔ.