1 Timoti 6 - Yennu Gbounpaauŋ Mɔɔr

¹ Li kpaa talase ki binba tee daaba na-n tur bi yomdamm nibaakir, ki nisɔɔ daa piak biir Yennu sann nan u wannu.

² Binba ki bi yomdamm tee Masiaweira na daa fiakit bi yomdamm maŋ, ba yib bi naa waas na paak, ŋaan li kpaa talas ki ŋamme-n mantik tun fanu, kimaan bi yomdamm nba gaan bi toona nyɔɔt na teen Masia yada, ki Yennu loonib. I wantib kii kpaamm toona na po.

Wannu nba ki tee barmɔnii labaar

³ Sɔɔ-i want wannganu ki ki wei ti Yomdaanɔ Yisa Masia mɔbona nan Yennu sɔnu wannu na,

⁴ u gbee nan karinbaaniie ki ki bann siari, ki bia mɔk mɔniɔk nan kunkɔna niauŋ, ki li baat nan funfunn, nan kunkɔna, nan nisukit, nan pinpakbiit,

⁵ nan mɔniɔk yoo kura nibiit boor ni; ŋamm yaa dudukit ki somm fanu, ki ji ki mɔk barmɔnii; bi dukii nan Yennu sɔnu tee sɔnu nba sa te nirɔ-n teen mɔkitɔɔe.

⁶ Li-i tee ki nirɔ numm gboot wa mɔk linba, Yennu sɔnu set mɔk nyɔɔte,

⁷ kimaan ti din ki baar nan bonsiar tingbouŋ nna ni, ki ti bia tan kan nyi nan bonsiar tingbouŋ na ni,

⁸ ŋaan ti-i mɔk jeet nan tiat, li ŋan ki ti numm-n gboor;

⁹ ŋaan binba loon bii tee mɔkita, ŋamme baa jinjammii ni, nan barit ni, nan jatii nan pobiir nba biir niib ki baantib yann na ni,

¹⁰ kimaan likirii loomme tee bonbiir kur jiinn. Nisiab poŋ jii bi mɔŋ ki teen likiloonbiiuk na ni; li paak, ki bi ji ki teen Masia yada. Ŋanne te ki bi laat parbibooru booru.

Pɔɔl nba kpaan Timoti kpaanii biaŋinba

¹¹ Ŋaan fin Timoti nba tee Yennu nirɔ na, li ŋan ki a dɔŋ nyi linba na nba kura ni, ŋaan kii loon fii be fanu, kii mɔk yentinu, ki teen Yennu yada, kii loon niib, kii mɔk sukuru, kii be soonna.

¹² Yabit a mɔŋ kii waa yada sɔnu nan nunmɔnn, kii mɔk manfoor nba kaa gbennu; ki Yennu din yiina ki a gaar manfoor maŋ yoo nba ki a din nyinn a mɔŋ siarŋann niib bonchiann numm ni na.

^13-14 N kpaana kpaaniie Yennu nba teen bonsiar kura manfoor, nan Yisa Masia tɔɔnn po; ŋɔɔe din nyinn u mɔŋ siarŋann Ponshus Pailat numm ni; n kpaana kpaaniie, a fii dia Yennu sennu fanu ki biit-ii kaa mɔkmɔk nan daar nba ki ti Yomdaanɔ Yisa Masia na tan sa dɔkit.

¹⁵ Yennu nba ki ti piakɔ na, ŋɔɔ kuukɔɔe tee Yudaanɔ, ki bia tee kpanbara kur Kpanbar, ki bia tee yomdamm kur Yomdaanɔ; ŋɔɔe tan sa te ki wun dɔkit yoo nba jaŋ;

¹⁶ ŋɔɔ kuukɔɔe kan kpo; u be yentchiauŋ nba ki nirɔ kan fit nakin ni; ŋɔɔe ki nisɔɔ daa ki mi lau amii ki sa fit lau; ŋɔɔe yen paku nan paŋ yoo nba kaa gbennu. Mɔmɔmm.

¹⁷ A kpaan mɔkita na a bi daa mɔk dontinmɔŋ amii bin teen bi dindann mɔkint nba tee wouŋ na ni; ŋaan bin teen bi dindann kur Yennu ni; ŋɔɔe turit bonsiar kur a ti gaar kii mɔk parpeenn.

¹⁸ Bii tuun toonŋana, ki bi toonŋana maŋ-ii yab; ki bi nii-ii yaa nan piinii turu.

¹⁹ Nnee sa te ki bii mɔk mɔkint sanpaapo kii guu bi mɔŋ yoo nba tan sa baar na; ki bi sii fit mɔk manfoor nba tee barmɔnii manfoor.

²⁰ Timoti, i guu barŋanii nba ki Yennu jii ki teen a nuu ni na. A nyik jat mɔniɔk nan labafaanu nba ki mɔk nyɔɔt ki bia ki tee Yennu yari, ki nisiab yir “bannu” na;

²¹ kimaan nisiab poŋ yaa a ŋamm mɔkir, ŋaan ki li paak ki bi nyik Masia sɔnu. Yennu sommir-ii be i ni.