Efesus teeb 3 - Yennu Gbounpaauŋ Mɔɔr

Pɔɔl nba tuun ki teen binba ki tee Juu teeb

¹ Linba na paake te ki min Pɔɔl wunba kɔɔ dansarik Yisa Masia toona paak na, n lek mei Yennu yimm nba ki tee Juu teeb na paak.

² N ki biris nan i poŋ gbat nan Yennu turin toona na i sommir paaki.

³ U din fiit u woonin ni lor na ki wannima.

⁴ (I-i karin ma din sɔb linba waaminna na, i sa bann nan n set mi siar ki jiin Masia po.)

⁵ Mɔtana Yennu ji ŋaan ki u Seyeeŋ fiit u woonin ni lor na ki wann u toomiinbaŋamm nan u sɔkiniinba, ŋaan li din ki tee nna sianyoo ni.

⁶ U woonin ni lor maŋ tee nee: barŋanii maŋ paak ki binba ki tee Juu teeb na ji fit taan la yiar Yendɔuŋ ni nan Juu teeb; ŋaan bia taan namm ki tee gbananyennkɔɔ ki fit mɔk namm wa din senn mɔsonn nba Yisa Masia ni na.

⁷ Yennu ninbatinu paak ki u din turin yaak a n teen u toomii kii mɔɔntir u barŋanii wa turin paŋ biaŋinba na.

⁸ Yennu niib sinsuuk ni, mine tan joont wunba ki be kann ni, ŋaan Yennu tur mine yaak a man jii barŋanii mɔɔntii nba wantit Masia nba sii teent binba ki tee Juu teeb na bonŋana bonchiann biaŋinba,

⁹ ki bia te ki niib kur nunii-n yent ki bin bann biaŋinba ki Yennu woonin ni lor maŋ tuun gbeent Masia ni. Yaayoo niewa ki Yennu, wunba din nan bonsiar kur, din diar woonin ni

¹⁰ a Masia niib paak malakanba yent damm nan Yendɔuŋ ni yikoo damm-n tan tumii mɔtana u subinbooru booru.

¹¹ Ti Yomdaanɔ Yisa Masia nie ki u din tun linba na kaman nan wa din lor biaŋinba na.

¹² Ta teen Masia yada ki be u ni na, li paak, ki ti mɔk yuugontir ki sa baar Yennu boor nan parcheenn.

¹³ Li paak, n barimiie a i daa te ki i para-n biir nan ma di fara i paak na, kimaan li kur tee i nyɔɔt paake.

Masia loomm labaar

¹⁴ Linba na paak, ki n gbaa n duna paak ti Baa Yennu tɔɔnn po,

¹⁵ wunba yaa boor ni ki Yendɔuŋ ni nan tingbouŋ na ni nibooru kur gaan bi yejamm maaru ni sana.

¹⁶ Yennu paŋ nba yab bonchiann biaŋinba na, n meiɔ a wun turi paŋ maŋ u Seyeeŋ paak, ki paŋ maŋ-ii be i ni,

¹⁷ n bia meiɔ a Masia-n jii i para ki teen u binbeboor i yada paak. N meiɔ a wun te ki i fit set chib, ki baa jiina ki fɔkin fiakir, ki loomm na-ii paar,

¹⁸ ki yimm nan Yennu niib kur-n fit bann Masia loomm yarimu, nan li fɔkint, nan li sumiiu nba jan biaŋinba,

¹⁹ ki fit bann Masia loomm nba gar siar kur, ki i benu-ii tee kaman nan Yennu benu na.

²⁰ Yennu paŋ nba tuun ti ni na paak, ki u sa fit tun bonsiar kur ki turit ki gar ta dukii linba po ki meiɔ;

²¹ ŋɔɔ Yennu tan sa la nibaakir Yisa Masia nan u weira paak, yoo kur nan yoo nba kaa gbennu. Mɔmɔmm.