2 Korint teeb 9 - Yennu Gbounpaauŋ Mɔɔr

Leeb sommir labaar

¹ Li ji ki kpaa talas ki n bia sɔb gbouŋ ki beti biaŋinba ki i sa somm Yennu niibi.

² N mi nan i loon ki yin sommib. N daan paki Masedonia teeb boor ni, ki betib biaŋinba ki yimm nba be Akaya tingbouŋ ni na din loon ki yin somm Yennu niib binnpo na. I numm nba din mɔn Yennu niib sommir paak na, li din te ki bi mun loon ki bin sommibe.

³ N loon ki n te ki ti naa waas na-n saan i boor nie ki la nan ta piaki biaŋinba na, li set tee mɔniie; i sii be kaman nan ma yetib biaŋinba na, ki teen siir ki gaar likirii na.

⁴ Nna-i kaa, ki Masedonia tiŋ ni niib maŋ tan wein ki baar i boor ni, ki sɔɔ ki i daa ki teen siiri, li sa dinnin feiwa; ki li kii tee min kuukɔɔ kaa sa di fei, ti kurae sa di fei, kimaan ti daan paki bi boor niwa.

⁵ Li paak, n dukin a li ŋan ki n barin ti naa waas na ki bin dɔŋ gar n tɔɔnn po ki saan i boor ni ki saa sommi ki yin gaar likirii maŋ kaman nan ya daan senn i mɔsonn biaŋinba na, ki mi-i taŋŋi baar yoonba man la ki i poŋ gaar tonta. Ŋanne sa wann nan i gaarir nan i mɔŋ loomm nee, ŋaan ki sɔɔ kaa mia-i ki i gaari.

⁶ N beerie, wunba bur dii waaminna tan sa jaan waaminnae; ki wunba mun bur dii saama mun tan sa jaan saamae.

⁷ Wunba kur dukin u par ni a wun pi piinii biaŋinba, li yɔɔ-n pi nna, ki daa piin nan parbiiri, amii ki pi nan muksuku, kimaan Yennu loon nisɔɔ nba piin piinii nan parpeenne.

⁸ Yennu sa fit turi bonsiar kur ki i kan kɔŋ bonsiari. I sa la ki lin gar ya loon biaŋinba, ki fit somm binba kur ki mɔk na,

⁹ kaman nan la sɔb Yennu gbouŋ ni a “Wunba nuu ŋanin tian ki teen tarii, u burchintuk maŋ kan mi ki gbenni.”

¹⁰ Yennu nba teen niib diboorii ki bi buur, ŋaan bia teemm jeet ki bi di na, ŋɔɔe sa turi bont kur ki lin jaŋi ki gar, ki yin ji mantik somm niib.

¹¹ Li-i tee ki i sommit niib bonchiann, Yennu sa sommi bonchiann. Ya turit piinii a ti somm leeb na, li paak te ki niib bonchiann piak Yennu i piinii maŋ paak.

¹² Li-i tee ki i sommit Yennu niib ki teemm linba ki bi ki mɔk, li sa te ki niib saama-n tur Yennu niipoouk bonchiann.

¹³ Li-i tee ki i sommitib, ŋanne sa wannib nan i set gaar Masia barŋanii ki sakira, ki i nuu tian ki i chentir namm nan niib kur ya mɔk linba. Ŋanne sa te ki bin dont Yennu sann,

¹⁴ ki miarɔ ki turi, kii looni, kimaan Yennue te ki i nuu tian bonchiann.

¹⁵ Ŋaant man ki tin tur Yennu niipoouk, kimaan ŋɔɔe turit u Bija nba gar piinii kur saaka.