2 Korint teeb 7 - Yennu Gbounpaauŋ Mɔɔr

¹ N naa walonkai, Yennu nba senn mɔsona ki turit na paak, yi ŋaan ki ti nyik linba kur tee toonbiit, nan linba kur tee dudukbiit, ŋaan tiin Yennu, kii tee popeendamm nan barmɔnii.

Pɔɔl parpeenn labaar

² Yii loonit man. Ti ki mi tun sɔɔ bonbiiri, amii ki tun siar ki biir sɔɔ, amii ki ŋmab sɔɔ.

³ N ki sɔb nna a n biiri kaa. Ti lek looni, kaman nan ma poŋ beti biaŋinba na. Mi-i lekii kpo amii ma be n manfoor ni, ŋaan ti lek sii looni.

⁴ N ki mɔk birsuk i paaki; n mɔk yuugontir nani, ki n par mei i paak bonchiann. Ti fardinu ni kur ŋaan n mɔk parpeenn nani.

⁵ Ta din baar Masedonia ti din ki fit foi. Ti din la muksuk lokir kur po; niib din kɔn nant Yennu mɔmaan na paak; jaŋmaanii din be ti para ni,

⁶ ŋaan Yennu nba maant binba mɔk parbiir na para daan te ki Taitus baar ti boor ni ki tan maan ti parawa. U baaru ti boor ni daan te ki ti para maak.

⁷ Ŋann kuukɔɔ kaa daan maak ti para, ŋaan u bia daan betit i binbeŋ nba tee biaŋinba; ŋanne mun daan te ki ti para maak. U daan betit a i nunbinn mɔn nan ki i bia lan, a i mɔk parbiir i toonbiit paak, a ki i nunbinn mɔn nan ki i saak n mɔb. Linba na te ki n mantik mɔk parpeenn.

⁸ Ma din sɔb gbouŋ nba ki turi na, li gbouŋ din turi parbiir waaminnawa, ki li din te ki n mɔ kɔɔbia i parbiir maŋ paaka, ŋaan mɔtana n ji ki mɔ kɔɔbia li paaki,

⁹ ŋaan n ji mɔk parpeenne. I parbiir maŋ paak kaa te ki n mɔk parpeenni. I parbiir nba te ki i nyik i toonbiit na paake te ki n mɔk parpeenn. Yennue din te ki i para biir i toonbiit paak, li paake te ki li gbouŋ mɔk nyɔɔt turi.

¹⁰ Kimaan Yennu-i te ki nisɔɔ la parbiir u biit paak, ŋanne sa te ki wun nyik u biit na ki la tinnu, ki li kan mi ki biir u par jikii; ŋaan tingbouŋ na parbiir ŋanin baat nan kuume.

¹¹ Yennu nba te ki i la parbiir na, i mɔŋ la biaŋinba ki li turi nyɔɔta; i baka be Yennu labaar ni, ki i bia loon ki i wann nan i ki mɔk biiti; i bia tiin Yennu; i loon ki i bia lan; i bia loon ki i tun Yennu loomm; i poŋ dat biitdaanɔ na tubira. Ya tun nna maŋ na, li set want nan i ki mɔk bisiat labaar maŋ ni.

¹² Ma din sɔb gbouŋ maŋ ki turi na, li ki tee nisɔɔ nba tun toonbiit na paak kaa ki n din sɔbiri, li bia din ki tee nisɔɔ nba ki u biirɔ na paak kaa din te ki n sɔbiri. N din loon ki yin bann i baka nba be ti boor ni na biaŋinba Yennu boor, ŋanne din te ki n sɔbir.

¹³ Ki ti para maak i powa. Ti bia mɔk parpeenn bonchiann, kimaan Taitus daan la pardɔɔnn i kur po, ki li daan teenɔ parpeenn, li paake te ki ti mun mɔk parpeenn.

¹⁴ N poŋ din paki u boor niwa, ki i ki te ki n dii fei. Ta poŋ tun beeri labaar nba kur na, ti beeri barmɔniie. Nnee mun, ta din piaki Taitus boor ni na, ti din piak mɔniie.

¹⁵ U tiar ya daan gaarɔ saauŋ biaŋinba ki baakɔ, ki bia baak wa daan beti linba na, ki sakir. Ŋanne te ki u mantik looni.

¹⁶ N mi nan i lek bia sii ŋammit tuun linba kur fane. Li paake te ki n mɔk parpeenn bonchiann.