2 Korint teeb 4 - Yennu Gbounpaauŋ Mɔɔr

Mɔkint nba be yɔkmaanu ni labaar

¹ Yennu ninbatinu paake ki u jii toona na ki teen ti nii ni, li paake te ki ti ki mɔk kpinkpangbatuku.

² Li paake te ki ti yêt bunbɔnn ni toona, nan bontiteet nba baat nan fei, ti ki tuun ki dɔk niib na, ti ki lebit Yennu maan ki kpann niibi, ŋaan ti mɔŋ be Yennu tɔɔnn ki mɔɔntir u maan paanu ni nan barmɔnii, a sɔɔ daa mɔk dudukbiit ki jii jiin ti bontiteet po.

³ Li paak, li-i tee ki Yennu barŋanii paak bɔrie, li bɔr binba kpet Yennu sɔnu ni na boor nie.

⁴ Bi ki teen Masia yada, kimaan Sintaanii nba ki tingbouŋ na niib jiantirɔ na dɔkint bi dudukite. Ŋɔɔe dɔkint bi nunii po a bi daa laat yentu nba dɔkit bi paak na. Li yentu nyi barŋanii nba want Masia paŋ na boor nie; ŋɔɔe tee Yennu naauŋ.

⁵ Ti ki mɔɔntir ti mɔŋ mɔŋ po kaa, ŋaan ti mɔɔntir Yisa Masia poe, a ŋɔɔe tee ti Yomdaanɔ na, ŋaan want nan timme tee u toontunna ki teeni, u sann paak.

⁶ Yennu nba din yet a “Yentu-n yent bunbɔnn ni” ŋɔɔe te ki u yentu na yentir ti para ni, a ti bann u yentsaakar nba tee biaŋinba; ki li yentu yeen Yisa Masia numm po.

⁷ Ŋaan timm nba mɔk Seyeeŋ mɔkint na tee kaman nan yɔkmaanu nee, ki li want nan paŋ nba gar paŋ kur tee Yennu yare, ŋaan li ki tee ti yari.

⁸ Ti laat fara bonchiann yoo kur, ŋaan li kan fit ki nyannit; ti tuu kɔŋ sommir sianyoo, ŋaan ti ki kɔŋ dindann;

⁹ bi dintit fara, ŋaan Yennu ki nyikititi; bi lut tiŋ ni, ŋaan kan fit kpiti;

¹⁰ Yisa kuun na be ti gbanant ni yoo kur, a lin te ki u manfoor na-n mun nyi paanu ti gbanant ni.

¹¹ Yoo nba ki ti fo na ti be kuun nuu nie Yisa paak, a u manfoor nba be ti gbanant nba yaa lin tan kpo na-n nyi paanu ni.

¹² Ki kuun dia ti nii, li paak ki yimme mɔk manfopaann.

¹³ Li sɔb Yennu gbouŋ ni a “Ma teen yada na paak te ki n pak nna,” ki ti mun mɔk Seyeeŋ nba din te ki nirɔ maŋ teen yada na, li paak, ti mun teen yada ki piak.

¹⁴ Kimaan ti mi nan Yennu nba din fiin ti Yomdaanɔ Yisa kuun ni na, ŋɔɔe tan sa fiin timm nan yimm nba waa Yisa mun kuun ni, ki sa baar nant u mɔŋ boor ni.

¹⁵ Kimaan linba na nba kur be a lin somm yimme, ki niib bonchiann nba tan sa la Yennu ninbatinu na, bi tan sa turɔ niipoouk bonchiann, ki dont u sann.

Yada sɔnu po

¹⁶ Li paake te ki ti ki mɔk kpinkpangbatuku; hali nan ti gbananchɔkint maŋ nɔɔk ni gbaa, ŋaan Yennu pantir ti seek daar-n tuu daar.

¹⁷ Li paak, farmintik nba ki ti di ki li kan yukiri, li tan sa baar nan parpeenn nba yab ki kaa gbennu ki turit, ki parpeenn maŋ tan sii yab ki gar ti fardinu na bonchiann,

¹⁸ kimaan ti baka kaa linba ki ti laat na po kaa, ŋaan ti baka be linba ki ti ki laat na poe; kimaan linba ki ti laat na, li kan yukiri ki li tan sa gar, ŋaan linba ki ti ki laat na ŋanin tan sii be nan yoo nba kaa gbennu.