Efesus teeb 2 - Yennu Gbounpaauŋ Mɔɔr

Kuun nan manfoor labaar

¹ Yoo nba din gar na, i mɔyêtuk nan biit paak, li want nan i kpoe.

² I din waa tingbouŋ na narinbiit sɔnue ki sak tingbouŋ na bat Sintaanii nba dia niib nba ki saak Yennu mɔb na.

³ Barmɔnii, ti kura mun din naan kaman nan li nibooru nee, ki waa ti gbanant niauŋ, ki tuun ti gbanant nan ti dudukit loomm. Timm nan ŋamm toona din baat nan Yennu wutoore ti kura paak.

⁴ Ŋaan Yennu loomm nan u ninbatinu yab bonchiann ki kaa bikinu,

⁵ li paak, ta din yêt Yennu mɔb ki li want nan ti kpoe na yoonba, li yoo na, ki u din nyinnit kuun ni, ki kɔɔnit manfoor ni Masia paak; Yennu ninbatinu paak ki i tinn na.

⁶ Ta be Yisa Masia ni na paak ki Yennu din lakin fiin timm nan ŋɔɔ, ki ti lakin dii naan nanɔ Yendɔuŋ ni.

⁷ U din tun linba na a wun wann sɔɔ kura u ninbatinu nba yab biaŋinbae, ki tun burchint turit Yisa Masia paak.

⁸ Yennu ninbatinu na paake ki i tinn, kimaan i teen Masia yada.

⁹ Sɔɔ kan fit nyu bara li paaki, kimaan li ki tee u tiauŋ toona nyɔɔt kaa; li tee Yennu piiniie.

¹⁰ Yisa Masia nie ki Yennu teent ta tee binba, ki turit toonŋana binbeŋ a tii tuun linba ki u din poŋ lor a ti tun na.

Masia niib kur tee yomme u ni

¹¹ Yimm nba ki tee Juu teeb na, Juu teeb yi yimm ŋanin punjoote, ŋaan yi bi mɔŋ sankpanna; yi tian man ya din tee nibooru nba sianyoo nba gar na.

¹² I din ki mi Masia li yoo. I din tee saamme ki bi ki kaani ki pukinti Yennu nigannkab ni. I din ki mi Yennu tingbouŋ na ni, ki bia din ki mɔk dindann, kimaan wa din tur u niib mɔsona nba i din ki pukin li ni;

¹³ ŋaan mɔtana i ji be Yisa Masia nie, li paak yimm nba din tuu be banfɔkira maŋ ji nyat nakinɔɔe u kuun paak,

¹⁴ kimaan ŋɔɔe taan Juu teeb nan binba ki tee Juu teeb ki teemm niyenɔkɔɔ, ki parmaasir baar; u gbanant paak ki u biir dataar nba din tuu puun bi sinsuuk ni na.

¹⁵ U din kpeen Juu teeb sennu nan li kɔɔt na kura a wun te parmaasir-n baar nibooru munnlee maŋ sinsuuk ni, ki bii be u ni ki taan kii tee nipaamm yenɔkɔɔ.

¹⁶ U dapunpunn paak kuun maŋ te ki u biir dataar maŋ bi sinsuuk ni, ki jiib ki taamm booru yenɔkɔɔ ki jen namm Yennu boor ni.

¹⁷ Li paak, Masia din baar mɔɔnt parmaasir barŋanii mɔɔntii ki tur yimm nba ki tee Juu teeb ki din tuu fɔk nan Yennu na, ki mun bia baar nann ki tur Juu teeb nba din tuu kpia nanɔ na.

¹⁸ Masia paake ki Juu teeb nan binba ki tee Juu teeb na kura fit baar ti Baa Yennu maŋ boor ni, u Seyeeŋ yenɔkɔɔ ni.

¹⁹ Mɔtana, yimm nba ki tee Juu teeb nan Yennu niib tee tiŋ yeŋkɔɔ waase, ki ji tee Yennu ŋaateeb; i ji ki tee saamm kaa.

²⁰ Fiakir yennkɔɔ nba ki sɔkiniinba nan toomiinba din fɔkin na paake ki i mun tɔɔnn ki Yisa Masia mɔŋ tee li tanjaann.

²¹ Ŋɔɔe dia Yennu niib maŋ ki bi be fanu ki kpaatir ti Yomdaanɔ boor ni.

²² Yimm nan ŋɔɔ nba taan nan leeb na paak, ki yimm nan ŋamm mun bia taan teen diiuk nba tur Yennu ki u Seyeeŋ be i ni.