2 Timoti 1 - Yennu Gbounpaauŋ Mɔɔr

¹ Min Pɔɔl wunba tee Yisa Masia toomii Yennu loomm paak na, a n mɔɔnt manfoor nba ki Yennu din lor turit Yisa Masia paak na,

² n sɔb gbouŋ na ki teen n bilonkak Timoti. Ti Baa Yennu nan ti Yomdaanɔ Yisa Masia-n somma, ki bia tina ninbaauk, ki bia tura parmaasir.

Niipoouk turu nan kpaanii labaar

³ Yennu nba ki n jiantirɔ nan dudukŋant kaman nan n yejamm nba din tuun biaŋinba na, mi-i meiɔ, n tian a po yoo kura n Yenmiaru ni, nyiɔk nan yennu ni, ki teenɔ niipoouk a paak.

⁴ N tian a ninnyuut po, ki lek loon ki n la-a kii mɔk parpeenn bonchiann.

⁵ N tian fa teen Yisa Masia yada nan barmɔnii biaŋinba; ki a yaa Lois nan a naa Yunis mun poŋ din teenɔ yadawa. N ki mɔk birsuk nan a mun bia teenɔ yada.

⁶ Li paak, ki n tiana ma fan fiin piinii nba ki Yennu tura yoo nba ki n din jii n nii yii a paak na,

⁷ kimaan Seyeeŋ nba ki Yennu turit na ki teenit jaŋmaandamm kaa, ŋaan Seyeeŋ maŋ teent paŋ nan loomm, nan dianmɔŋ binbeŋ.

⁸ Li paak, mɔɔntir ti Yomdaanɔ labaar ki daa tiin fei. A bia daa tiin fei nan ma kɔɔ dansarik u paak na, ŋaan sak nan fardinu u barŋanii maŋ paak, kaman nan Yennu nba tura paŋ biaŋinba na.

⁹ Ŋɔɔ Yennue tinnit ki yiinit a tii tee popeendamm; wa yiinit biaŋinba, li ki tee ti toonŋana paak kaa, ŋaan u mɔŋ din senn a u sa tint ninbaauk Yisa Masia paak; u din senn nnee yoo nba ki u daa ki nan dunia na.

¹⁰ Ŋaan ti Tinntɔɔ Yisa Masia baaru paake ki u fiit wannit li po; ki ŋɔɔ Yisa Masia din biir kuun paŋ, ŋaan bia wannit a ti-i sak u barŋanii maŋ ti sa la manfoor nba kaa gbennu.

¹¹ Yennu poŋ din yiinin a n teen toomii nan wanntɔɔ ki mɔɔnt barŋanii maŋ.

¹² Li paake te ki n di fara dansarik ni; ŋaan ki n ki tiin fei, kimaan n mi ma jii n mɔŋ ki teen wunba nuu ni, n mi ki birsuk kaa nan u sa fit dia linba ki n jii ki teen u nuu ni na fanu mɔkmɔk nan Daar maŋ daar.

¹³ I dia ma din wanna barŋanii sɔnu na fanu, kii waa-r nan yada nan loomm nba ki Yisa Masia teent na.

¹⁴ Yennu Seyeeŋ paŋ nba be ti ni na paak, i dia barŋanii nba ki u jii ki teen a nuu ni na.

¹⁵ A poŋ mi nan sɔɔ kur nba be Asia na nyikima; bi siabe tee Fijelus nan Hemojenes.

¹⁶ Ti Yomdaanɔ-n tin Onesiforus ŋaateeb ninbaauk, kimaan u daan yoo cheen n par. U daan ki tin fei nan ma kɔɔ dansarik na paak;

¹⁷ ŋaan wa daan tan baar Rom yoonba, u daan piin loon ma be siame nan wa daan tan la n boor.

¹⁸ Ti Yomdaanɔ-n tinɔ ninbaauk Daar maŋ daar. A mɔŋ mi fanu wa din sommin bonchiann biaŋinba Efesus ni.