2 Timoti 4 - Yennu Gbounpaauŋ Mɔɔr

¹ Yisa Masia nba tan sa bu footib nan kpeemm buut, wunba tan sa jen ki di naan na, ŋɔɔ nan Yennu tɔɔnn po ki n beera,

² a fii mɔɔntir u barii; ki yoo-i lekii jaŋ amii li-i kii jaŋi, fii mɔɔntir, kii piak niib bi toonbiit po, kii kpaanib, kii kɔɔntib para, kii wantib barii maŋ nan sukuru yoo kura,

³ kimaan yoo baat na ki niib ji tan kii gbiin wannŋanu, ŋaan tan sii waa bi mɔŋ mɔŋ nianbiite, ki sii gbiin wannteeb bonchiann binba sii wantib ba loon bii gbia linba.

⁴ Bi kan gbiint barmɔnii barii maŋi, ŋaan loon a bii gbiin labagana.

⁵ Ŋaan fii tee subindaanɔ yoo kur, kii saak fardinu, kii mɔɔntir Yisa Masia barŋanii, kii tuun toona kur nba ki Yennu tura na.

⁶ Kimaan min ŋanin, yoo baar na nan man lu n miar na; yoo baar nan man nyi tingbouŋ na niwa.

⁷ N gbaa gbigbaaŋana; n tun n toonn gbenna; n lek dia yada labaar.

⁸ Li paak, ki nyɔɔt nba tee yentinu nyɔɔt dɔɔ guun sanpaapo; ki ti Yomdaanɔ wunba bu niib buut nan barmɔnii na tan sa turin nyɔɔt maŋ Daar maŋ daar. U tan kan tur min kuukɔɔ kaa, ŋaan u tan sa tur binba kur mun loon ki wun jen na.

Pɔɔl nan Timoti bannlee mɔbona

⁹ Yabit ki baar n peŋ yian yian na. Kreskens saan Galasiawa, ki Taitus mun saan Dalmasiawa,

¹⁰ Demas mantik loon tingbouŋ na bona bonchiann, li paak u nyikin ki mun saan Tesalonikawa.

¹¹ Luk kuukɔɔe ji be nanin. Jiin Mak baar nanɔ na, kimaan u toona mɔk nyɔɔt turin bonchiann.

¹² N tun Tikikus a wun saan Efesus.

¹³ Fi-i baat yoonba, fan jii n liatir nba ki n daan nyik Troas, ki li be Kapus boor ni; a bia jii n gbounpinkara nan n kadagbant na.

¹⁴ Aleksander wunba kur saauk na din tumin linba bi bonchiann; Yennu sa dat u tuba wa tun linba na paak.

¹⁵ I mi a mɔŋ nanɔ, kimaan u kɔn nan barŋanii nba ki ti mɔɔntir na bonchiann.

¹⁶ Ma daan kɔn n mɔŋ paak sinsinn na, sɔɔ ki set n poorpo; bi kur nyikima; Yennu daa teemm biit li paaki.

¹⁷ Ŋaan ti Yomdaanɔ daan be nanin ki turin paŋ ki n daan fit mɔn barŋanii maŋ kur ki tur binba ki tee Juu teeb na kura a bin gbat. Ŋɔɔe daan nyinnin yambɔr mɔb ni.

¹⁸ Ŋɔɔe bia sa nyinnin bonbiit kura ni, ki kunnin ki kɔɔnin u naan nba be sanpaapo nan laafia. Ŋɔɔe yen dontir nan yoo nba kaa gbennu. Mɔmɔmm.

Foontii nba joont labaar

¹⁹ N jikit n foontii ki teen Prisila nan Akuila, nan Onesiforus ŋaateeb.

²⁰ Erastus daan biar Korinta. Trofimus daan kaa laafia ki n daan nyikɔ Miletus.

²¹ Yabit ki baar nnawa ki tinkook-n do. Yubulus nan Pudens nan Linus nan Klɔdia teena bi foontii; ki Masiaweira kura bia foonta.

²² Ti Yomdaanɔ-ii be nana. Yennu sommir-ii be i ni.