2 Timoti 3 - Yennu Gbounpaauŋ Mɔɔr

Dajoontii labaar

¹ A mi nan tingbouŋ na dajoontii yoo tan sii paar.

² Niib tan sii tee jawudamme, nan likilonna, nan karinbaanii damm, nan garukdamm, nan binba sukii niib, nan binba ki saak bi damm mɔi, nan binba ki tian ŋamm po, nan binba ki tiin Yennu;

³ bi tan kii mɔk loomm nan niibi, bi tan sii tee mɔlanfikdamme, ki kan soor bi mɔŋi, ki sii tee kpikpiruk damm; ki sii naan bonsosoot; bi tan sii nan toonŋanae,

⁴ bi tan sii nyi leeb poae, ki tee nikaatkaatdamm, ki dont bi mɔŋ; bi tan sii loon bi mɔŋ mɔŋ loomme ki gar Yennu,

⁵ bi tan sii dia Yenjiantu sanne, ŋaan ki saak Yennu paŋ. Nyint a mɔŋ li nibooru ni.

⁶ Bisiabe lin ki doi ŋei ki kpann pooliinii nba tuu tuun toonbiit bonchiann ki waa bi para nianbiit booru booru, ki nyint bi yan.

⁷ Yoo kura, li poob tumiie ŋaan kan mi bann barmɔnii sɔnu.

⁸ Janes nan Jamberes nba din ki sak nan Moses biaŋinba na, li jabooru mun tee nnee, bi kɔn nan barmɔnii, bi dudukit bia ki ŋani, bi bia ki waa yada na sɔnu;

⁹ ŋaan bi kan fit kpann niib ki yukiri, kimaan sɔɔ kur tan sa la bi jatii nba tee biaŋinba kaman nan ba din la Janes nan Jamberes jatii nba din tee biaŋinba na.

Kpaanjoontik labaar

¹⁰ Ŋaan fin ŋanin poŋ wei n wannu nan n binbeŋ, nan n dudukita. A poŋ mi ma teen Masia yada biaŋinba, nan n sukuru, nan n loomm nan niib, nan n gbankur,

¹¹ nan niib nba mukisin biaŋinba, nan n fardinu. A mi linba kura tumin Antiok, nan Ikonium nan Listra. A mi ma din la muksubiit biaŋinba; ŋaan ti Yomdaanɔe din nyinnin li kur ni.

¹² Barmɔniie, niib sa mukis wunba kur loon wuu tee yentinɔ Yisa Masia paak na;

¹³ ki nibiit nan kpinkpannii damm lek tan sii ŋammit pukii bi bitime, ki kpann leeb, ki bi leeb mun sa kpannib.

¹⁴ Ŋaan fin ŋanin, a dia barii nba ki a tumii ki teenir yada na, kimaan a poŋ mi nan binba din tee a wannteeb na tee barmɔnii damme;

¹⁵ ki a bisin niwa a poŋ mi Yennu gbouŋ nba fit teena yan ki wanta fa sa teen Yisa Masia yada ki tinn biaŋinba na.

¹⁶ Maan kur nba be Yennu gbouŋ ni na nyii u mɔb nie, ki li kura mɔk nyɔɔte, ki wantit u po, ki kpaanit, ki ŋammit ti benu, ki wantit yentinu sɔnu,

¹⁷ a nisɔɔ nba jiantir Yennu binbeŋ-ii ŋan, ki wun teen siir kii tuun toonŋana booru kura.