2 Piita 3 - Yennu Gbounpaauŋ Mɔɔr

Ti Yomdaanɔ Yisa jenu mɔsonn labaar

¹ N naa walonkai, ma sɔbin gbouŋ nba ki teeni na ji pukii gbant ŋannlee na. Li gbant ŋannlee na kur ni, n poŋ tiari bont na po, ma n fiin i dudukŋant.

² N loon ki yii tian mɔmaan nba ki Yennu sɔkiniinbaŋamm din pak li po yaayoo ni na, kii bia tian sennii nba ki ti Yomdaanɔ, wunba tee ti Tinntɔɔ na nba din pak, ki timm nba tee u toomiinba din beti na po.

³ Sinsinn, n loon ki yii tian nan nisiab nba waa bi para loonbiit tan sii be dajoontii ni, ki tan sii sarikiti,

⁴ ki yeen a, “Yisa Masia nba din senn mɔsonn a u tan sa jen na, ŋɔɔ lia-aa? Ti baanba nba poŋ din kpowa nan dinna, bonsiar kur kpan tee kaman nan la poŋ tuu tee biaŋinba dunia pinpiik ni nee.”

⁵ Li niib ki saak bin tiar nan Yennu din yet mɔmaame ki nan sanpaak nan tiŋ yaayoo ni; ki din nyinn tiŋ na nyun ni ki te ki li be nyun na sinsuuk ni,

⁶ ki bia din te ki nyun dii tingbouŋ maŋ ki li biir.

⁷ Ŋaan ŋɔɔ Yennu mɔmaame bia lek sii dia sanpaak nan tiŋ nba be mɔtana na mɔkmɔk nan yoo nba ki u tan sa te ki li kura-n di muu, ki biir biitdamm, kimaan li daar u tan sa bu bi buut ki biirib.

⁸ N naa walonkai, i daa tammit barii na po; ti Yomdaanɔ boor ni ŋanin, dayennkɔɔ tee kaman nan binna tusae; ki binna tusa mun bia tee kaman nan dayennkɔɔ nee.

⁹ Nisiab dukii a li tan sa yukir nan ti Yomdaanɔ-n tun mɔsonn nba ki u din senn na, ŋaan li ki tee nna; li tee a u mɔk sukuru nani; u ki loon ki sɔɔ-n tan mann kɔɔ muu ni, u loon ki sɔɔ kur-n nyik u biite ki la tinnu.

¹⁰ Ti Yomdaanɔ daar maŋ baaru tan sii tee kaman nan nanyukɔɔ baaru nee. Li daar maŋ, ki sanpaapo sa gbenn nan fujaann; ki muu nba di bonchiann tan sa di sanpaapo bonsiar kur, ki tingbouŋ na nan bonsiar kur nba be leŋ tan sa di muue ki gbenn.

¹¹ Ki bont na kur nba tan sa di muu nna na, i dukin sɔɔ li ŋan ki yii tee niboor bee mani? Li ŋan ki yii mɔk binbenyeeŋ, kii tiin Yennu,

¹² kii guu Yennu daar maŋ, ki yabir i mɔŋ paak ki daar maŋ-n baar yian. Li daare ki sanpaapo tan sa kab ki biir, ki muu na tonu tan sa nann sanpaapo bonnankaa.

¹³ Ŋaan ti guu yoo nba ki sanpaak paann nan tiŋ paann tan sii be kaman nan Yennu nba din senn mɔsonn nba na, ki popeenn toona kuukɔɔ sii be leŋ maŋ.

¹⁴ N naa walonkai, ya guu bona maŋ na paak, yii yabir i mɔŋ paak kii mɔk parmaasir, nan binbenyeeŋ, ki daa mɔk biit Yennu boori.

¹⁵ Ti Yomdaanɔ nba di sukuru ki daa ki jen mɔtana na, u loon ki yin bann nan u teen niibe yaak a bin la tinnu sinsinn na ki wun jen. Ti naa bilonkak Pɔɔl mun daan sɔb gbounsiɔk ki turi ki beti linba nawa, kaman nan Yennu nba turɔ yan ki u dia biaŋinba.

¹⁶ U gbant kur ni, u din sɔb ki piak Yennu daar maŋ po labaare, ki wanti li labaar. Labasia be u gbant na ni ki paar nan nirɔ-n bann li paak, ki nisiab nba ki mɔk yan ki bia ki mɔk ba see siami, bi jikitir ki kpintir faake, kaman nan ba tuu kpintir Yennu gbouŋ maŋ paak bolia ni biaŋinba na. Li paake te ki Yennu tan sa dat bi tuba.

¹⁷ N naa walonkai, i poŋ mi ba tee biaŋinba. Yimm nba waa barmɔnii na, yi bann i yan ni man, ki daa waa biitdamm faak sɔnii na, ŋaan yabir ki daa baa i sinsee boa.

¹⁸ Yi ŋamm gaar ti Yomdaanɔ Yisa Masia wunba tee ti Tinntɔɔ na sommir ki pukin man, kii tumii u mɔmaan na. Ŋɔɔe yen dontir ki jikit saa nan yoo nba kaa gbennu. Mɔmɔmm.