2 Korint teeb 3 - Yennu Gbounpaauŋ Mɔɔr

Yennu lorpaanu po

¹ Ki linba na want nan ti bia want ti mɔŋee? Li daa tee talase nan sɔɔ-n sɔb ti siara gbant ki turii? amii ti gaar ti siara gbant i boor ni-ii? kaman nan nisiab nba tuun biaŋinba na. Aaii.

² Yimme tee ti siara gbouŋ ki taab ti para ni a sɔɔ kur-n karin ki bann.

³ Li dɔɔ paanu ni nan yimme tee Masia gbouŋ maŋ ki u din sɔb ki tunt nann; li tee gbouŋ nba ki nisaarik kaa jii makmɔɔnu ki sɔb tanpatlai paaki, ŋaan manfodaanɔ Yennu Seyeeŋe sɔbir nisaarii para ni.

⁴ Linba paak te ki ti piak nna na tee ta teen Yennu yada Masia sann paak nee.

⁵ Ti ki want ti mɔŋ nan ti sa fit tun siar nan ti mɔŋ mɔŋ paŋ kaa, ŋaan Yennu sann paak ti sa fit tun siara.

⁶ Ŋɔɔe din te ki ti jaŋ nan u lorpaanu toona; ki lorpaanu maŋ ki tee Moses sennu nba ki bi din sɔb na kaa, li tee Seyeeŋ yare; kimaan sennu maŋ din baat nan kuume, ŋaan ki Yennu Seyeeŋ teent manfoor nba kaa gbennu.

⁷ Yoo nba ki bi din sɔb sennu maŋ tann paak na, li yooe ki Yennu yentsaakar din sik ki nyirii Moses numm po; ki li nyiriku paak, ki Israel teeb lek din ki fit goriiɔ. Ki li-i tee ki sennu maŋ nba din baat nan kuun ki bia gaar na din baar nan yentsaakar,

⁸ i mi a nlee ki Seyeeŋ sɔnu kii be nan yentsaakar ki gariri?

⁹ Li-i tee ki sennu nba wann niib a bi mɔk biite din baar nan yentsaakar, ki Seyeeŋ sɔnu nba te ki niib tee niŋamm na be nan yentsaakar ki garir.

¹⁰ Sennu nba din tuu be nan yentsaakar na din tan kɔŋ li yentsaakar na, kimaan yentsaakar nba yab garɔ paak.

¹¹ Li-i tee ki sennu nba din gar na din baar nan yentsaakar, ki Seyeeŋ sɔnu nba sii be nan yoo nba kaa gbennu, li yentsaakar sii yab bonchiann ki gar nna.

¹² Ta mɔk dindann nba na paake te ki ti mɔk parcheenn.

¹³ Ŋaan ti ki tee kaman nan Moses nba din jii chinchenn ki pin u numm po a Israel teeb daa laat yentu nba be sennu nba yaa lin gar na paak kaa.

¹⁴ Ŋaan ki bi dudukit din ki yenti; bi-i karin Yennu gbounkper na yoonba, li tee kaman nan chinchenn maŋ bia daa dɔɔk bi dudukit nan dinna gbaa, kimaan see wunba jii u mɔŋ ki tabin nan Masiae, ki chinchenn maŋ tuu dɔkit u dudukit ni.

¹⁵ Hali nan dinna, bi-i taŋŋi karin Moses sennu na, chinchenn na bia daa dɔɔk bi para ni.

¹⁶ Ŋaan li-i tee ki nirɔ ŋmat ki waa ti Yomdaanɔ, chinchenn maŋ sa dɔkite.

¹⁷ Ki ti Yomdaanɔ tee Seyeeŋ nae; ki siaminba ki ti Yomdaanɔ Seyeeŋ na be na, yentinmɔŋ be leŋe.

¹⁸ Li paak, chinchenn maŋ ji ki dɔɔk ti kura nunii po, ki ti laat ti Yomdaanɔ nba mɔk ŋant bonchiann biaŋinba, ki li kpintit ki ti naan nanɔ, ki ti ŋant bia pukii yoo kura, ki ŋant maŋ nyi ti Yomdaanɔ nba tee Seyeeŋ na boor nie.