2 Korint teeb 2 - Yennu Gbounpaauŋ Mɔɔr

¹ Li paak te ki n ji daan lor n mɔŋ par ni nan n kan baar i boor ni ki tan turi parbiiri.

² Li-i tee ki n baar ki tan biir i para ni, ŋmee ji sa penn n pari, see yimm nba ki n biir i para ni na.

³ Li paake te ki n din sɔbi gbouŋ, ma n ki loon ki n baar ki tan la parbiir yimm nba bo sa penn n par ni na paak. Kimaan n teen yada nan n parpeenn tee i parpeenn nee.

⁴ Ma din sɔb gbouŋ na ki turi, n din sɔbir nan parbiir bonchiann nan ninnyuut; li din ki tee a n loon ki n biir i para ni kaa, ŋaan n din loon ki yin bann loomm nba ki n mɔk ki jii jiin i poe.

Nyikinchab labaar

⁵ Li-i tee ki sɔɔ tun i yenɔ biit, u ki tun min kuukɔɔ kaa biiti, ŋaan u tun i kuraewa biit maŋ, kimaan ma ki loon ki n mantik jii nan ninmɔnn na paake te ki n yeen linba na.

⁶ I kure daan lakin ki dat u tubir, li paak, li ji jaŋa,

⁷ ŋaan li ŋan yin nyik ki chabɔ, ŋaan kii maant u par, ki daa te ki wun baa tarrri.

⁸ N barimiie, ŋaant ki wun bann nan i bia daa loonɔ bonchiann.

⁹ Linba na paake te ki n din sɔbin ma n laan i set saak n mɔb bonsiar kur ni.

¹⁰ Li-i tee ki i nyik linba kur ki chab wunba, n mun nyik chabɔe na, kimaan mi-i nyik chabɔ linba na paak, i paak te ki n nyik chabɔ Masia sann ni;

¹¹ i daa teen Sintaanii yaaki, kimaan ti mi u sɔnii nba tee biaŋinba.

Troas tingbouŋ po

¹² Ma din tan baar Troas tingbouŋ ni ma n mɔɔnt Yisa barŋanii mɔɔntii na, ki n bann nan Yennu set loot u toona sanjouk leŋa.

¹³ Ŋaan ma din ki la n naa bik Taitus leŋ na paak, ki n ki la pardɔɔnn; li paak ki n chab leŋ teeb, ŋaan gar saan Masedonia.

Nyannu nba be Masia ni labaar

¹⁴ Ŋaan ti teen Yennu niipoouk, kimaan ta gaa nan Masia na paak te ki ti nyant bonsiar kur. Yennu jiit a ti fiit Masia ki wann sɔɔ kur mun; ki u barŋanii bannu tee kaman nan tulaarii nba nubir man biaŋinba nee.

¹⁵ Ti tee kaman nan bonnunubmana nee ki Masia jiit ki wubint ki teen Yennu, ki li yat kɔɔ binba la tinnu nan binba ki la tinnu kura.

¹⁶ Binba ki la tinnu na boor ni, ti tee kaman nan nubiru nba baat nan kuun nee, ŋaan binba la tinnu boor ni ŋanimiie, ti tee kaman nan nubiru nba baat nan manfoor nee.

¹⁷ Ŋmee jaŋ nan toona maŋi? Tɔn, ti ki tee kaman nan binba dia Yennu mɔmaan maŋ ki li tee kpinkpouŋ turib na kaa, ŋaan ti mɔk barmɔnpaku, kimaan ŋɔɔ Yennu tunt; li paak ki ti be u tɔɔnn, ki mɔɔntir u mɔmaan Yisa sann ni.