2 Korint teeb 8 - Yennu Gbounpaauŋ Mɔɔr

Yisa niib piinii labaar

¹ Ti naa waas, ti loon ki i bann Masiaweira nba be Masedonia na nba tur Yennu piinii biaŋinba.

² Bi din la fara nan bikinn nan namu bonchiann, ŋaan bi lek mɔk parpeenne. Bi namu ni ŋaan bi din wann burchint ki tur Yennu piinii bonchiann.

³ N sa fit teen bi siara nan ba din mɔk linba, bi din turɔ nan bi paŋ terike, ki poŋ din saa gar ba bo sa turɔ biaŋinba gbaa;

⁴ ki din barint a tin gaar bi piinii maŋ ki tur Yennu niib nba tee tarii na. Li din tee bi yanbɔɔte nan bin turib.

⁵ Bi din tur ki li gar ta poŋ din dukii a bi sa tur biaŋinba. Sinsinn bi jii bi mɔŋe ki tur ti Yomdaanɔ, ki lian fit jii bi mɔŋ ki tur timm, Yennu loomm ni.

⁶ Ŋaan yimm ŋanin, Taituse daan te ki i piin ki gaan likirii ki teen Yennu. Ti din betɔ a wun yabir ki sommi ki yin tun likirii toona maŋ kur ki gbenn nan loomme.

⁷ Tɔn, i teen Yisa yada, ki mi u labaar fanu, ki fit piak leeb u mɔmaan, ki waau nan ninmɔnn, ki bia loonit; ya tuun linba na kur bonchiann na, ti loon ki yii tuun toonŋana maŋ mun nnee bonchiann.

⁸ Li ki tee ma yeeni linba na a n mukisi kaa a yin tur; n poŋ beti biaŋinba ki Yennu nisiab nunbinn mɔn nan bin turɔ piinii, a lin te ki n bann biaŋinba ki i mun loonɔ.

⁹ I mi ti Yomdaanɔ Yisa Masia nuu nba yaa biaŋinba. U tee mɔkitɔɔe, ŋaan ki i paak ki u din kpant tarik, ki u tarik kpantu maŋ paak te ki yimm ji teen mɔkita.

¹⁰ Ma sa beti mɔbonn nba tee nnee: ya din piin ki gaan likirii nba binnpo na, li ŋan ki yin gaar ki tont dinna. Yimme din dɔŋ leeb ki loon Yennu piinii turu, ki bia din piin ki gaan li piinii. Yi yabir i mɔŋ paak ki gaarir ki tont man. I nunbinn din mɔn nan piinii maŋ gaaru.

¹¹ Yi ŋaan ki i nunbinn-ii bia mɔn piinii turu paak, kaman nan ya sa fit tur biaŋinba, ki gaar linba tenna tont.

¹² Nisɔɔ nba loon ki wun tur Yennu piinii, ŋaan turɔ kaman nan wa mɔk biaŋinba, Yennu sa gaara. Yennu ki loon ki nirɔ-n turɔ ki gar wa mɔk linba.

¹³ N ki loon ki yin tur leeb ŋaan di fara li paaki. N loon ki i kur-ii jamme.

¹⁴ Linba te ki n yeen na tee nnee: ya mɔk ki li yab mɔtana na, li ŋan ki yi somm binba ki mɔk na, ki li-i tee ki i mun tan ki mɔk yoonba, ŋaan ki bi mun mɔk ki li yab, bi mun sa sommiiwa. Ŋanne sa te ki i kur-ii jan nan leeb,

¹⁵ kaman nan la sɔb Yennu gbouŋ ni biaŋinba na a “Wunba din la bonchiann na, u din ki dii ki tenni; ki wunba la waaminna na, li din ki pɔtɔ.”

Taitus nan u toontunleeb labaar

¹⁶ Ti piak Yennu nan wa te ki Taitus baka be i ni kaman nan ti baka nba mun be i ni biaŋinba na;

¹⁷ kimaan ta barimɔ a wun saan i boor ni na, u saka; ŋaan u mɔŋ mɔŋ numm mɔn nan wun saan i boor ni; ki u yaa wun saan nan u mɔŋ loomm.

¹⁸ Ti tan sa te ki ti naa bisɔɔ-n weiɔ ki saan i boor ni. Ti naa bik maŋ nba mɔɔntir Masia barŋanii biaŋinba na paak te ki Masiaweira kur piakɔ bonchiann.

¹⁹ Bi bia gannɔ a wuu waa-t ki ti somm Yennu niib nba tee tarii na. Linba nee sa dont ti Yomdaanɔ sann, ki bia wannib nan ti set loon ti leeb sommir.

²⁰ Ti tan sa jii likirii bonchiann ki saa sommib, ŋaan ti ki loon ki sɔɔ-n pak biir ti sann a ti loon li likirii na ni siari.

²¹ Ti Yomdaanɔ mi nan ti tuun nnee nan li sɔnu, ki ti loon ki niib-n mun bann nan ti set tuun nan li sɔnue.

²² Li paak, ti sa tun ti naa bilɔɔ mun ki wun chian Taitus nan u weinanlɔɔ ki bin tɔk baar i boor ni. Yoo kur, ti laat ti naa bik maŋ binbeŋ nba tee biaŋinba, ki bann nan u numm set mɔn Yennu toona paak, kimaan u ki mɔk birsuk i paaki. Ŋanne te ki u mantik loon ki wun saan i boor ni.

²³ Nisɔɔ-i boi-i Taitus labaar po, yin betib a u tee n toontunlɔɔe wunba sommitin ki n beeri Masia barŋanii. Nisɔɔ-i boi-i ti naa waas nba waa Taitus na labaar po, yin betib a bi tee Masiaweira toontunnae, a bi binbenŋaŋ paake te ki niib dont Masia sann.

²⁴ Yi wann ti naa waas maŋ nan Masiaweira kura ya loomm biaŋinba, a bin bann nan ta daan piaki biaŋinba bi boor ni na, li tee mɔniie.