2 Timoti 2 - Yennu Gbounpaauŋ Mɔɔr

Yisa Masia lanjiŋanɔ labaar

¹ N bik, fin ŋanimi chee a par Yisa Masia nba somma biaŋinba u ninbatinu na paak.

² Fa poŋ din gbat wannu nba n peŋ niib bonchiann boor ni na, a jiir ki wann nisiab nba tee yadadamm, binba mun sa fit wann nileeb mun.

³ A sak nan fardinu Yisa Masia paak kaman nan lanjiŋanɔ na.

⁴ Lanjima wunba loon u saakɔɔ numm-n gboou, u ji ki ŋmat u binbeŋ nan linba ki tee lanjimanba toona ni.

⁵ Wunba tiin poot nantaar kan fit nyann ki gaar li nyɔɔt, see ki u sak wei poot sennu kur.

⁶ Li kpaa talas ki kpaarɔ nba tun nan ninmɔnn-n gaar jeet sinsinn tor.

⁷ I dukii linba ki n beera na po, kimaan ti Yomdaanɔ sa te ki fan fit bann li kura paak.

⁸ I tian Yisa Masia po; u din fiir kuun ni, ki din tee David yaaboonn; kaman nan ma mɔn barŋanii ki wann niib biaŋinba na;

⁹ barŋanii maŋ paak, ki n be nan jarit ki di fara kaman nan biitdaanɔ na; Yennu barii maŋ ŋanin ki be jarit ni.

¹⁰ Ŋaan Yennu nigannkab na paak ki n lek di sukuru fara kura ni, a bin mun la tinnu Yisa Masia paak, kii mɔk parpeenn nba kaa gbennu na.

¹¹ Barii nee tee mɔmɔmm: “Ti-i kpo nanɔ, ti mun tan sii mɔk manfoor nanɔe.

¹² Ti-i ŋammit yabii, ti mun tan sa di naan nanɔe; ŋaan ti-i yaa a ti ki miu, u mun tan sii yaa a u ki miti;

¹³ ti-i ji kii mɔk yada, ŋaan ŋɔɔe mantik tee barmɔnii daanɔ, kimaan u kan mi nɔi u mɔŋ binbeŋi.”

Toontunnɔ nba sa penn Yennu par na labaar

¹⁴ A tiar a niib linba na, ki turib kpaanii Yennu boor a bi daa kɔn mɔbona paaki; ŋann ki mɔk nyɔɔt, ŋaan li biir binba gbiin nee.

¹⁵ Yabit a mɔŋ paak ki Yennu-n paka, kii tee toontunnɔ nba dia barmɔnii mɔmaan ki want niib fanu ki tan kan di fei u toona paak.

¹⁶ A nyinn a mɔŋ labafaanu nba ki tee Yennu yari ki bia ki mɔk nyɔɔti, ki sa te ki niib-n fɔkit nan Yennu.

¹⁷ Li wannbooru naan nan nar fiauk nba tuu di gbanant nee. Haimeneus nan Filetus daan want li wannu boorue.

¹⁸ Bi ki want niib barmɔnii labaar, ŋaan tuni nisiab yada ki yaa a ti kuunfiiru na yoo poŋ taan baar gara;

¹⁹ ŋaan Yennu nigannkab ŋanin see, ki kan mi ki dammi; ki mɔbona nba sɔb pukin bi paak tee nnee a: “Ti Yomdaanɔ mi binba tee u yab,” ki bia sɔb a, “Wunba kur yet a u tee ti Yomdaanɔ yɔɔe, li kpaa talase ki wun nyik toonbiit tumu.”

²⁰ Ŋmanbooru bonchiann be ŋasaakak ni; kut sɔnt kuukɔɔe kaa li ni, ŋaan ŋmanmɔni nan senii mun bia be. Ki li siab nyɔɔt yab bonchiann, ŋaan ki siab nyɔɔt ki yabi.

²¹ Wunba-i nyik biit ki tee popeendaanɔ, u sii tee kaman nan ŋmaŋ nba mɔk nyɔɔt ti Yomdaanɔ boor, ki jaŋ nanɔ, ki teen siir a wun tun toonŋana kura.

²² Nyint a mɔŋ nan naasimm nianbiiuk ni, ŋaan kot ki fin nan binba para yeen ki bi yi ti Yomdaanɔ ki loon sommir na-n wei yentinu sɔnu, nan yada sɔnu, nan loomm sɔnu, nan parmaasir sɔnu.

²³ A tin ki nyik jatii nan li mɔniat. A poŋ mi nan li joontir nan kunkɔnae.

²⁴ Li ki ŋan ki ti Yomdaanɔ toontunnɔ-ii kɔn nan niibi. Li ŋan ki wuu tee burchimɔe sɔɔ kur boor ni, kii tee wanntɔŋanɔ nba mɔk sukuru,

²⁵ kii tee wunba dia soonna binbeŋ kii kpaan binba nɔi nanɔ na, kimaan li pasiar Yennu-n tan turib yaak ki bin nyik bi dudukbiit ki bann barmɔnii wannu,

²⁶ ki la yan ki lɔkit Sintaanii barit, a bin ji sak ŋɔɔ Yennu loomm.