2 Piita 2 - Yennu Gbounpaauŋ Mɔɔr

Faak wannteeb labaar

¹ Faak sɔkiniinba nba din be Juu teeb sinsuuk ni sianyoo biaŋinba na, nnee ki faak wannteeb mun bia sii be i sinsuuk ni, ki wanti faak wannu woonin ni, linba sa biiri. Bi sa yêt ti Yomdaanɔ Yisa wunba din daab na gbaa; ki Yennu sa dat bi tuba yiama.

² Niib bonchiann sa weib ki mun tuun bi mɔŋ loonbiit tumu. Bi paak ki niib sa fiak barmɔnii sɔnu na.

³ Bi sii mɔk nianchiauŋ, ki sii kpanni ki ŋmabi. Yoo nba din gar na Yennu poŋ din yet a bi tee biitdamme, ŋaan li ji kan yukir ki u sa dat bi tuba.

⁴ Malakanba nba din tun toonbiit na, Yennu din ki nyik bi tubdatu. U din jii jɔrite ki lorib ŋaan jiib lu muu nba kan mi kpeen na ni; muu maŋ be bootuk nba sumii bonchiann nie, ki bia bɔn bonchiann; bi sii be nni mɔkmɔk nan daar nba ki u tan sa bu bi buut.

⁵ Nnee biak, u din ki nyik yaayoo ni tingbouŋ niib na. U din te ki nyume dii tingbouŋ maŋ, ki kpii binba kur ki tiinɔ na, ŋaan tinn Nowa, wunba din mɔɔntir Yenweiu po, ki din tinn u ŋaateeb bannlore ki pukin u paak.

⁶ Ŋɔɔ Yennu bia din biir doi nba yi Sodom nan Gomora, ki te ki bi dii muu ki kab kpant tanpent, ki kpii doi maŋ ni niib kura. Linba nee tee siara ki want biitdamm wa tan sa dat bi tuba biaŋinba.

⁷ U bia din tan tinn Lot, wunba din tee niŋanɔ na. Biitdamm nba din tuun bi gbanant loonbiit biaŋinba na, li din biir ŋɔɔ Lot par ni bonchiann.

⁸ Lot, jaŋanɔ maŋ, din be bi doo nie, ki laat bi toonbiit, ki gbia ba piak bi mɔbonbiit biaŋinba. Ba din tuun toonbiit yoo kur biaŋinba na, li din biir u par ni bonchiann, kimaan u din tee niŋanɔe.

⁹ Ti Yomdaanɔ Yennu mi biaŋinba ki u sa fat niib nba tiinɔ, ki nyinnib muksuk ni, ŋaan dat biitdamm tuba mɔkmɔk nan daar nba ki u tan sa bu bi buut na.

¹⁰ Niib nba waa bi gbanant loonbiit ki tuun bonchonchonn toona, ki sian yudamm, Yennu tan sa dat li damm tuba ki gar wa tan sa dat nileeb tuba biaŋinba nawa. Faak wannteeb maŋ nba be i sinsuuk ni na, bi tee tubkangbata damme, bi ki tiin sɔɔ. Bi sukii malakanbae ki ki mɔk jaŋmaanii.

¹¹ Malakanba mɔk paŋ nan yikoo ki gariba, ŋaan bi ki yeen biit ki jiint bi po ti Yomdaanɔ boori.

¹² Li nibooru ki mi malakanba nba be biaŋinba, ŋaan sukiib. Niib maŋ ki mɔk dudukiti; bi tuun linba ki bi loon, ki naan nan muuk ni bonkobibiit nba ki niib tuu soorib ki kpib nee. Bi mɔŋ toonbiite sa mantik biirib;

¹³ bi toonbiit nyɔɔt sii tee biite. Bi lek tuun bi gbanant loonbiit yeenin ni. Bi-i be i ni yoonba, bi tee kaman nan jakint nba tuu taab chinchenn paak biaŋinba nee. Bi-i di jeet nani yoonba, ŋaan bi lek dukii bi toonbiit poe.

¹⁴ Bi-i la poochonchonn, bi ki nyikit u bandakiri, ki bia kan nyik bi biiti. Bi kpann niib nba ki mi Yennu sɔnu fanue ki boontib. Bi para ni, bi tumii nianchiauŋo, ki te ki Yennu mɔtomm be bi paak.

¹⁵ Bi ki saak ki waa sɔnu nba tooki, ŋaan tokii sɔnganu; bi waa Beor bija Balaam nba din waa sɔnu nba nee. U din loon toonbiit nyɔɔte,

¹⁶ ki Yennu din kpaanɔ u toonbiit paaka, ki u boŋ din pak nanɔ nan nisaarik kunkɔr ki kpaanɔ a wun nyik u waat toona.

¹⁷ Niib maŋ booru tee kaman nan bunbunn nba kaa nyun nee; bi tee kaman nan sayuŋ nba ki wouŋ tuu gaanɔ nee. Yennu tan sa jiib ki lub bunbɔnchiauŋ ni, mɔkmɔk nan yoo nba kaa gbennu.

¹⁸ Bi piak karinbaanii barii nba ki mɔk nyɔɔte a bin kpann niib nba yabit bi mɔŋ a bin nyik biitdamm, ki kpannib a bii tuun gbanant loonbiit kii tuun bonchonchonn toona,

¹⁹ ki beerib a bi tan sa la mɔŋ-fatu, ŋaan ki bi mɔŋ tee biit daaba, kimaan bonsiar nba nyann nirɔ, li bont tuu dia nirɔ maŋ daabsin ni.

²⁰ Niib nba din mi ti Yomdaanɔ Yisa Masia, wunba tee ti Tinntɔɔ, ki poŋ din nyik biit nba be tingbouŋ nna na, li biit maŋ-i jiki taŋŋi jen ki nyannib, bi joontu tan sii bi ki gar bi pinpiik nba din tee biaŋinba nawa.

²¹ Bi-i bo-i kii mi popeenn binbeŋ, li bo sii sɔ nan ba bannir ŋaan ji ki sak barŋanii nba ki bi din gbat na.

²² Bi tuun gbeent barjokit nba yet biaŋinba nee a “Bɔke tuu ŋmat ki di u mɔŋ siit,” ki “Doorik-i wuur nyun ŋaan u tuu ŋmat ki gbar u mɔŋ nan bakire.”