2 Korint teeb 1 - Yennu Gbounpaauŋ Mɔɔr

¹ Min Pɔɔl wunba ki Yennu loomm paak ki u teenin Yisa Masia toomii na, min nan ti naa bik Timotie sɔbin gbouŋ na ki teen Yennu niib nba be Korint, nan u niib kur nba be Akaya tingbouŋ ni nna kur.

² Ti Baa Yennu nan ti Yomdaanɔ Yisa Masia-n sommi ki bia turi parmaasir.

Pɔɔl nba teen Yennu niipoouk biaŋinba

³ Ŋaant ki ti tur Yennu nba tee ti Yomdaanɔ Yisa Masia Baa na niipoouk; ŋɔɔe tinit ninbaauk; u boor nie ki ti parmaann kur nyi.

⁴ Ŋɔɔe maan ti para ti fara kur ni, a tin mun fit maan binba be fara booru booru ni na para, kaman nan Yennu nba maan ti para biaŋinba na.

⁵ Ti fara dinu Masia sann paak nba yab biaŋinba, nnee ki ti parmaann mun bia yab kimaan ŋɔɔ Masia sann paak.

⁶ Ta loon ki tin maan i para ki te ki yin la tinnu na paake te ki ti di fara. Ti-i la parmaann, li tee i paake, a tin mun maan i para, ki yin mun la sukuru ki di fara kaman nan ta mun dir biaŋinba na.

⁷ Li paak ti mɔk dindann ki jii jiin i po a i sa saan tɔɔnn, kimaan ti mi nan ya di fara kaman nan ta di biaŋinba na, nnee ki i mun bia sii laat parmaann kaman nan ta laat biaŋinba na.

⁸ N naa waas, n loon ki n tiari fara nba ki ti din dii Asia yent ni nee. Fara maŋ din mantik gar ti paŋ terik hali ki ti tan ŋaa dindann ti mɔŋ mɔŋ manfoa po,

⁹ kimaan ti ji din tan dukii nan kuun ki fɔk nanti, ŋaan linba na din tun a lin wannit nan li ki ŋan nan tii daan ti mɔŋ paaki, ŋaan kii daan Yennu nba fiint kpeemm na paake;

¹⁰ ŋɔɔe din nyinnit kuun dangbeŋŋir na ni. U sa tinnita, ki ti mɔk dindann nan u bia tan sa tinnita.

¹¹ Yi mun bia sommit nan Yenmiaru man, ki Yennu sa gat niib bonchiann miaru nba ki bi mei teent na, ki sa sommit, ki niib bonchiann sa turɔ niipoouk ti paak.

Pɔɔl dudukit lebitu po

¹² Linba paak te ki ti mɔk yuugontir na tee nnee: ti dudukite wantit nan ti mɔk barmɔnpaku nan yentinu tingbouŋ na niib boor, ki mantik daan be nna ki jiin timm nan yimm weinanleeb po na; ki Yennu sommir paake te ki ti be nna maŋ, li ki tee nisaarii yan paak kaa.

¹³ Ti sɔbin linba ki i sa fit karin ki bann li paake ki teeni na, ŋaan mɔk dindann nan i tan sa bann fanu

¹⁴ kaman nan ya poŋ bann waaminna biaŋinba na, nan i tan sa fit kii mɔk yuugontir ti paak, kaman nan ta mun sii mɔk yuugontir i paak, ti Yomdaanɔ Yisa jenu daar na.

¹⁵ Ma bann linba na paake te ki n daan lor ma n poŋ jen i boor ni, ki yin la sommir taar munnlee,

¹⁶ kimaan n daan lor nan mi-i taŋŋi gaar saa Masedonia man bot gɔniie, ki mi-i taŋŋi jent man bia bot gɔni, ki la sommir i boor ni linba sa sommin ki n ŋmat saan Judea.

¹⁷ Ki n lor maŋ daan tee laat loree? amii ma daan lor ma n sa tun linba maŋ, li daan tee kaman nan tingbouŋ na yab nba tuu yet a, “Nn, nn,” ŋaan bia tan yet a “Aaii, aaii” nee-ee?

¹⁸ Ŋaan Yennu nba tee barmɔnii daanɔ na paak, n mɔsonn nba ki n daan turi na daan ki tee “Nn” nan “Aaii” kaa.

¹⁹ Kimaan Yisa Masia nba tee Yennu Bija na, wunba ki min nan Sailas nan Timoti din mɔɔnt u po ki turi na, u ki tee “Nn” nan “Aaii” kaa, ŋaan u mɔlora kur ni tee “Mme.”

²⁰ Kimaan ŋɔɔe tee “Nn” Yennu mɔsona kur ni. Linba na paake te ki ti yet a “Mɔmɔmm” Yisa Masia ni, ki li dont Yennu sann.

²¹ Yennue din gannit ki ti be ti kuukɔɔ, ki u senn timm nan yimm fanu Masia nie.

²² Ŋɔɔe jii u Seyeeŋ ki teen ti para ni, ki jii u dɔk ki dɔk ti paak, ki li want nan u tan sa turit linba kur ki u lor nawa.

²³ Yennue tee n siaradaanɔ nan linba paak daan te ki n ki baar Korint i boor ni na tee n tan daa te ki i laat tubdatu.

²⁴ Ti kan fit mukisi ki wanni ya sa teen yada biaŋinba, kimaan ti mi nan i mɔk yada ki see fanu, ŋaan ti tuun nani a tii wanti ya sa teen biaŋinbae kii mɔk parpeenn.