2 Korint teeb 12 - Yennu Gbounpaauŋ Mɔɔr

Bakitnant nba ki Pɔɔl din la na labaar

¹ Li kpaa talas ki mii lekii mɔk parbifaant, ŋaan li ki mɔk nyɔɔti. Mɔtana n sa beti ti Yomdaanɔ nba wannin bakitnant nba, ki kat labaar nba ki wannin.

² Li bina piik nan ŋannae na, ki Yennu din jiin ki donnin u boor ni sanpaapo; n ki fit bann amii u din jii n seek kuukɔɔe ki doo nanin, amii u din jii n seek nan n gbanante, ŋɔɔ kuukɔɔe mi.

^3-4 Ma mi linba tee wa din jii-n ki donnin u boor ni sanpaapo, Paradais nie; leŋe ki n din gbat labasia nba ki n kan fit kumii sɔɔ; Yennu kan sak a man kumiiri.

⁵ Li bakitnauŋ bont kuukɔɔ paak ki n sii mɔk parbifaant; n kan pak n mɔŋi; n sa pak n mɔŋ n nuu baŋŋu paake.

⁶ Mi-i loon ki n faa parbiir, ŋaan n kii tee kaman nan jatuk na kaa, kimaan mɔmɔmm kuukɔɔe ki n kpan sii piak; ŋaan min poŋ ki loon ki n faa parbiiri. Min ki loon ki nisɔɔ-n pakin ki gar pinpakit nba fan nanin. N loon ki bin got n binbeŋ nba tee biaŋinbae, ki gbat ma piak biaŋinba, ki li poorpo ki bin bann ma tee nibooru nba.

⁷ Yennu nba din wannin bakitnant nba bonchiann na, ŋaan u ki loon ki n donn n mɔŋ li paaki; li paak te ki u din te ki muksuk nyii Sintaanii boor ni ki baarin. Li muksuk yiarin kaman nan kunkonn nba tuu ŋmuu nirɔ gbanant ki li yiarɔ biaŋinba nee.

⁸ N miar ti Yomdaanɔ taar munntaa ma wun nyinn li muksuk n ni;

⁹ ŋaan u lek ki saki, ŋaan betin a “N sommir na sa te ki a nyann muksuk maŋa, kimaan wunba ki mɔk u mɔŋ paŋ na set sa la n paŋe.” Li paak, n sii faa parbiir n butuŋ na paak nan parpeenn, a Masia paŋ-ii be n ni.

¹⁰ Li-i tee Masia paak ki n di butuŋ, ki laat sukit, ki di fara nan muksuk, ki laat barii, n mɔk parpeenn, kimaan mi-i taŋŋi kii mɔk n tiauŋ paŋ yoonba na, li yooe ki n laat Masia paŋ.

Pɔɔl baka nba be Korint teeb ni biaŋinba

¹¹ Li-i bo-i tee ki yimme piakin, ŋanne bo sii ŋan; ŋaan ya ki piakin paak te ki n piak n mɔŋ kaman nan n tee jatuko na. Mi-i kii tee siar, ŋaan binba kpann a bi tee Masia toomiinba na ki garimi.

¹² Ma din be i boor ni ki tuun bakitnauŋ nyina nan toonjaana, ki di sukuru yoo kur na, ŋanne want nan n set tee Masia toomiie.

¹³ Nlee ki Masiaweileeb na cheeini? Ma ki boi-i bonsiar sommir po na, ŋanne te ki bi cheeinii? Li-i tee ŋanniie te ki n mɔk biit, yin teenin gafara man!

¹⁴ Li taar munntaae na ki n tuu tee siir ma n baar i boor ni. Ŋaan n ki yaa n baar ki loon siar kaa i boor ni, ŋaan n loon yimme, li ki tee n loon i likirii kaa. Waas ki loon bont teen bi dammi. Wadamme loon bont ki teen waas. Yimm tee n waase;

¹⁵ li paake te ki li maŋin nan man jii n mɔŋ ki turi, ki tun nan nunmɔnn ki sommi. Ki mi-i looni bonchiann, yimm sii loonin waaminnee?

¹⁶ Li tee barmɔniie, n din ki mukisi a yin turin bonsiari, ŋaan ki i siab yeen a n din kpanniie ki fati. Nlee ki n din fatiini?

¹⁷ Ma din tun nisiab nba i boor ni na, bi sɔɔ din mi ki ŋmab i bonsiar ki dii ŋaan tenn ki tan turimii? Aaii.

¹⁸ N din barin Taitus ma wun saan i boor ni, ki bia din te ki ti naa bisɔɔ mun weiɔ. Taitus din mi ki ŋmab i bontii? Aaii. Ti ki mɔk li dudukiti. Ma tuun biaŋinba, u mun tuun nnee. Ma waa sɔnu nba u mun waa ŋanne.

¹⁹ I dukii a ta piak na, ti loon ki ti nyinn ti mɔŋ barii niee? Li ki tee nna kaa. Ti be Yennu tɔɔnn poe, ki piak Masia nba loon biaŋinba. Ti naa walonkai, ti loon ki ti sommie ki i wei Yennu sɔnu fanu. Ŋanne te ki ti beeri.

²⁰ N yan put i paake nan ma tan sa baar i boor ni ki kan lai ki i be kaman nan ma loon yii be biaŋinba na; ki i mun kan la min ki n be kaman nan ya loon mii be biaŋinba na: n mɔk jijeet nan n sa lai ki i kɔn nan i leeb, ki mɔk funfunn nan i leeb, ki dont wutoor i leeb paak, ki lukitir i leeb, ki sukii i leeb, ki biir i leeb, ki mɔk karinbaanii, ki tee kpirkpir;

²¹ n bia mɔk jijeet nan Yennu sa te ki n di fei i paak; ki n par sa biir i siab bonchiann paak, kimaan bi poŋ tun toonbiit, nan jakint toona, nan bonchonchonn toona, ki ji ki tiin fei, ki bia ki nyik bi biit maŋi.