Efesus teeb 4 - Yennu Gbounpaauŋ Mɔɔr

Gbananyennkɔɔ labaar

¹ Min nba kɔɔ dansarik ti Yomdaanɔ toona paak na, n kpaaniie a yii ŋaan ki i binbeŋ-ii tee fanu kaman nan Yennu nba loon ki lii tee biaŋinba na.

² Yii sikint i mɔŋ, kii be soonna nan sukuru, kii mɔk yandiŋir nan i leeb, nan loomm.

³ Yennu Seyeeŋ nba din turi mɔtaauk nba na, yi yabir i mɔŋ kii be nan parmaasir.

^4-5 Masia niib tee gbananyenn, ki Yennu Seyeeŋ yenɔkɔɔe be, ki Yennu tinni ki turi dindann yennkɔɔ. Yomdaan-yenɔkɔɔe be, ki ti taan teenɔ yada, ki Yennu nyunwuru mun tee yennkɔɔ.

⁶ Yennu tee yenɔkɔɔe ki tee nisaarii kura Baa, ki bia tee sɔɔ kura Yomdaanɔ nba tuun siar kura ni, ŋaan bia be siar kura ni.

⁷ Masia nba turit linba na paak, ti kura gaar u piingaŋire,

⁸ kaman nan la poŋ sɔb Yennu gbouŋ ni biaŋinba ki yet a “Wa din doo sanpaapo yoonba ki u nyinn yommii ki ŋaab yann, ŋaan turib piinii.”

⁹ Tɔn, “U din doo sanpaapo” paak tee bee? Li want nan sinsinn u din sik tingbouŋ na nie.

¹⁰ Ŋɔɔ nba din sik tingbouŋ na ni maŋe bia din doo sanpanagbeŋ na.

¹¹ Ŋɔɔe tur nisaarik piinii, ki gann nisiab ki teemm toomiinba, ki leeb mun tee sɔkiniinba, ki yemm mun bia teen barŋanimɔɔnt teeb, ki siab mun lek tee Masia niguuteeb nan wannteeb.

¹² U tun linba na a binba tee Yennu niib kura-n fit jaŋ u toona maŋe, ki chee Masiaweira.

¹³ Li paak, ti sa taan teen Yennu Bija yada ki bannɔ, kii tee niib nba yaa binbeŋ ŋan ki jaŋ nan ŋɔɔ Masia yar na.

¹⁴ Ti ji kii tee waas kaa; nifobiit nan kpinkpannii damm ji kii diat laŋ lin kaman nan ba poŋ teen siab biaŋinba na.

¹⁵ Ŋaan ti sii piak barmɔniie nan loomm kii nɔb kii pukii, ki Masiae tee ti yudaanɔ.

¹⁶ Ŋɔɔe te ki gbanant bɔka kur dia bi leeb, ki gbanant maŋ tukita dia nan leeb; li kura-i bo-i tuun nan leeb chib chib, gbanant maŋ bo sii nɔbee nan leeb.

Ti binbenpaaŋ labaar

¹⁷ Ti Yomdaanɔ sann paak, n kpaaniie, i ji daa be kaman nan binba ki mi Yennu, ki bi dudukit be bunbɔnn ni, ki li ki mɔk nyɔɔt biaŋinba na.

¹⁸ Bi tee tubkangbatae ki ki bant siari, li paak, bi ki pukin Yennu nba tur manfopaann nba na ni.

¹⁹ Bi ji ki tiin fei, ki lin tuun jakint toona, ki ki dia bi mɔŋ nan waaminnawa.

²⁰ Ŋaan yimm din ki tumii ŋann kaa Masia boor ni.

²¹ I din gbat u po ki tee u weirae, ki bi bia wanni barmɔnii nba be u niwa.

²² Li paak, yabit i mɔŋ man ki nyann niauŋ nba be i binbekperik nba na ni.

²³ Ŋaant ki i dudukit nan i para-n ŋamm ki pant,

²⁴ kii mɔk binbenpaaŋ nba ki Yennu turi na, kii naan Yennu, kii be fanu, kii tee popeendamm nan barmɔnii.

²⁵ Li paak, ŋaant ki ti nyik faak, ŋaan sɔɔ kur-ii piak barmɔnii kii teen u lɔɔ, kimaan ti tee niyenɔkɔɔe Masia ni.

²⁶ Li-i tee ki a donn wutoor ŋaan fa daa tuun toonbiiti, ki bia daa diar a par ni ki yennu baa,

²⁷ ki daa teen Sintaanii yaaki.

²⁸ Wunba tuu jaan u leeb bont na wun ji nyik jamu, ŋaan yabir tun toona ki fit tur tatimm linba ki bi loon.

²⁹ I daa piak mɔbonbiit ki teen i leebi, ŋaan te ki i mɔbona-ii tee linba kpaa talas ki mɔk nyɔɔt, ki i leeb-i gbat, lin pukimm binbeŋ nba fan.

³⁰ I daa te ki Seyeeŋ nba tee Yennu yent dɔk i paak na-n la parbiiri. Ŋɔɔe tee dɔk nba want nan Daar baat na ki Yennu tan sa turi yentinmɔŋ nan barmɔnii.

³¹ Yi nyik tonu binbeŋ kur, nan wutoor. Sɔɔ ji daa mɔk kunkɔnchiauŋ nan u lɔɔ, sɔɔ daa sukii u lɔɔ, ki bia nyik naŋ dudukit kura i ni.

³² Yii tee burchimm nan ninkpabauŋ damm man i leeb boor. Yii nyikit leeb biit kii chabitib kaman nan Yennu nba nyikit i yara ki chabiti biaŋinba Masia paak na.