2 Korint teeb 5 - Yennu Gbounpaauŋ Mɔɔr

¹ Kimaan ti mi nan gbanant nba ki ti mɔk mɔtana na-i taŋŋi kpo, ti mɔk ŋei nba ki Yennu sa turit sanpaapo, ki li ki tee nifosaarik kaa maa ŋei maŋi, ki li bia tan sii be nan yoo nba kaa gbennu.

² Li paak, ti ji kar kpiinee ki guu daar nba ki Yennu tan sa jii ti sei ki kɔɔn ŋaak maŋ ni.

³ Kimaan ti-i taŋŋi kɔɔ leŋ maŋi, ti sei ji kan mi ki kɔŋ binbeboori.

⁴ Ŋaan ti sei nba daa woo gbanant na ni na, ti kuriie. Li ki tee a ti ji ki loon gbanant na benu kaa, ŋaan ti loon sanpaapo gbanant na, a li daar ki manfoor na-n tan nak kuun ki lin gbenne.

⁵ Yennue ŋammit ki ti teen siir lebitu na po, ki turit u Seyeeŋ, ki li wantit linba ki u tan sa turit na po.

⁶ Li paak, ti mɔk parcheenn yoo kura, ki bann nan ti sei-i be tingbouŋ na gbanant na ni, ti kaa sanpaapo ti Yomdaanɔ boor ni;

⁷ kimaan ti waa yada sɔnue, ti ki waa linba ki ti ninbinn lar na kaa.

⁸ Ti mɔk parcheenn ki summan tin nyi gbanant na nie ki kun ti Yomdaanɔ boor ni.

⁹ Li paak, ti-i be tingbouŋ na ni, amii ti-i taŋŋi be u boor ni, ti ninbinn mɔn a ti penn u par nie.

¹⁰ Kimaan ti kur binbeŋ tan sa nyi paanu Masia tɔɔnn po barbuut daar, ki sɔɔ kur tan sa gaar piinii kaman nan u toona nba din tee biaŋinba tingbouŋ na ni na, la tan ŋanii, la bii, li fan nana.

Ta kpant Yennu yɔɔsinba Masia paak biaŋinba

¹¹ Ta tiin ti Yomdaanɔ biaŋinba na, li paak ki ti daak niib. Yennu mi ti binbeŋ nba be biaŋinba; ki n mɔk dindann nan i mun bia mi i para ni nan n binbeŋ nba be biaŋinba.

¹² Ti ki dont ti mɔŋ kaa i boor ni, ŋaan ti loon ki tin turi yaak ki yin fit fa parbia ti paak, ki fit pak tur binba gorii nifosaarik nanyer po ki mɔk yuugontir u paak, ŋaan ki gorii u binbeŋ ni na.

¹³ Ti-i tee ninkamaŋit dammie, Yennu paake te ki ti tee nna; ŋaan ti-i munii kii tee ninkamaŋit dammi, i paake te ki ti tee nna.

¹⁴ Masia loommu diat; ta ji bann nan ŋɔɔ niyenɔkɔɔe din gaar sɔɔ kur paak ki kpo na, li want nan sɔɔ kur din kpo nanɔe.

¹⁵ Ŋɔɔe din gaar sɔɔ kur paak ki kpo, a binba fo na, bi kii be ki tur bi mɔŋ kaa, ŋaan bi sii be ki tur wunba din gaar bi paak ki kpo ki bia fiir kuun ni nee.

¹⁶ Li paak, ti ji ki gorii nisɔɔ nanyer po kaa; ta din got Masia nanyer po biaŋinba na, ŋaan ti ji ki goriiɔ nna kaa.

¹⁷ Li paak, nirɔ nba be Masia ni, li yɔɔ ji tee nipaamɔɔe; u binbenkper kur ji gara; gotir man, binbenpaaŋ ji dɔkit li yɔɔ niwa.

¹⁸ Linba na kur nyi Yennu boore. Ŋɔɔe ŋammitit Masia paak, a ti ji daa tee u datai kaa, a ŋaan ti ji sii tee u yɔɔsinbae, ki bia turit u yiini maŋ toona a ti te ki niib-n mun kpant u yɔɔsinba.

¹⁹ Li want nan Masia nba din kpo na, ŋanne tur Yennu sɔnu a wun teen tingbouŋ na niib u yɔɔsinba, ki nyik chabib bi toonbiit, ŋaan jii u barŋanii nba wantib biaŋinba ki u teeb u yɔɔsinba na, ki teen ti nuu ni.

²⁰ Li paak ki ti ji tee Masia taatara ki Yennu te ki ti yi niib. Masia paak ki ti barimi a yin tunn ki teen Yennu yɔɔsinba.

²¹ Kimaan ti paake ki Yennu din te ki Masia wunba ki mi tun biit na din set timm biitdamm seenu ni, a tin la yentinu binbeŋ ŋɔɔ Masia ni.