1 Timoti 5 - Yennu Gbounpaauŋ Mɔɔr

Timoti toona nan Masiaweira labaar

¹ A daa yakii nan jakpersɔɔ, ŋaan pak turɔ kaman nan a mɔŋ mɔŋ baa na, kii dia naasimm kaman nan a mɔŋ mɔŋ ninjamm na,

² ki jii pookpera na ki bii tee kaman nan a naanba na, ki poopaannii na-ii naan nan a mɔŋ mɔŋ niipoob na nan binbenyeeŋ kura ni.

³ I teen pakɔi nba be bi kuukɔɔ na nibaakir,

⁴ ŋaan pakɔsɔɔ nba mɔk waas amii yaaboona, u waas amii yaaboona maŋ-n piin ki tumii bi yentinu toona nba tee linba ki tur bi mɔŋ ŋei ni, nnee ki bi damm mun sa di bi niwubit nyɔɔt, kimaan linba ki Yennu loone na.

⁵ Pakɔɔk nba be u kuukɔɔ ki kaa sɔɔ, ŋaan ki u dindann be Yennu ni, ki u mei Yennu yoo kur, ŋɔɔe tee barmɔnii pakɔɔk.

⁶ Ŋaan pakɔɔk nba tuun bonchonchonsin, u poŋ kpoewa ŋaan daa be maŋ.

⁷ Sent sennu na ki bii waa ki daa mɔk biiti.

⁸ Wunba ki gorii u nikpiimm, amii linba mantik gar tee u kii fiin u mɔŋ mɔŋ ŋaak niib po, li daanɔ kɔŋ yadawa; ki wunba ki tee Masiaweirɔ gbaa sɔu.

⁹ A daa kaan pakɔi nba daa ki kpet gar bina piinnloob na ki kɔɔnt pakɔi kann ni. Linba pukin, li kpaa talas ki wuu tee wunba din kun jɔɔ yenɔkɔɔe,

¹⁰ ki poŋ tuu mɔk sanŋann u toona paak, ki tee wunba poŋ tuu mi waas wubiru fanu, ki gaan saamm u ŋaak ni, ki tuun sikininmɔŋ toona ki teen u leeb nba waa Masia na, ki sommit niib fara ni, ki poŋ jii u mɔŋ kura teen toonŋana tumu ni.

¹¹ Ŋaan a daa pukii poopaannii na pakɔi kann ni, kimaan bi-i taŋŋi loon jakunt yoonba bi tuni nyikit Masia li yooe,

¹² ki ji pot bi mɔsonn nba ki bi din senn turɔ sinsinn na, ki ji kɔɔ biit ni.

¹³ Linba pukin, bi bia biir bi yoo ki ki loon toona, ŋaan lin lɔɔn ŋei ki tumii sanjaauŋ, nan niib barkpeena ni kɔɔnu, ki lin piak linba ki ŋan nan bii piaki.

¹⁴ Li paak, min bo sii loon ki pakɔi nba tee poobis na-n kun jabe ki mar waas, ki got bi ŋei fanu, ki ti datai daa laat yaak ki piak biit jiint ti po,

¹⁵ kimaan pakɔsiab poŋ tunn waa Sintaaniie.

¹⁶ Ŋaan poosɔɔ nba tee Masiaweirɔ ki mɔk pakɔi u ŋaak ni, li kpaa talas ki wun gotib fanu, ki daa jikit bi jikpiatir jint Masia niibi, ki Masia niib mun-n got pakɔi nba be bi kuukɔɔ na.

¹⁷ Masia niib yudamm nba diab fanu na ŋan nan nibaakir bonchiann; ki binba mɔɔntir Masia labaar ki wantib li paak, ŋamme mantik ŋan nan nibaakir;

¹⁸ kimaan li sɔb Yennu gbouŋ ni a “Naab-i ŋmaan dii ki pinii dibin, fa daa bobint u mɔbi,” ki bia sɔb a “Toontunnɔ ŋan ki wun gaar u paatii.”

¹⁹ Tɔn, bi-i paan saakasɔɔ barii, a daa te ki a baka be li ni, nɔkira siara damm teen niib bannlee amii bin gar nna.

²⁰ Binba tuun toonbiit na, i yakii namm, niib ni, ki binba biar na-n tin jaŋmaanii.

²¹ Yennu tɔɔnn nan Yisa Masia tɔɔnn nan malakagannteeb tɔɔnn po ki n teena kpaanii nba na, a fan sak wannu na ki daa mɔk ningannsai amii lukitin ki teen nisɔɔ bonsiar kur ni.

²² A daa mantik jekir ki yii a nii sɔɔ paak a wun teen Masiaweira yudaanɔ. A daa kɔɔnt a nuu siab toonbiit tumu ni; i dia a mɔŋ fanu.

²³ A laafia nba ki jaŋŋita na paak, a daa nyu nyun kuukɔɔ, ŋaan a tuu nyu daan waan ki lin somm a nɔɔk ni.

²⁴ Nisiab toonbiit poŋ dɔɔ paanu nie yoo nba ki bi daa ki bu bi buuti; ŋaan ki nisiab toonbiit mun sa nyi paanu bi buut bunu poorpoe.

²⁵ Toonŋana mun bia tee nnee, li yenninba nyii paanuwa, linba lek ki nyii paanu ni gbaa, ŋaan li kan fit bɔri.