2 Tesalonika teeb 2 - Yennu Gbounpaauŋ Mɔɔr

Nifobiiuk labaar

¹ N naa waas, ki jikit saa ti Yomdaanɔ jenu maŋ nan timm nan ŋɔɔ nba tan sa chet leeb ki taan be na po,

² n loon ki n beti ki i daa mɔk jijeet i para ni amii jekiruk nan nisiab nba yaa a daar maŋ poŋ baara na po. Li pasiar bi beeri a timm din yet nna sɔkinii mɔmaan wannu ni, amii barii ni, amii gbouŋ ni.

³ I daa te ki sɔɔ kpanni gbaa, kimaan li daar kan baar see ki mɔyêtuk yoo baar sinsinn, yoo nba ki niib bonchiann tan sa yêt Yennu mɔb na; ki nifobiiuk bia tan sa nyi paanuwa; ki Yennu poŋ sennɔ a u sa biirɔ.

⁴ U tan kan sak Yenjiantu nan jiantii kura, ŋaan jɔɔb u mɔŋ teen yudaanɔ nba gar linba ki niib jiantir kura. U tan sa kɔɔ Yenjiantu diiuk ni gbaa ki pur u mɔŋ Yennu.

⁵ Ma din be i boor ni yoonba na n din beti linba na kura; i ki tianii?

⁶ Siare lek daa diau; i mi la tee linba, ŋaan ki u tan sa dɔkit Yennu tiauŋ yoo maŋ nie.

⁷ Ki nifobiit ŋanin poŋ be ki tuun bi toona woonin ni, ki wunba diab nee lek daa sii diab mɔkmɔk nan yoo nba ki Yennu tan sa berɔ.

⁸ Ki yoo maŋ ki nifobiiuk maŋ tan sa nyi paanu ni, ki ti Yomdaanɔ Yisa tan sa kpiu nan ŋɔɔ Yisa tiauŋ mɔmaan, ki ŋɔɔ Yisa baaru nan u yentchiauŋ tan sa biirɔ.

⁹ Nifobiiuk maŋ tan sa baar nan Sintaanii yaake ki tuun yaarlituk nan bakitnauŋ toonboori kur a wun kpann niib.

¹⁰ U tan sa jɔɔb faak boori kur ki kpann binba ki Yennu tan sa biirib na. Bi tan sa biira, kimaan ba ki loon barmɔnii nba bo sa tinnib maŋ ki yêtir na paak.

¹¹ Li paake te ki Yennu te ki faak paŋ tuun bi ni, ki bi tee linba ki tee barmɔnii na yada.

¹² Yennu tan sa biir binba ki teen barmɔnii maŋ yada ŋaan loon toonbiit tumu na.

Yennu nba ganni ki tinni biaŋinba

¹³ Ti naa waas, yimm nba ki ti Yomdaanɔ looni na, li kpaa talas ki ti pak Yennu yoo kur i paak, kimaan Yennu din ganni pinpiik neewa a yin la tinnu. I din teen barmɔnii barŋanii yada, ki u Seyeeŋ bia ŋammi ki teeni popeendamm, li paak te ki i la tinnu na.

¹⁴ Ta din mɔɔnt barŋanii nba ki turi na, ki Yennu yiini ki tinni a yii be fanu kaman nan ti Yomdaanɔ Yisa Masia nba be biaŋinba na.

¹⁵ Ti naa waas, li paak, setir man chib, ki dia wannu nba ki ti din wanni ti mɔmaan ni, nan ti gbouŋ ni na.

¹⁶ Ti Baa Yennu nan ti Yomdaanɔ Yisa Masia binba loonit ki turit pardɔɔnn nba kaa gbennu nan dindann nba yab u ninbatinu paak na,

¹⁷ bin kɔɔnni para ki turi paŋ ki yin fit tun linba ŋan kii bia piak barii nba ŋan yoo kur.