Efesus teeb 1 - Yennu Gbounpaauŋ Mɔɔr

¹ Min Pɔɔl wunba ki Yennu gannin a n teen Yisa Masia toomii na foont Yisa Masiaweira nba teenɔ yada ki be Efesus doo ni.

² Ti Baa Yennu nan ti Yomdaanɔ Yisa Masia-n sommi, ki bia turi parmaasir.

Yennu Seyeeŋ nba sommitit Masia paak biaŋinba

³ Ŋaant ki ti tur Yennu wunba tee ti Yomdaanɔ Yisa Masia Baa na niipoouk man, kimaan ta be Yisa Masia ni na paak ki ŋɔɔ Yennu turit Seyeeŋ piinii kur nba be sanpaapo.

⁴ Yennu nba poŋ daa din ki nan tingbouŋ yoonba nawa ki u din gannit a tii tee u niib Yisa Masia paak, kii tee popeendamm ki daa mɔk biit u boor ni. Kimaan Yennu loonit,

⁵ li paak, u loomm nan u lora ni u poŋ din dukinewa a Yisa Masia nie ki u sa teenit u waas.

⁶ Ŋaant ki tin pak Yennu kimaan u ninbatinu nba yab bonchiann biaŋinba na, nan wa tint ninbaauk u Bilonkak na paak.

⁷ Kimaan Yennu nyik chab ti biit ki nyinnit daabsin ni u Bilonkak maŋ sɔn paake.

⁸ Gotir, Yennu ninbatinu nba be ti paak ki ki mɔk bikinu na. Yennu nba mɔk yanŋann nan bannu bonchiann biaŋinba na ki u din tun wa poŋ dukin biaŋinba

⁹ ki fiit wannit woonin ni lora nba ki u din senn a wun tan tun Masia ni na.

¹⁰ Yoo maŋ-i taŋŋi jaŋ chib, ki u ji sa tun gbenn u lora maŋ, ki lakin u naamii kur sanpaapo nan tiŋ ni ki Masia-ii tee yudaanɔ.

¹¹ Yennu tun siar kur u dudukit nan u lora nee, ki gannit a tii tee u niib, kaman nan u bibikit nba din tee biaŋinba pinpiik niwa na.

¹² Timm nba dɔŋ mɔk dindann Masia ni na, tii piak Yennu kii dontir u sann man.

¹³ Ŋaan yimme mun din gbat tinnu barŋanii nba tee barmɔnii maŋ ki teen Yisa Masia niib. Ya teen Masia yada na paak ki Yennu jii u Seyeeŋ nba tee u yent dɔk na turi nan wa din lor biaŋinba na.

¹⁴ Ŋanne tee siara nan ti tan sa la ti yiar Yennu boor, ki bia want nan u sa tur u niib yentinmɔŋ nan barmɔnii. Tii pakɔ kii dontir u sann man.

Pɔɔl Yenmiaru labaar

¹⁵ Li paak, yoo nba ki n din gbat ya teen ti Yomdaanɔ Yisa yada na nan ya loon Yennu niib biaŋinba na po mɔkmɔk nan dinna,

¹⁶ n teen Yennu niipoouk i paak ki ki nyiki. N tuu tian i poe n miaru ni,

¹⁷ ki lek mei ti Baa Yennu wunba tee paŋ daanɔ ki bia tee ti Yomdaanɔ Yisa Masia Yennu, a wun turi Seyeeŋ nba sa turi yan ki fiit Yennu wanni kii ŋamm bannɔ.

¹⁸ N bia meiɔ ma wun yent i nummpo ki yin bann dindann nba paak ki u yiini na, ki bia bann nan bona nba ki u tan sa tur u niib nae ŋan bonchiann,

¹⁹ ki bia bann wa tuun toonjaana nba teen timm nba teenɔ yada na.

²⁰ U panchiauŋ toonbooru nba ki u din jii ki fiin Masia kuun ni ki kaanɔ Yendɔuŋ ni u niidiitu po nee, ki u bia tuun ti ni na.

²¹ Masiae yen sanpaapo yent damm, nan yikoo damm, nan paŋ damm, nan yomdamm kur; ŋɔɔe mɔk sann nba gar yikoo kur sana nba be dunia na ni nan dunia nba baat na ni.

²² Yennu jii bonsiar kura yaak ki teen Masia nuu nee. U jii ŋɔɔe a wuu tee Yennu nigannkab kura Yomdaanɔ.

²³ U nigannkab maŋe tee u gbanant. Ŋamme gbee u gbanant maŋ ni, ki u mun jii piinii kur ki gbeen bi ni.