2 Jɔɔnn 1 - Yennu Gbounpaauŋ Mɔɔr

¹ Min Jɔɔnn nba tee Masiaweira saakɔɔ nee, sɔbin gbouŋ na ki teen fin nba tee n niipoo nba ki Yennu gannɔ na, nan a waas. N looni nan barmɔnii, ŋaan li bia ki tee min kuukɔɔ kaa looniini. Binba kur mun saak Yennu barmɔnii maŋ wannu, bi mun bia looni nnee.

² Min nan ŋamme looni, kimaan ti kur nba taa barmɔnii wannu maŋ paak, ki barmɔnii wannu maŋ set sii yɔɔ be ti ni mɔkmɔk nan yoo nba kaa gbennu.

³ Ti Baa Yennu nan u Bija Yisa Masia sommir nan bi ninbatinu nan bi parmaasir sii be ti paak, nan ta waa barmɔnii wannu nan loomm sɔnu biaŋinba na.

Loomm sɔnu po

⁴ N daan mɔk parpeenn bonchiann nan ma daan la a wasiat nba ki bi waa barmɔnii wannu nba ki ti Baa Yennu sennit sennu na.

⁵ N niipoo, n meia, ŋaant ki ti kur-ii loon ti naa walees. Linba na ki tee sennpaanu kaa ki n sɔbani, ŋaan li tee sennu nba ki ti din dɔŋ gbia li po pinpiik niwa mɔkmɔk nan dinnae.

⁶ Ti-i yɔɔ saak Yennu sennu, ŋanne want nan ti loonɔ nan mɔnii, ki sennu maŋ nba ki ti din dɔŋ gbia li po pinpiik niwa mɔkmɔk nan dinna na, li sennu yaa a tii waa loomm sɔnue.

Kpinkpannii damm po

⁷ Tɔn, kpinkpannii damm bonchiann poŋ baar ki yat saan siar po kur tingbouŋ na niwa, binba yaa a ŋamm ki teen yada a bi mar Yisa ki u tee nisaarik na. Li nibooru tee kpinkpannii damme, ki bia tee Yisa datai.

⁸ Li paak, i mi man kii tan kɔŋ linba ki ti poŋ yabir i paak na, ki i tan sa la i nyɔɔt kur Yennu boor ni.

⁹ Daansɔɔ nba ki gaan Yisa Masia wannu bonŋann ŋaan pukii u mɔŋ yar, Yennu ki be nanɔ, ŋaan wunba saak wannu maŋ ki ki nyikiti, ti Baa Yennu nan u Bija Yisa Masia kur be u ni.

¹⁰ Li-i tee ki daansɔɔ nba baar i boor ni, ŋaan ki want Yisa Masia wannu maŋ nba tooki, i daa gaanɔ i ŋei ni, ki bia taan daa foontɔ gbaa,

¹¹ kimaan wunba foontɔ, u mɔŋ taant daanɔ maŋ biit poe na.

Chabitii

¹² N mɔk mɔbona bonchiann ki loon ki n sɔb ki turi, ŋaan n ki loon ki n sɔb gbouŋ ni kaa ki turiini, ŋaan n mɔk dindann nan n sa baar ki gɔni, ki tin pak nan leeb mɔi ni, ki li-i tee ki li fit teen nna, li sa maŋ ti para ni bonchiann.

¹³ A niipoo wunba ki Yennu gannɔ na, u waas foonta.