2 Korint teeb 10 - Yennu Gbounpaauŋ Mɔɔr

Pɔɔl kɔn u toona paak

¹ Tɔn, i siab yeen a ma din be i boor ni na, a n din ki mɔk par i boor ni; a ŋaan mi-i saan ki be siarpo, a n tuu mɔk pare, ki ji sɔbin gbant ki kpaani. Min Pɔɔl tiauŋ, n mɔk nibaakir ki be soonna kaman nan Masia nba be biaŋinba na, ki barimi a yin ŋamm i binbeŋ man,

² ki mi-i taŋŋi baar i boor ni yoonba, n kan dat i siab tuba. N mi nan mi-i baar i boor ni yoonba see ki n dat nisiab nba ya a ti waa tingbouŋ na niib nba waa linbae na tuba.

³ Li tee barmɔniie nan ti mun lek tee nisaariie, ŋaan ti ki kɔn kunkɔnn siar nba tee nisaarii yar kaa,

⁴ li paak, ti ki jikit nisaarik paŋ kaa a ti kɔn li kunkɔnni, ti jikit Yennu paŋ nba sa biir Sintaanii paŋ kur nee ki kɔn. Ti piak ki nyant niib nba ki sak Yennu mɔmaan nee,

⁵ ki nyant niib nba mɔk karinbaanii ki dukii a bi mɔk yan ki gar Yennue, a ti te ki sɔɔ kur dudukit-n sak gaar Masia.

⁶ Ti-i bo-i mi binba be i sinsuuk ni ki sak Yennu mɔb na, ti bo sa dat binba ki sak na tubae.

⁷ Yimm gorii nisaarik numm po kuukɔɔe. Nisɔɔ-i be i sinsuuk ni ki yaa a u tee Masia yɔɔe, yin te ki li yɔɔ-n tiar nan ti mun tee Masia niibe kaman nan wa tee biaŋinba na.

⁸ Ti Yomdaanɔ din turin yudantuk na a n sommie ki yin fit weiɔ fanu, u din ki turin a n biiri kaa. Mi-i lekii nyu bara ki gar ma bo sa nyu biaŋinba, ŋaan n kan di fei.

⁹ I daa dukii nan n loon ki n sɔb gbouŋ nba sa jeeniini.

¹⁰ Nisiab yeen a n sɔbin gbant ki li naan nan pandaansɔɔ yar nee, a ŋaan ki mi-i taŋŋi baar i boor ni yoonba a n ji tuu ki mɔk paŋ, a ki n mɔbona na ji tuu tee yanne.

¹¹ Li ŋan ki li niib-n bann nan ta sɔbin ti gbant ni a ti sa tun biaŋinba na, ti-i taŋŋi baar yoonba na, li biaŋe ki ti set sa tun.

¹² Mɔmɔmm, ti ki loon ki ti jii ti mɔŋ ki bikin nan nisiab nba dont bi mɔŋ, ki bia ki loon ki tii tee nan bi yemm na. Bi ki mɔk yami, bi gorii leeb binbeŋ nba tee biaŋinbae ki bikii nan bi mɔŋ.

¹³ Ŋaan timm ŋanin, ti ki dont ti mɔŋ ki gaar ti toona nba tee biaŋinba. Ti mɔk yuugontir nan toona nba ki Yennu nyinnit ki turit na paake. Ta beeri Yennu mɔmaan nba nae tee toona maŋ yenninba.

¹⁴ Ti din dɔŋ siab ki baar i boor ni ki din beti Masia labaar. Ta tuun nna maŋe tee Masia nba sennit linba a tii tuun.

¹⁵ Ti ki loon pinpakit nisiab toona paaki. Ti mɔk dindann nan i sa ŋamm teen Yisa yada bonchiann, ki sommit ki ti ŋamm tun Yennu toona bonchiann i boor kaman nan wa jiir ki turit a ti tunn biaŋinba na.

¹⁶ Ki ti sa fit ki saan dosai nba boor fɔk ki gar i doo na, ki mɔɔnt li barŋanii. Ti kan saan siaminba ki siab poŋ din tun na, ti ki loon pinpakit nisiab toona paaki.

¹⁷ Li sɔb Yennu gbouŋ ni a “Nirɔ nba loon parbifaant, li ŋan ki wun faa parbiir linba ki ti Yomdaanɔ tun na paake.”

¹⁸ Kimaan nisɔɔ nba piak u mɔŋ, li ki want nan Yennu numm gboou kaa; ti Yomdaanɔ-i piak wunba, ŋanne want nan Yennu numm gboou.